Jeremías 43:1-13
43 Ha Jeremías omombeʼu enterove umi héntepe opa mbaʼe Ijára Jehová heʼi vaʼekue, entéro mbaʼe heʼika vaʼekue chupekuéra Ijára Jehová haʼe rupive. Upépe
2 Azarías, haʼéva Hosaya raʼy, Johanán,+ haʼéva Caréah raʼy, ha enterove umi kuimbaʼe oñemombaʼeguasúva heʼi Jeremíaspe: “¡Upe eréva japu hína! Ore Jára Jehová nanemboúi ere hag̃ua oréve: ‘Ani peho Egíptope peiko hag̃ua upépe’.
3 Síno Baruc,+ haʼéva Nerías raʼy, nemboliga ere hag̃ua péicha ore kóntrape, pórke haʼe oipota ropyta umi caldeo poguýpe, orejuka hag̃ua hikuái térã oregueraha hag̃ua prisionéroramo Babilóniape”.+
4 Upéicha Johanán, haʼéva Caréah raʼy, enterove umi kuimbaʼe omoakãva pe ehérsito ha kompletoite umi hénte, ndojapói Jehová heʼi vaʼekue ha ndopytái Judá territóriope.
5 Upéva rangue Johanán, haʼéva Caréah raʼy, ha enterove umi kuimbaʼe omoakãva pe ehérsito, ogueraha hendivekuéra umi Judagua hemby vaʼekue, umíva hína umi ou jey vaʼekue umi nasión oñemosarambi haguégui chupekuéra oiko hag̃ua Judá territóriope.+
6 Ogueraha hendivekuéra umi kuimbaʼe, kuña, umi mitã, pe rréi rajykuéra, ha avei enterove umi hénte* pe guardiakuéra kapitán Nebuzaradán+ oheja vaʼekue Guedalías+ ndive, haʼe hína Ahicam+ raʼy ha Safán+ niéto. Ha ogueraha avei hikuái proféta Jeremíaspe ha Barúcpe, haʼéva Nerías raʼy.
7 Ha oike hikuái Egipto territóriope, pórke ndojapói Jehová heʼíva, ha oho Tahpanhés+ peve.
8 Upéi Jehová oñeʼẽ Jeremíaspe Tahpanhéspe, ha heʼi chupe:
9 “Ejagarra mokõi ita guasu umi kuimbaʼe judío rovake ha eñomi pe ñaiʼũ kuápe, oĩva hína pe tape yvatépe ojejapo vaʼekue ladríllogui. Upéva oĩ hína Tahpanhéspe, faraón palásio entráda renondépe.
10 Ha ere chupekuéra: ‘Péicha heʼi Israel Jára Jehová, umi ehérsito yvagapegua ruvicha: “Koʼápe amondo hína che siérvo Nabucodonosórpe,* pe rréi de Babilonia,+ ha amoĩta itróno koʼã ita añomi vaʼekue ári, ha haʼe oipysóta hiʼarikuéra hóga kárpa ojajaipáva.+
11 Haʼe oúta oataka Egipto território.+ Ha oĩta hína pende apytépe omanótava mbaʼasýgui, oĩta ohóva prisionéroramo, ha oĩta ojejukáva espádape.+
12 Ha ahapýta umi dios de Egipto templokuéra*+ ha haʼe ogueraháta prisionéroramo umi idioskuérape. Peteĩ pastór sapyʼaitépe omondeháicha ijao, péicha avei Nabucodonosor sapyʼaitépe ojagarráta Egipto kompletoite, ha ohóta ojehuʼỹre chupe mbaʼeve.*
13 Haʼe omonguʼíta Bet-Semes* kolumnakuéra* oĩva Egíptope, ha ohapýta umi dios de Egipto templokuéra”’”.*
Nóta
^ Térã: “enterove álma”.
^ Hebréope: “Nabucodorosor”. Péicha avei ojeskrivi héra.
^ Hebréope: “ogakuéra”.
^ Hebréope: “ohóta pyʼaguapýpe”.
^ Térã: “Kuarahy Róga (Témplo)”, upéva hína Heliópolis.
^ Térã: “pilár, ovelísko”.
^ Hebréope: “ogakuéra”.
