2 Reyes 5:1-27
5 Naamán haʼe vaʼekue pe kuimbaʼe omoakãva rréi de Siria ehérsito, haʼe ningo ipláta ha pe rréipe g̃uarã haʼe vaʼekue peteĩ kuimbaʼe iñimportánteva, pórke haʼe rupive Jehová osalva* vaʼekue umi síriope iñenemigokuéragui. Naamán ningo peteĩ gerréro ipoderóso ha oñorairõkuaáva, péro oreko vaʼekue lépra.*
2 Peteĩ jey umi sirio ohórõ guare oataka Israel, ojagarra hikuái peteĩ mitãkuñaʼi, ha upévagui oiko vaʼekue Naamán rembireko siérva.
3 Ko mitãkuñaʼi heʼi ipatrónape: “¡Che patrón ohóramo ovisita pe proféta+ oĩvape Samáriape, haʼe katuete omongueráne chupe ilépragui!”.+
4 Upémarõ haʼe* oho pe rréi rendápe ha omombeʼu chupe pe mitãkuñaʼi israelita heʼi vaʼekue.
5 Upépe pe rréi de Siria heʼi Naamánpe: “¡Tereho katu! Che amondóta peteĩ kárta rréi de Israélpe”. Upémarõ haʼe oho ha oraha 342 kílo* de pláta, 6.000 monéda* de óro, ha 10 par ao ipyahúva.
6 Haʼe ogueru pe rréi de Israélpe pe kárta heʼíva: “Ko kárta reheve amondo ndéve hína che siérvo Naamán emonguerami hag̃ua chupe ilépragui”.
7 Pe rréi de Israel oleepamírente pe kárta, omondoro ijao ha heʼi: “¿Che piko Ñandejára mbaʼe aporojuka hag̃ua térã aporomoingove hag̃ua?+ ¡Pe rréi ningo ombou che rendápe ko kuimbaʼe, ha ojerure chéve amonguera hag̃ua chupe ilépragui! Peẽ pehecha porã hína haʼe oiko vaisenteha chendive”.
8 Péro Eliseo, Ñandejára siérvo, oikuaárõ guare pe rréi omondoro hague ijao, ensegída heʼika pe rréipe: “¿Mbaʼére piko remondoro nde ao? Ehejána tou che rendápe, haʼe oikuaa hag̃ua oĩha peteĩ proféta Israélpe”.+
9 Upémarõ Naamán oho umi ikavaju ha ikárro de gérra reheve, ha opyta oñemboʼy Eliseo róga entrádape.
10 Péro Eliseo omondo hendápe peteĩ mensahéro ha heʼika chupe: “Tereho eñapymi 7 vése+ pe rrío Jordánpe,+ ha nde pire okueráta ha nepotĩtama”.
11 Upépe Naamán orrenegaiterei ha ohopa hese heʼívo: “Chéngo haʼe hína kuri che pyʼapýpe: ‘Haʼe osẽta che rendápe, ha oñemboʼýta koʼápe che renondépe ha oipurúta Ijára Jehová réra, ha omonguʼéta ipo ápe ha pépe pe lépra ári chemonguera hag̃ua’.
12 Umi rrío oĩva Damáscope,+ pe Abaná ha Farpar ningo iporãiteve umi rrío oĩvagui Israélpe, ¿ndaikatúi mbaʼe piko aha añapymi umívape ha apyta chepotĩ?”. Upépe osẽ oho ha orrenegaiterei.
13 Upéi isiervokuéra oñemboja hendápe ha heʼi chupe: “Ore ruvicha,* pe proféta heʼírire ndéve rejapo hag̃ua peteĩ mbaʼe ijetuʼúva, ¿nderejapomoʼãi piko kuri? Koʼytevéntema upéicharõ rejapo vaʼerã pe ojeruréva ndéve, si haʼéngo heʼínte ndéve: ‘Tereho eñapymi ha nepotĩtama’”.
14 Upémarõ haʼe oguejy pe Rrío Jordánpe ha oñapymi upépe 7 vése, heʼi haguéicha Ñandejára siérvo.+ Upéi okuera ha ipire opyta mitãraʼy piréicha,+ ha haʼe opytáma ipotĩ.+
15 Upe rire haʼe ha kompletoite umi isoldádo* oho jey Ñandejára siérvo rendápe,+ oñemboʼy henondépe ha heʼi chupe: “Koʼág̃a ae aikuaa ndaiporiha Ñandejára ótro ládo ko yvy ape ári, síno Israélpe añoite.+ Ha koʼág̃a ejagarrána ko rregálo* nde siérvogui”.
