Isaías 66:1-24
66 Jehová heʼi:
“Pe yvága ningo che tróno, ha pe yvy katu che pyrenda.+
¿Mbaʼeichagua óga piko peẽ pepensa ikatuha pemopuʼã chéve g̃uarã?+
¿Ha moõ piko oĩ pe lugár ikatuhápe aiko?”.+
2 Jehová heʼive: “Che voi ningo ajapo vaʼekue entéro koʼã mbaʼe.
Ha upéicha rupi entéro mbaʼe oexisti.+
La che aguerohorýva ningo koʼãichagua persóna:
pe iñumíldevape, pe ikorasõite guive oñembyasývape ha orrespetáva ipyʼaite guive che ñeʼẽ.*+
3 Pe ojukáva peteĩ tóro ojogua pe ojukávape peteĩ kuimbaʼépe,+pe omeʼẽva sakrifísioramo peteĩ ovecha, ojogua pe omopẽvape peteĩ jaguápe ijajúra.+
Pe omeʼẽva ofréndaramo peteĩ rregálo, ojogua pe omeʼẽvape kure ruguykue.+
Pe omeʼẽva ofréndaramo olívano,+ ojogua pe omombaʼeguasúvape peteĩ taʼangápe.+
Haʼekuéra odesidi ojapo oñantohávante chupekuéra,ha ovyʼa voi ojapóvo umi mbaʼe vai ñanembojeguarúva.
4 Upévare, che aiporavóta umi kastígo chupekuéra g̃uarã,+ha amboúta hiʼarikuéra umi mbaʼe omongyhyjevéva chupekuéra.
Pórke che ahenóirõ guare, avave nokontestái,ha añeʼẽrõ guare, avave nopenái cherehe.+
Haʼekuéra osegi ojapo umi mbaʼe ivaíva che renondépe,osegi ojapo umi mbaʼe ndachegustáiva”.+
5 Peẽ perrespetáva pende pyʼaite guive* Jehová ñeʼẽ, pehendu la haʼe heʼíva peẽme:
“Umi pene ermáno ndochaʼéiva penderehe, ha penemboykéva che réra káusare, oiko heʼi guaʼu: ‘Toñemombaʼeguasu Jehovápe’.+
Péro che ajechaukáta peẽme ha pevyʼaitereíta,ha amo ipahápe, haʼekuéra la oñemotĩtava”.+
6 Oñehendu peteĩ tyapu guasu oúva pe siudágui, pe témplogui,Jehová omeʼẽ iñenemigokuérape la omereséva hikuái, ha upe tyapu oñehendu hína.
7 Siuda de Sion hasyete mboyve imemby hag̃ua, ja imembýma,+haʼe hasyete mboyve, ja onaséma imembykuimbaʼe.
8 ¿Máva piko ohendúmava oikoha koʼã mbaʼe?
¿Arakaʼe piko ojehecháva koʼã mbaʼe?
¿Peteĩ siuda piko ikatu onase peteĩ díapente?
¿Ikatu piko peteĩ tetã onase sapyʼaitépe?
Péro Sion oñepyrũvo hasy imemby hag̃ua, ja onaséma imembykuéra.
9 Jehová heʼi: “¿Ahejáta piko pe kuña reiete hasy imemby hag̃ua upéi ajokótaramo ani hag̃ua osẽ imemby?”.
Ñandejára heʼi: “¿Maʼerã piko che aipytyvõta pe kuñáme, upéi ajokótaramo pe mitã ani hag̃ua onase?”.
10 Enterove peẽ pehayhúva Jerusalénpe,+ pevyʼákena Jerusalén reheve, pendepyʼarorýkena heseve.+
Peẽ peñelamentáva ko siudáre, pevyʼákena pende pyʼaite guive heseve.
11 Peteĩ sy omokambuháicha imembyʼípe hyg̃uatã meve, péicha Jerusalén omeʼẽmbaitéta peẽme peikotevẽva.
Mbaʼevete ndofaltamoʼãi peẽme, ha pevyʼaitereíta, pórke Jerusalén orresivíta heta rrikésa.
