Isaías 36:1-22
36 Ha 14 áño ogoverna haguépe rréi Ezequías, pe rréi de Asiria+ Senaquerib oho ojagarrapaite umi siuda imurallapáva oĩva Judápe.+
2 Upéi pe rréi de Asiria omondo Lakís+ guive pe rabsaquépe*+ ha peteĩ ehérsito tuichaitereívape rréi Ezequías rendápe Jerusalénpe. Ha oho oñemoĩ hikuái pe kanál ohasahárupi pe y+ oúva pe piléta oĩvagui yvate gotyo. Upépe oĩ hína pe tape ohóva pe ojaojohéiva ñúme.+
3 Upémarõ koʼã mbohapy kuimbaʼe osẽ hendápe: Eliaquim,+ haʼéva Hilquías raʼy ha oñenkargáva pe rréi palásiore, Sebná,+ pe rréi sekretário, ha Joá pe oanotáva umi mbaʼe oikóva, haʼéva hína Asaf raʼy.
4 Upéi pe rabsaqué heʼi chupekuéra: “Pejemína Ezequíaspe: ‘Pe rréi ipoderósova, pe rréi de Asiria heʼika ndéve: “¿Mbaʼe piko la nembopyʼaguasuetéva?+
5 Ndéngo eiko ere: ‘Areko peteĩ plan ha podér añorairõ hag̃ua’. Péro vyrorei la eréva. ¿Mávare piko la rejerovia ajeve reñanima repuʼã che kóntrape?+
6 ¡Emañamína! Ndéngo rejerovia Egíptore, haʼe ningo peteĩ takuarílla opẽ mbotáva, ha peteĩ kuimbaʼe oñakaramáramo hese ojejoko hag̃ua, oikutúta chupe ha ovandeáta ipóre. Péicha hína faraón pe rréi de Egipto umi ojeroviávape g̃uarã hese.+
7 Ha eréramo chéve: ‘Ore rojerovia Jehová ore Járare’. ¿Ndahaʼéi piko chugui la Ezequías oipeʼapa vaʼekue umi altár ha umi lugár yvate ojepurúva ojeadora hag̃ua chupe?+ Ha heʼi Judá ha Jerusalénpe: ‘Pe altár oĩva Jerusalénpe, upéva renondépe peñesũ vaʼerã’”’.+
8 Upévare, pejodesafia che ruvicha pe rréi de Asiria+ ndive: che ameʼẽta ndéve 2.000 kavaju, jahecha reguerekópa umi kuimbaʼe hiʼári g̃uarã.
9 Egipto omeʼẽramo jepe ndéve heta kárro de gérra ha kuimbaʼe kavaju arigua, ¿nde piko repensa reganataha pe governadór ikangyvévape jepe oservíva che ruvichápe?
10 Ha avei, ¿che piko ikatúta kuri aju ahundi hag̃ua ko lugár Jehová ndohejáirire chéve? Jehová voi ningo heʼi chéve: ‘Tereho katu ko país kóntrape ha ehundi chupekuéra’”.
11 Upépe Eliaquim, Sebná+ ha Joá heʼi pe rabsaquépe:+ “Eñeʼẽna oréve idióma araméope,*+ pórke ore rontende upéva. Ani reñeʼẽ judiokuéra idiómape pórke ontendepáta umi hénte oĩva pe murálla ári”.+
12 Péro pe rabsaqué heʼi chupekuéra: “¿Peẽ piko peimoʼã che ruvicha chembou hague haʼe hag̃ua koʼã mbaʼe peẽme ha pende ruvichápente? Ko mensáhe ningo haʼe avei umi kuimbaʼe oguapývape g̃uarã pe murálla ári. Haʼekuéra ningo peẽicha avei hoʼúta hína hekaka ha ity”.
13 Upéi pe rabsaqué oñemboʼy ha hatã heʼi umi judío idiómape:+ “Pehendu mbaʼépa heʼi pe rréi ipoderósova, pe rréi de Asiria.+
14 Péicha heʼi pe rréi: ‘Aníke peheja Ezequías penembotavy, pórke haʼe ndaikatumoʼãi pendesalva.+
15 Ha aníke Ezequías káusare pejerovia Jehováre,+ heʼígui peẽme: “Jehová katuete ñandesalváta, ha ko siuda noñentregamoʼãi pe rréi de Asiria pópe”.
16 Aníkena pehendu Ezequíaspe, pórke pe rréi de Asiria heʼi kóicha: “Peñentrega ha peiko porã chendive,* ha káda uno peẽ peʼúta parrál pende parraltýgui ha ígo pende ígo mátagui, ha peyʼúta pende alhívegui.*
17 Péicha peikóta che aju peve ha pogueraha peteĩ yvy ojoguávape ko pende yvýpe,+ peteĩ yvy oprodusívape trígo, seváda ha parrál pejapo hag̃ua pan ha víno pyahu.
18 Aníkena penembotavy Ezequías heʼívo: ‘Jehová ñandesalváta’. ¿Oĩ piko raʼe peteĩ dios umi ótra nasiongua osalva vaʼekue ipaíspe pe rréi de Asiria poguýgui?+
19 ¿Moõ piko oĩ umi dios de Hamat ha Arpad?+ ¿Moõ piko oĩ umi dios de Sefarvaim?+ ¿Haʼekuéra piko osalva raʼe Samáriape che poguýgui?+
20 ¿Máva piko umi dios ótra nasiongua apytégui osalva vaʼekue che poguýgui inasiónpe, ajeve pepensa Jehová osalvataha Jerusalénpe che poguýgui?”’”.+
21 Péro umi hénte okirirĩnte chugui ha ndeʼíri chupe mbaʼevete, pórke pe rréi heʼi kuri chupekuéra: “Aníke pekontesta chupe”.+
22 Péro Eliaquim haʼéva Hilquías raʼy, pe oñenkargáva pe rréi palásiore, avei Sebná+ pe rréi sekretário, ha Joá pe oanotáva umi mbaʼe oikóva, haʼéva Asaf raʼy, omondoro ijao ha oho hikuái Ezequías rendápe, ha omombeʼupaite chupe umi mbaʼe heʼi vaʼekue pe rabsaqué.
Nóta
^ Térã: “pe kopéro prinsipálpe”.
^ Térã: “siríacope”.
^ Hebréope: “Pejapo chendive peteĩ vendisión ha pesẽ che rendápe”.
^ Upéva hína yvykua oñembyatyhápe y.
