Isaías 39:1-8
-
Mensahéro oúva Babilóniagui (1-8).
39 Upe tiémpope, pe rréi de Babilonia Merodac-Baladán, haʼéva Baladán raʼy, omondo kárta ha peteĩ rregálo Ezequíaspe,+ pórke oikuaa kuri haʼe hasykatu hague ha okuera jeyha.+
2 Ha Ezequías vyʼápe orresivi umi ou vaʼekuépe. Haʼe ohechauka chupekuéra pe óga oĩháme itesorokuéra:+ pláta, óro, umi aséite perfumádo ha umi ótro aséite iporãva, umi armakuéra kompletoite ha entéro mbaʼe oĩva itesoreríape. Ezequías ohechauka chupekuéra opa mbaʼe orekóva ipalásiope ha igoviérno poguýpe.
3 Upe rire proféta Isaías oike rréi Ezequías rendápe ha oporandu chupe: “¿Mbaʼéiko heʼi raʼe umi kuimbaʼe ha moõgui piko ou?”. Upépe Ezequías heʼi chupe: “Mombyrýgui ou hikuái, ou Babilóniagui”.+
4 Upéi oporandu jey chupe: “¿Mbaʼe piko oike ohecha hikuái nde palásiope?”. Ezequías heʼi: “Ohecha hikuái entéro mbaʼe oĩva che palásiope. Ahechauka chupekuéra entéro mbaʼe oĩva che tesoreríape”.
5 Upépe Isaías heʼi Ezequíaspe: “Ehendu mbaʼépa heʼi Jehová, umi ehérsito yvagapegua ruvicha:
6 ‘Og̃uahẽta peteĩ día, ha entéro mbaʼe oĩva nde palásiope, ha entéro mbaʼe umi nde tuakuéra ypykue ombyaty vaʼekue koestedía peve ojegueraháta Babilóniape. Mbaʼevete ndopytamoʼãi’,+ péicha heʼi Jehová.+
7 ‘Ha umi nde raʼykuéra onasétava apytégui oĩta ojegueraháva prisionéroramo, ha oikóta chuguikuéra ofisiál pe rréi de Babilonia palásiope’”.+
8 Upépe Ezequías heʼi Isaíaspe: “Opa mbaʼe Jehová heʼíva ningo oĩ porã”. Upéi heʼive: “Pórke che aikove aja oĩta pyʼaguapy ha ojeikóta kyhyjeʼỹme”.+
