Isaías 26:1-21
26 Upe díape ojepurahéita ko músika+ Judápe:+
“Ore siuda imbarete porã.+
Ñandejára osalva ore siudápe, oprotehe chupe umi rrámpa ha umi murállaicha.+
2 Peavri pene rokẽ+ oike hag̃ua pe tetã ihústova,upe tetã ningo iñeʼẽrendu Ñandejárape.
3 Ñandejára, nde ningo reprotehéta umi ojeroviávape nderehe ipyʼaite guive,nde reipytyvõta chupekuéra oiko hag̃ua pyʼaguapýpe,+pórke haʼekuéra okonfia nderehe.+
4 Pejeroviákena Jehová rehe opa ára g̃uarã,+Jehová* ningo peteĩ Ita Guasu,+ Jehová okuida ñanderehe opa ára g̃uarã.
5 Ñandejára ningo omotĩ umi oñemombaʼeguasúvape,pe siuda ijorgullósovape.*
Haʼe oity ha omona chupekuéra yvýre,opyta ojepysopa hikuái pe yvýpe.
6 Oñepyrũmbáta upe tetã oñemombaʼeguasúvare,umi oiko asýva ha umi imboriahúva opyrũmbáta hesekuéra”.
7 Ñandejára, nde ningo ndehústo,nde rembojoja asy umi ihústova rape,upévare haʼekuéra ojapo iporãva.
8 Jehová, ore rojapo umi mbaʼe nde eréva iporãha,ha rojerovia nderehe.
Ore romombaʼeterei nde réra, ha hiʼãiterei oréve rohecha entéro imanduʼaha hese.
9 Ñandejára, pyharekue che korasõite guive añemoag̃uise nderehe,che pyʼaite guive roheka kontinuadoite.+
Nde rehusgávo ko yvy,umi hénte oikóva ko yvy ape ári oaprende mbaʼépa iporã.+
10 Oĩramo jepe imbaʼeporãva pe iñañávandi,haʼe noaprendemoʼãi iporãva.+
Oikóramo jepe pe siuda ojejapohápe iporãva haʼe osegíta iñaña.+
Pe iñañáva ndohechakuaamoʼãi mbaʼeichaitépa Jehová oreko podér ha autorida.+
11 Jehová, nde remopuʼã nde po umi iñañáva kóntrape, péro haʼekuéra ndohechái.+
Péro upéi haʼekuéra ohechakuaáta mbaʼeichaitépa nerakateʼỹ nde puévlore ha oñemotĩta hikuái.
Nde remboúta tata hiʼarikuéra ha oñehundipáta hikuái.
12 Jehová, nde ningo orepytyvõ roiko hag̃ua pyʼaguapýpe,+nde oremombarete rupínteikatu rojapo heta mbaʼe iporãva.
13 Jehová ore Jára, ore roguereko vaʼekue ótro governánte omandáva orerehe,+péro ore nde réra añoite rombotuicha.+
14 Umi governánte koʼág̃a omanóma, ha ndaikatumoʼãvéima oikove jey.
Haʼekuéra ndaikatúi ojapo mbaʼeve, ndaikatumoʼãi opuʼã jey.+
Pórke nde rehusga ha rehundi chupekuéra,ani hag̃ua avave imanduʼa hesekuéra.
15 Jehová, nde ningo remboheta hetave nde puévlo,koʼág̃a nde puévlo hetaiteve.
Péicha rehechauka ndaiporiha ndeichagua,+nde rembotuichave ore yvy, koʼág̃a tuichaiteve ore território.+
16 Jehová, nde puévlo ohasa asy jave oñemoag̃ui jey nderehe.
Nde rekorrehírõ guare chupekuéra, haʼekuéra ipyʼaite guive oñemboʼe ndéve ha omombeʼupaite la oñandúva.+
17 Ore rohasa asy ha roñelamenta,peteĩ kuña ohasa asyháicha imemby hag̃ua.
Jehová, nde orekorrehi rupi péicha rohasa asy.
18 Rojogua kuri peteĩ kuña hyeguasúvape, imemby potávaicha rosufri,péro mbaʼevete nonaséi.
Ndorosalvái ningo avavépe ko yvy ape ári,ndoroguerúi ni peteĩ mitã oikove hag̃ua ko yvy ape ári.
19 “Umi che puévlo apytégui omano vaʼekue oikove jeýta,umi teʼongue* chembaʼéva opuʼã jeýta.+
¡Peẽ peiméva pe yvýpe,+pepáykena ha pesapukái vyʼápe!,
pórke nde ysapy ojoguáta pe ysapy hoʼávape pyharevete,pe yvy ontregáta umi omanóvape ikatu hag̃uáicha oikove jey.
20 Néike che puévlo,tapeho peike pende kotýpe,pemboty porã pene rokẽ.+
Pekañy sapyʼaite ohasa peve pe ára pochy.+
21 Che hína Jehová, ha aju pe lugár aikohágui,aju ahusga hag̃ua umi héntepe hembiapo vaikuére.
Ko yvy ape ári ndaikatumoʼãvéima oñemokañy umi hénte ojejuka vaʼekuépe,enterove ohecháta umi hénte ruguy oñeñohẽ vaʼekue”.
Nóta
^ Hebréope: “Jah”. Péicha oñemombyky Jehová réra.
^ Hebréope: “umi oikóvape yvate, pe siuda oĩvape yvatete”.
^ Hebréope: “peteĩ teʼongue”.
