Jeremías 50:1-46
50 Péicha heʼi Jehová Babilonia rehe,+ umi caldeokuéra yvy rehe, proféta Jeremías rupive:
2 “Pemombeʼu ha peikuaauka umi tetãnguérape.
Pemopuʼã peteĩ señál* ha pemombeʼu pe notísia.
¡Ani pemokañy mbaʼeve!
Ha peje: ‘Ojejagarráma Babilóniape.+
Pe dios Bel oñemotĩ.+
Pe dios Merodac okyhyjeterei.
Umi dios de Babilonia raʼangakuéra oñemotĩ.
Umi idiós puerkésa* okyhyjeterei’.
3 Pórke peteĩ tetã ou ikóntrape nórteguio.+
Ha ojapóta ijyvýgui peteĩ lugár ojekyhyjeha,avave ndoikomoʼãi pype.
Yvypóra ha umi animalkuéra ohopáma upégui,ndaiporivéima”.
4 Jehová heʼi: “Umi díape ha upe tiémpope Israel puévlo ha Judá puévlo oúta oñondive.+ Hasẽta hikuái oukuévo+ ha ohekáta oñondive Ijára Jehovápe.+
5 Haʼekuéra oporandúta pe tape ohóvare Siónpe, omañáta hikuái upe gotyo+ ha heʼíta: ‘Peju ñamoirũ Jehovápe jajapóvo peteĩ kompromíso etérno ndopytamoʼãiva tesaráipe’.+
6 Che puévlogui oiko peteĩ ovecha aty okañy vaʼekue.+ Umi ipastorkuéra voi odesatina chupekuéra.+ Oraha odesatina chupekuéra umi montáñare, ha omongorre rei chupekuéra peteĩ montáñagui ótro sérrope. Umi ovecha hesaráima moõpa opyta pe lugár opytuʼuha.
7 Entéro umi otopáva koʼã ovecháre ojuka ha hoʼu chupekuéra,+ ha iñenemigokuéra heʼi: ‘Ndahaʼéi ñande kúlpa, pórke haʼekuéra voi opeka Jehová kóntrape. Jehovágui ou pe hustísia ha haʼe omeʼẽ vaʼekue esperánsa ituakuéra ypykuépe, ikóntrape la opeka hikuái’”.
8 “Pesẽke Babilóniagui,pesẽ umi caldeokuéra yvýgui,+ha toiko pendehegui umi animál ohóva umi ovecha ha kavara atýra renonderã.
9 Pórke ápe amopuʼã ha agueru hína Babilonia kóntrapeumi tetãnguéra aty ndetuicháva oúva nórteguio.+
Oúta hikuái preparádo oñorairõ hag̃ua ikóntrape,ha ojejagarráta chupe.
Iflechakuéra ojogua peteĩ gerréro fléchape,ojukapáva peteĩ túagui itaʼyrakuéra,+ha ndojavýi hikuái.
10 Caldea ojesakeapaitéta.+
Entéro umi osakeáva chupe, opytáta ovyʼa umi mbaʼe ogueraha vaʼekuére”,+ heʼi Jehová.
11 “Pórke peẽ pesegi kuri pevyʼa+ ha pekontinua pesapukái vyʼáguipesakeárõ guare che erénsia.+
Pórke peẽ pesegi pepopo peteĩ vakíllaicha pastotýpe,ha pekontinua perrelincha umi kavaju kohúdoicha.
12 Upévare pende sy oñemotĩ.+
Oñembyasy opytávo upe penegueronase vaʼekue.
Haʼe hína pe michĩvéva umi tetãnguéra apytépe,peteĩ desiérto ndorekóiva y, peteĩ desiérto perõ.+
13 Ha Jehová ipochyeterei rupi avave ndoikomoʼãvéi upépe,+opytáta nandi vera.+
Oimeraẽ ohasáva Babilóniarupi omañáta hese ha tuichaiterei oñemondýita,ha oñakãmbovaváta* ohechávo umi mbaʼe vai oiko vaʼekue hesekuéra.+
14 Peju opáguio ládo ha pejeprepara peñorairõ hag̃ua Babilonia kóntrape,enterove peẽ peipurúva árko ha flécha.+
Pehaʼã katu chupe ha ani penerakateʼỹ pende fléchare,pórke opeka kuri Jehová kóntrape.+
15 Opáguio ládo pesapukái oñepyrũmaha pe gérra ikóntrape.
Haʼe oñentregáma.
Ikolumnakuéra hoʼapáma, imurallakuéra ojeitypa,+pórke Jehová oñevenga hese.+
Peñevengáke hese.
