Amós 7:1-17
7 Ñandejára Jehová ogovernáva opa mbaʼe ohechauka vaʼekue chéve ko mbaʼe peteĩ visión rupive: ahecha haʼe ombou hague hetaiterei tuku oñepyrũ jave okakuaa umi kóga oñeñotỹ vaʼekue inviérnope.* Upéva ningo oñeñotỹ vaʼekue oñekytĩ rire pe rréi pastoty.
2 Umi tuku atýra hoʼu rire umi plantasión oĩva ko yvýpe, che haʼe: “¡Ñandejára Jehová regovernáva opa mbaʼe, eperdonamína chupekuéra!+ ¿Mbaʼéicha piko osegíta oikove* Jacob? Pórke haʼe ningo ikangy hína”.+
3 Upémarõ Jehová okambia* ko mbaʼe odesidíma vaʼekue.+ Ha Jehová heʼi: “Ndoikomoʼãi upéva”.
4 Upéi Ñandejára Jehová ogovernáva opa mbaʼe ohechauka chéve ko visión: ahecha Ñandejára Jehová ogovernáva opa mbaʼe okastigaseha ipuévlope tata rupive. Pe tata ohundi pe mar hypa peve ha avei ohapy peteĩ párte pe yvy.
5 Upémarõ che haʼe: “¡Ñandejára Jehová regovernáva opa mbaʼe, ejejokomína!+ ¿Mbaʼéicha piko osegíta oikove* Jacob? Pórke haʼe ningo ikangy hína”.+
6 Upémarõ Jehová okambia* ko mbaʼe odesidíma vaʼekue.+ Ha Ñandejára Jehová ogovernáva opa mbaʼe heʼi: “Ndoikomoʼãi avei upéva”.
7 Upéi haʼe ohechauka chéve ko visión: ahecha Jehová oñemboʼyha peteĩ murálla ykére, ha ojejapo hag̃ua upe murálla ojepuru kuri plomáda. Ha haʼe oreko ipópe peteĩ plomáda.
8 Upémarõ Jehová heʼi chéve: “¿Mbaʼépa rehecha Amós?”. Upépe che haʼe: “Peteĩ plomáda”. Ha Jehová heʼi chéve: “Aipurúta ko plomáda amedi hag̃ua che puévlo Israel. Che naperdonamoʼãvéima chupekuéra.+
9 Opytáta nandi vera umi lugár yvate orekóva Isaac+ ha oñehundíta umi lugár sagrádo orekóva Israel.+ Ha che ajúta Jeroboán* rogaygua kóntrape peteĩ espáda reheve”.+
10 Ha Amasías pe saserdóte Betelpegua+ heʼika rréi Jeroboán+ de Israélpe: “Amós opuʼã hína nderehe ñemiháme Israélpe.+ Umi hénte oikóva ko yvýpe ningo ndaikatúi ogueropuʼaka umi mbaʼe heʼíva Amós.+
11 Pórke Amós heʼi hína oikóvo: ‘Jeroboánpe ojejukáta espádape, ha umi hénte oikóva Israélpe katuete ojegueraháta prisionéroramo ótro tetãme’”.+
12 Upémarõ Amasías heʼi Amóspe: “Nde kuimbaʼe rehecháva visión, tereho ekañy Judápe, ha upépe epyta eiko ha ekonsegi ne rembiʼurã,* ha upépe ikatu reprofetisa.+
13 Péro Betélpe ndereprofetisavéima vaʼerã,+ pórke upéva hína pe rréi lugár sagrádo+ ha avei pe rréi róga”.
14 Upémarõ Amós heʼi chupe: “Che ningo ndahaʼéi vaʼekue proféta ni proféta raʼy, síno che añangareko vaʼekue ovecháre+ ha avei añangareko vaʼekue umi igotýre.*
15 Péro Jehová cherenói vaʼekue añangarekohágui umi ovechakuérare, ha Jehová heʼi chéve: ‘Tereho eprofetisa che puévlo Israélpe’.+
16 Ha koʼág̃a ehendu mbaʼépa heʼi Jehová: ‘Nde ningo ere: “Ani reprofetisa Israel kóntrape,+ ha ani repredika+ Isaac rogaygua kóntrape”.
17 Upévare péicha heʼi Jehová: “Ne rembirekógui oikóta peteĩ prostitúta pe siudápe, ha umi nde raʼy ha nde rajykuérape ojejukáta espádape. Oipurúta hikuái piolín omedi hag̃ua nde yvy ha orrepartíta, ha nde voi remanóta umi extranhéro yvýpe, ha Israélpe katuete ojegueraháta prisionéroramo ótro tetãme”’”.+
Nóta
^ Upéva hína éntre enero ha febrero.
^ Hebréope: “opuʼã”.
^ Térã: “ombyasy”.
^ Hebréope: “opuʼã”.
^ Térã: “ombyasy”.
^ Hebréope: “heʼu pan”.
^ Térã: “aikutu vaʼekue umi sikomoroʼa”.