2 Samuel 23:1-39
23 Koʼã mbaʼe ningo David heʼi vaʼekue ipahaite:+
“Ko mbaʼe heʼi vaʼekue David, Jesé raʼy,+koʼã mbaʼe heʼi pe kuimbaʼe Ñandejára omombaʼéva.+
Jacob Jára oelehi*+ chupe,pe ojeguerohoryetéva ha opurahéiva umi músika+ Israelpegua.
2 Jehová espíritu ojevale cherehe oñeʼẽ hag̃ua,+haʼe omeʼẽ chéve iñeʼẽ amombeʼu hag̃ua.+
3 Israel Jára oñeʼẽ chéve,Israélpe g̃uarã Ñandejára haʼete peteĩ ita guasu,+ ha haʼe heʼi:
‘Ogoverna jave peteĩ ihústova+
ha orrespetáva Ñandejárape,+
4 igoviérno ojajái, haʼete pe kuarahy+ osẽva pyharevetendaipóri jave yvágape ni peteĩ arai.
Ojogua pe kuarahy ojajáivape okypa rire,omoheñóiva umi plánta’.+
5 Péicha hína che família Ñandejára renondépe.
Haʼe ningo ojapo chendive peteĩ kompromíso opa ára g̃uarã,+Ñandejára opreparapaitéma voi entéro mbaʼe okumpli hag̃ua pe opromete vaʼekue, ha upéva seguroite oñekumplíta.
Pe kompromíso rupive che ajesalváta ha avyʼaitereíta.
Ñandejára voi oñenkargáta oñekumpli hag̃ua opa koʼã mbaʼe.+
6 Péro umi kuimbaʼe ndovaléiva mbaʼeverã oñemombóta+ oñemomboháicha umi ñana vai ñuatĩgui henyhẽva,umíva ndaikatúi ni jajagarra.
7 Algúno ojagarráramo umi ñana,oreko vaʼerã erramiénta de iérro ha peteĩ lánsa,ha umi ñana ojehapypaite vaʼerã”.
8 David oreko vaʼekue mbohapy gerréro ipoderósova.+ Pe primero héra Joseb-Basébet pe tahkemonita, ha haʼe omoakã umi ótrope.+ Una vuéltape Joseb-Basébet ojuka vaʼekue 800 kuimbaʼépe ilánsape.
9 Pe segundo oĩva umi mbohapy gerréro ipoderósova apytépe héra Eleazar,+ haʼéva Dodó+ raʼy. Dodó túa katu Ahohí. Peteĩ vuéltape, umi filisteo oñembyaty oñorairõ hag̃ua Israel kóntrape. Upérõ David, Eleazar ha umi ótro mokõi gerréro ipoderósova odesafia chupekuéra. Umi ótro israelita katu osẽ odiparapa iñenemigokuéragui.
10 Péro Eleazar osegi ojuka umi filistéope ijyva kaneʼõ meve, ha ijyva hatãmba chugui ojagarra hague pe espáda.+ Jehová rupive umi israelita ogana upe gérra.+ Upe rire umi soldádo israelita ou ha orahapa umi omanóva kosakuéra.
11 Pe tercer gerréro ipoderósova haʼe hína Samá. Haʼe ningo Agué raʼy, pe hararita. Peteĩ vuéltape umi filisteo oñembyaty Lehípe, peteĩ kokue henyhẽva lentéhagui. Ha umi soldádo israelita odipara umi filisteo káusare.
12 Péro haʼe opyta kuri oñemboʼy upe kokue mbytépe odefende pe lugár, ha osegi ojuka umi filistéope. Péicha Jehová tuichaiterei omogana* ipuévlope.+
13 Ótra vuéltape, pe kosécha tiémpope, mbohapy kuimbaʼe oĩva umi 30 líder apytépe, oho David rendápe kuéva de Adulámpe.+ Upérõ umi filisteo oreko ikampaménto Refaím Ñúme.+
14 David okañy kuri pe lugár isegúro porãvape,+ ha peteĩ grúpo de soldádo filisteo oĩ Belénpe.
15 Upéi David osẽ heʼi: “Avyʼaitéta ningo la ikatúrõ haʼu pe y pe alhíve* oĩvagui siuda de Belén rokẽme”.
16 Ohendúvo upéva, umi mbohapy gerréro ipoderósova oho Belénpe. Haʼekuéra oike umi filisteo kampaméntope, oñorairõ hendivekuéra ha ogueru pe y Davídpe g̃uarã, pe alhíve oĩvagui Belén rokẽme. Péro David odesidi ndoʼumoʼãiha ha oñohẽ pe y Jehová renondépe.+
17 Ha David heʼi: “¡Jehová, che ni mbaʼevéicharõ ndaʼumoʼãi ko y! Pórke koʼã kuimbaʼe ojapeligra* ogueru hag̃ua chéve, ha la hayʼúramo haʼetéta umi kuimbaʼe ruguy la haʼúva”.+ Ha David ndoʼúinte pe y. Entéro koʼã mbaʼe ojapo vaʼekue umi mbohapy gerréro ipoderósova.
