Génesis 2:1-25
2 Péicha pe yvága ha yvy, ha entéro mbaʼe oĩva pype* ojejapopa.+
2 Ha oñemohuʼãvo pe sexto día, Ñandejára okompleta opa mbaʼe ojapóva, ha pe séptimo díape oñepyrũ opytuʼu otermina rupi hembiapo.+
3 Ha Ñandejára ovendesi pe séptimo día ha heʼi sagradoha,* pórke ko díape haʼe opytuʼu hína okompletáma rupi opa mbaʼe odesidi vaʼekue ojapo.
4 Kóva hína peteĩ istória omombeʼúva mbaʼéichapa ojejapo vaʼekue pe yvága ha yvy, pe tiémpo ojejapórõ guare, pe día Ñandejára Jehová* ojapórõ guare pe yvága ha yvy.+
5 Upérõ guare ndaipóri vaʼekue mbaʼeveichagua plánta ni yvyra raʼy heñóiva ko yvýpe, pórke upérõ Ñandejára Jehová ndohejái gueteri oky, ha ndaipóri gueteri avei yvypóra ombaʼapo vaʼerã ko yvýre.
6 Péro ko yvýgui opuʼã serrasón ikatu hag̃uáicha ojerregapaite ko yvy.
7 Ha Ñandejára Jehová oñepyrũ ojapo pe kuimbaʼépe yvýgui+ ha oipeju itĩnguápe ha omoingove chupe,+ ha péicha pe kuimbaʼégui oiko peteĩ persóna* oikovéva.+
8 Ñandejára Jehová ojapo avei peteĩ hardín Edénpe,+ éste gotyo. Ha upépe omoĩ pe kuimbaʼe haʼe ojapo vaʼekue.+
9 Upe rire Ñandejára Jehová omoheñói opaichagua yvyramáta hiʼa porãva ha ikatúva ojeʼu. Avei omoĩ pe hardín mbytépe pe yvyramáta jeikove rehegua*+ ha pe yvyramáta opermitíva ojekuaa* mbaʼépa iporã ha mbaʼépa ivai.+
10 Edénpe oñepyrũ vaʼekue peteĩ rrío orregáva pe hardín, ha upe rríogui osẽ jey 4 rrío.*
11 Pe primero héra Pisón, ko rrío ohasa Havilá território pukukue. Ha Havilápe oĩ vaʼekue óro.
12 Ha pe óro upepegua iporã vaʼekue. Upépe oĩ avei pe vedélio* ha umi ita ónise.
13 Pe segundo rrío héra Guihon, ko rrío ohasa Cus território pukukue.
14 Pe tercer rrío katu héra Tigris,*+ upéva oho Asiria+ éste gotyo. Ha pe cuarto rrío héra Éufrates.+
15 Ñandejára Jehová omoĩ pe kuimbaʼe pe hardín de Edénpe ombaʼapo ha oñatende hag̃ua hese.+
16 Ha Ñandejára Jehová heʼi avei pe kuimbaʼépe: “Entéro yvyramáta hiʼávagui oĩva pe hardínpe ikatu reʼu reʼuseha peve.+
17 Péro ndereʼúi vaʼerã pe yva orekóva pe yvyramáta opermitíva ojekuaa* mbaʼépa iporã ha mbaʼépa ivai, pórke reʼuha díape katuete remanóta”.+
18 Upéi Ñandejára Jehová heʼi: “Naiporãi pe kuimbaʼe oiko haʼeño, upévare ajapóta chupe iñirũrã+ oipytyvõtava chupe”.
19 Ñandejára Jehová ningo ojapo hína kuri pe yvýgui opaichagua animál hesaitéva, ha entéro guyra ha vícho ovevéva yvágare. Upe rire Ñandejára ogueraha umi animál pe kuimbaʼépe ohecha hag̃ua mbaʼéichapa ombohérata, ha pe kuimbaʼe ombohéra rire káda animálpe,* upéicha oñehenói chupekuéra.+
20 Péicha pe kuimbaʼe omboherapaite entéro animál imánsova ha umi animál hesaitéva oikóva ko yvy apére, avei umi guyra ha vícho ovevéva. Péro pe kuimbaʼe katu ndorekói iñirũrã oipytyvõ vaʼerã chupe.
21 Upémarõ Ñandejára Jehová omongete pe kuimbaʼépe. Ha oke aja pe kuimbaʼe, Ñandejára oipeʼa chugui peteĩ ikostílla ha upe rire omboty jey chupe hendague.
22 Ha Ñandejára Jehová ojapo pe kuimbaʼe kostíllagui peteĩ kuña. Upéi ogueraha pe kuña pe kuimbaʼe rendápe.+
23 Upémarõ haʼe heʼi:
“Hasypeve rotopa che pehengue,pórke nde ningo che kangue ha che roʼógui rejejapo vaʼekue.
Ndéve ojeʼéta Kuña,pórke kuimbaʼégui rejejapo vaʼekue”.+
24 Upévare pe kuimbaʼe ohejáta itúa ha isýpe, ha opytáta* hembirekóndi, ha mokõivégui oikóta peteĩntema.+
25 Ha pe kuimbaʼe ha hembireko oiko opío,+ upéicharamo jepe haʼekuéra notĩri.
Nóta
^ Hebréope: “ha kompletoite ijehérsito”.
^ Térã: “omboyke imbaʼerã”.
^ Koʼápe primera ves oñemoĩ Ñandejára réra יהוה (YHWH), péva rupive oñediferensia chupe umi ótro diósgui. Ehecha Info. A4.
^ Térã: “álma”. Hebréope: “néfesch”, heʼiséva “peteĩ persóna térã animál orrespiráva”.
^ Hebréope: “árvol de la vída”.
^ Hebréope: “árvol del konosimiénto”.
^ Hebréope: “upe rríogui osẽ 4 vráso”.
^ Péva peteĩ yvyramáta aysy hyakuã asýva ojogua léntova mírrape.
^ Hebréope: “Hidequel”.
^ Hebréope: “árvol del konosimiénto”.
^ Térã: “álmape”.
^ Térã: “ojoajúta”. Hebréope upe palávra ojepuru oñemboja jave ojuehe mokõi mbaʼe peteĩ pegaméntope.