16 Péro Eliseo heʼi: “Ahura Ñandejára Jehová oikovévare, chupe che aservi hína,* ha hérape haʼe ndéve ndajagarramoʼãiha ndehegui mbaʼeve”.+ Haʼe heʼi jey jey chupe ojagarra hag̃ua, péro Eliseo ndoaseptái.
17 Upéi Naamán heʼi: “Upéicharõ toñemeʼẽmína nde siérvope vosápe yvy Israelpegua agueraha hag̃uáicha mokõi mburika ári, pórke che ndajapomoʼãvéima ofrénda ojehapýva térã sakrifísio oimeraẽ ótro dióspe, síno Jehovápe añoiténte.
18 Péro peteĩ mbaʼénte aipota Jehová cheperdonami: ág̃a che ruvicha oike vove Rimón témplope* oñesũ hag̃ua, ha haʼe ojejoko che jyváre, che añesũmante vaʼerã avei Rimón témplope. Ha aipotaite ningo Jehová cheperdona añesũ haguére Rimón témplope”.
19 Upépe Eliseo heʼi chupe: “Tereho katu pyʼaguapýpe”. Haʼe osẽ upégui, ha oho riréma mombyrymi,
20 Guehazí,+ Ñandejára siérvo+ Eliseo ajudánte, heʼi ipyʼapýpe: “Che ruvicha ningo oheja oho ko sirio Naamánpe,+ ha ndojagarrái chugui umi mbaʼe ogueru vaʼekue. Ahura Ñandejára Jehová oikovévare che adiparataha hapykuéri ha ajagarrataha chugui algúna kósa”.
21 Upémarõ Guehazí omuña Naamánpe. Ha Naamán ohechávo oĩha odiparáva hapykuéri, oguejy ikárrogui ha ohug̃uaitĩ chupe ha heʼi: “¿Trankilopa piko hína?”.
22 Upépe Guehazí heʼi chupe: “Trankilopánte hína. Che ruvicha chembou ha heʼika ndéve: ‘Koʼangete ningo og̃uahẽ mokõi mitãrusu Efraín montañakuéragui, umíva ningo umi proféta raʼykuéra ha ou che rendápe. Emeʼẽmína chupekuéra g̃uarã 34 kílo 200 grámo* de pláta ha mokõi par ao pyahu’”.+
23 Upémarõ Naamán heʼi chupe: “Tereho katu ejagarra 68 kílo 400 grámo* de pláta”. Naamán heʼi jey jey chupe ojagarra hag̃ua upéva,+ upémarõ haʼe ojagarra 68 kílo 400 grámo* de pláta ha mokõi par ao pyahu ha omoĩ mokõi vosápe. Upéi omeʼẽ mokõi isiérvope ogueraha hag̃ua henonderã.
24 Og̃uahẽvo Ofélpe,* ojagarra umi kuimbaʼégui umi mbaʼe ogueru vaʼekue ha oñongatu peteĩ ógape, ha upéi omondo jey umi kuimbaʼépe. Ha oho rire hikuái,
25 haʼe oho Eliseo rendápe ha oñemboʼy upépe. Ha Eliseo heʼi chupe: “¿Moõgui piko reju Guehazí?”. Ha haʼe heʼi chupe: “Che ningo ndahái moõve che ruvicha”.+
26 Eliseo heʼi chupe: “¿Nde piko repensa che ndaikuaaiha nde reho hague pe kuimbaʼe rapykuéri, ha haʼe oguejy hague ikárrogui nerug̃uaitĩ hag̃ua? ¿Nde piko repensa iporãha hína koʼã tiémpope jajagarra pláta, ao porã, olivoty, parralty, ovecha, vaka, siérvo térã siérva?+
27 Ha koʼág̃a pe lépra oreko vaʼekue Naamán+ ováta nderehe ha ne familiare rehe opa ára g̃uarã”. Upépe Guehazí ensegída osẽ oho henondégui ha pe lépra eládaicha morotĩmba hese.+
Nóta
^ Térã: “ogana”.
^ Térã: “oreko vaʼekue peteĩ mbaʼasy ipirére”.
^ Amalisia koʼápe oñeñeʼẽ hína Naamán rehe.
^ Hebréope: “pedáso”.
^ Hebréope: “Ore ru”.
^ Hebréope: “vendisión”.
^ Hebréope: “ikampaménto”.
^ Hebréope: “henondépe che añemboʼy”.
^ Hebréope: “rógape”.
^ Hebréope: “1 talento”.
^ Hebréope: “2 talento”.
^ Hebréope: “2 talento”.
^ Peteĩ lugár oĩva Samáriape, ikatu hína peteĩ sérro térã peteĩ siuda imurallapáva.