18 Ha oĩ vaʼekue ótro grúpo oĩháme mbohapy gerréro, umíva apytépe oĩ vaʼekue Abisái,+ ha haʼe omoakã chupekuéra. Abisái hína Joab ermáno, ha Zeruyá memby.+ Abisái ojuka kuri ilánsape 300 kuimbaʼépe. Umi hénte omombaʼe avei chupe omombaʼeháicha umi mbohapy gerréro ipoderosovévape.+
19 Abisái ivaleve vaʼekue umi mbohapy apytépe ha oreko vaʼekue umívape ikárgope. Péro ndohupytýi umi ótro mbohapy gerréro ipoderosovévape David oreko vaʼekue.
20 Benaya,+ Jehoiadá raʼy, haʼe vaʼekue peteĩ kuimbaʼe ipyʼaguasúva.* Cabzeélpe,+ haʼe heta vése ohechauka ivaletereiha. Por ehémplo ojuka mokõi Ariel raʼýpe, haʼe hína Moabgua. Ótra vuéltape katu Benaya oike peteĩ alhívepe ojuka hag̃ua peteĩ león.+ Upérõ roʼyeterei ha hoʼa voi niéve.
21 Benaya ojuka avei peteĩ egipcio tuichaitereívape. Pe egipcio oreko kuri ipópe peteĩ lánsa, ha Benaya katu oho oataka chupe peteĩ garróte reheve. Upéi oipeʼa pe egípciogui ilánsa ha ojuka chupe upévape.
22 Koʼã mbaʼe ojapo kuri Benaya, Jehoiadá raʼy. Umi hénte omombaʼe avei chupe omombaʼeháicha umi mbohapy gerréro ipoderosovévape David oreko vaʼekue.
23 Benaya ningo ivaleve vaʼekue umi 30 lídergui, péro ndohupytýi avei umi mbohapy gerréro ipoderosovévape. Upéicharõ jepe, David omoĩ ikárgope umi guárdia oñatendévape hese.
24 Asahel,+ haʼéva Joab ermáno, oĩ avei umi 30 líder apytépe. Koʼãva hína umi líder: Elhanán, haʼéva Dodó raʼy, oikóva Belénpe,+
25 Samá ha Elicá, haʼekuéra harodita,
26 Hélez,+ pe paltita, Irá,+ haʼéva hína Iqués raʼy, pe tecoíta,
27 Abí-Ézer+ pe anatotita,+ Mebunái pe husatita,
28 Zalmón pe ahohíta, Maharái+ pe netofatita,
29 Héleb, haʼéva pe netofatita Baaná raʼy, Ittái, haʼéva Ribái raʼy, Benjamín trivupegua, oikóva Guibeápe,
30 Benaya+ pe piratonita, Hidái, oikóva Gaas yrapekuérape,*+
31 Abí-Albón pe arbatita, Azmávet pe bar-humita,
32 Eliahbá pe saalbonita, Jasén raʼykuéra, Jonatán,
33 Samá pe hararita, Ahiam haʼéva hína Sarar raʼy, pe hararita,
34 Elifélet, haʼéva Ahasbái raʼy, haʼe hína peteĩ maacatita raʼy, Eliam, haʼéva Ahitofel+ raʼy pe guilonita,
35 Hezró pe carmelita, Paarái pe arbita,
36 Igal, Natán raʼy, oikóva Zobápe, Baní, haʼéva hína Gad trivupegua,
37 Zélec pe ammonita, Naharái pe beerotita, haʼe pe soldádo ogueraháva Joábpe hiʼarmakuéra,
38 Irá ha Gareb, haʼekuéra itrita,+
39 ha Urías+ pe hitita. Kompletoite oĩ hikuái 37.
Nóta
^ Térã: “osalva”.
^ Upéva hína yvykua oñembyatyhápe y.
^ Térã: “oapeligra hiʼálma”.
^ Hebréope: “peteĩ kuimbaʼe ipyʼaguasúva raʼy”.