12 Jehová heʼi:
“Pe siuda ári ahykuavóta peteĩ rríoicha pe pyʼaguapy,+umi korrentáda hatã osyryháicha, péicha umi tetã rrikésa oúta peẽme.+
Peteĩ sy omokambuháicha imembýpe, péicha oñeñangarekóta penderehe, jyva ári pejegueraháta,opopoʼiháicha umi mitã isy rapypaʼũme, péicha peẽ peikóta.
13 Peteĩ sy okonsolaháicha imembýpe,péicha che asegíta pokonsola.+
Pevyʼáta pehechávo mbaʼéichapa oĩ Jerusalén.+
14 Peẽ pehecháta koʼã mbaʼe ha pende pyʼaite guive pevyʼáta.
Pene kangue imbarete jeýta, haʼetéta voi umi plánta ipyahu asýva.
Jehová ohechaukáta isiervokuérape ipoderosoha,péro okondenáta iñenemigokuérape”.+
15 “Jehová oúta peteĩ tatáicha,+hatãiterei oúta ikarrokuéra reheve, peteĩ yvytu atãicha.+
Ñandejára ipochyeterei ha oúta oñevenga hag̃ua.
Haʼe oúta okastiga hag̃ua tatápe iñenemigokuérape.+
16 Jehová okastigáta chupekuéra tatápe,oúta ijespádare ohusga hag̃ua umi héntepe.
Hetaitereíta umi hénte Jehová ohundíva.
17 Umi hénte ojepreparáva ha oñemopotĩva oho hag̃ua oadora ótro dióspe umi hardínpe,* oñehundíta.+ Haʼekuéra oho upépe hoʼu kure roʼo,+ anguja+ ha umi tembiʼu ñanembojeguarúva, péro oñondivepa omanóta hikuái”, péicha heʼi Jehová.
18 “Che aikuaa la haʼekuéra opensáva ha la ojapóva. Upévare ambyatýta umi hénte opa tetãygua ha oñeʼẽva diferénte idióma. Haʼekuéra oúta ha ohecháta che podér”.
19 “Che amoĩta peteĩ señál umi puévlo mbytépe, ha che puévlo apytégui amondóta umi tetãre umi ojesalva vaʼekuépe. Amondóta chupekuéra Tarsis,+ Pul ha Lúdpe,+ umi hénte upepegua oipurukuaaiterei árko ha flécha. Amondóta avei umi ísla opytávape mombyry, hérava Tubal ha Javán.+ Ha umi amondo vaʼekue oikuaaukáta che podér umi tetã ndachekuaáivape ha núnka ndohecháiva che ajapóva che podér rupive.+
20 Haʼekuéra oguerúta pene ermanokuéra oĩvape opa tetãrupi.+ Oguerúta chupekuéra rregáloramo Jehovápe g̃uarã. Ojeguerúta chupekuéra kavaju ári, karrósa, karrítope, mburika ári ha avei umi kaméllo iñakuãva ári. Oúta hikuái Jerusalénpe, che montáña sagrádape. Ojoguáta hikuái umi hénte Israelgua oúvape Jehová rógape ha oguerúva chupe rregálo peteĩ mbaʼyru potĩ asývape”, péicha heʼi Jehová.
21 Jehová osegi heʼi: “Ha unos kuántope amoĩta oservi hag̃ua de saserdóte ha avei oĩta oservíva de levita”.
22 Jehová avei heʼi: “Umi yvága pyahu ha pe yvy pyahu+ ajapóva hína opytáta pára siémpre, péicha avei pene família ha pende réra opytáta opa árare”.+
23 Jehová heʼi: “Entéro umi hénte oúta oñesũ che renondépe,*
haʼekuéra osegíta ojapo upéva káda mes ha káda semána.*+
24 Ha haʼekuéra osẽta ha ohecháta umi che enemigokuéra reʼongue,ha umi yso oĩva hiʼarikuéra nomanomoʼãi,ha pe tata oĩháme umi teʼongue ndoguemoʼãi,+ha umi teʼongue ombojeguarúta entéro umi héntepe”.
Nóta
^ Hebréope: “oryrýiva che ñeʼẽre”.
^ Hebréope: “peryrýiva”.
^ Hebréope: “osegívo pe oĩvape pe hardín mbytépe”.
^ Térã: “cheadora”.
^ Hebréope: “káda jasy raʼy ha káda sábado”.