Pejapo hese haʼe ojapo hagueichaite.+
16 Pehundi Babilóniagui pe oñemitỹvape,ha avei pe oipurúvape pe machéte* kosécha tiémpope.+
Káda uno oho jeýta ivállepe, pórke pe espáda ojuka hetaitereípe,káda uno oho jeýta ijyvy teépe.+
17 Israel puévlo ningo peteĩ ovecha aty isarambipáva.+ Umi león omosarambipa chupekuéra.+ Primero pe rréi de Asiria ojuka ha hoʼu chupekuéra,+ upéi rréi Nabucodonosor* de Babilonia oikarãi pe ikanguekuerakue.+
18 Upévare, péicha heʼi Israel Jára Jehová, umi ehérsito yvagapegua ruvicha: ‘Ápe akastigáta hína rréi de Babilóniape ha pe ijyvy, akastiga haguéicha pe rréi de Asíriape.+
19 Ha agueru jeýta Israélpe ipastotýpe,+ ha haʼe opasteáta Carmelo ha Basánpe,+ ha Efraín montañaháre+ ha Galaádpe+ haʼe* hyg̃uatãta’”.
20 Jehová heʼi: “Umi díape ha upe tiémpope,ojehekáta Israel rembiapo vaikue,péro ndojetopamoʼãi mbaʼeve,ha Judá pekadokuéra ndojejuhumoʼãi,pórke aperdonáta umi aheja vaʼekuépe opyta”.+
21 “Tapeho peataka Merataim yvy ha umi oikóvape Pecódpe.+
Tojejukapa ha toñehundipa* chupekuéra”, heʼi Jehová.
“Ejapopaitékena umi mbaʼe amanda vaʼekue ndéve.
22 Oñehendu oikoha gérra upe paíspe,oiko sarambi guasu.
23 ¡Mbaʼeichaitépa oñekytĩ ha oñemonguʼi pe martíllo ombochipéva umi tetãnguéra oĩva ko yvy ape ári!+
¡Mbaʼeichaitépa Babilóniagui oiko peteĩ mbaʼe omongyhyjéva umi tetãnguérape!+
24 Babilonia, che aipuru vaʼekue peteĩ láso romoñuhã hag̃ua, ha nde reʼa pype,ha nde katu ni nderepillái.
Otopa nderehe hikuái ha ndejagarra,+pórke Jehováre la reñemoĩ kuri.
25 Jehová oavri idepósito oñongatuha hiʼarmakuéra,ha onohẽ umi árma ohechauka hag̃ua ipochyha.+
Pórke Jehová umi ehérsito yvagapegua ruvicha, pe ogovernáva opa mbaʼe, oreko peteĩ mbaʼe ojapo vaʼerãumi caldeo yvýpe.
26 Ha peju ikóntrape umi lugár mombyryvehágui.+
Peavri umi idepósito oñongatuhápe semílla.+
Pembyatypa semíllaicha umi mbaʼe peipeʼa vaʼekue chugui.
Pehundiete* chupe.+
Ani avavete hemby chupe upépe.
27 Pejukapaite umi tóro raʼyrusu orekóva.+
Pembovahea chupekuéra ojejuka hag̃uáme.
¡Aichejáranga haʼekuéra, pórke hiʼára g̃uahẽma,og̃uahẽma pe tiémpo ojekastiga hag̃ua chupekuéra!
28 Oñehendu osapukaiha ohóvo umi okañýva,umi okañýva Babilonia territórioguiomombeʼu hag̃ua Siónpe, Ñandejára Jehová oñevengaha,oñevengaha itémplore.+
29 Pehenoika umi kuimbaʼe oipurúvape árko ha flécha ou hag̃ua Babilonia kóntrape,enterove umi oipurukuaávape árko ha flécha.+
Pemoĩ pene kampaménto ko siuda jerére, ani peheja ni peteĩ okañy.
Pejapo hese asegún upe ojapo vaʼekue.+
Pejapo hese haʼe ojapo hagueichaite.+
Pórke haʼe oñemombaʼeguasu Jehová kóntrape,Israel Jára* kóntrape.+
30 Upévare umi mitãrusu oikóva upépe hoʼáta omano umi plásape,+ha enterove umi soldádo ojejukáta* upe díape”, heʼi Jehová.
31 “Nde reporodesafiáva,+ che añemoĩ ne kóntrape”,+ heʼi Jehová umi ehérsito yvagapegua ruvicha, pe ogovernáva opa mbaʼe,“pórke ndeʼára g̃uahẽta hína, pe tiémpo che rokastiga hag̃ua.
32 Nde reporodesafiáva, reñepysangáta ha reʼáta,ha avave nanemopuʼãmoʼãi.+
Ha ahapýta umi nde siudakuéra,ha okaipaitéta opa mbaʼe oĩva nde jerére”.
33 Péicha heʼi Jehová, umi ehérsito yvagapegua ruvicha:
“Israel puévlo ha Judá puévlope ojejopy hína,ha enterove umi ogueraha vaʼekue chupekuéra prisionéroramo, oñakarama hatã hesekuéra.+
Ndohejaséi chupekuéra oho.+
34 Péro upe Orekóva derécho ojogua hag̃ua chupekuéra, ipoderóso.+
Haʼe héra Jehová, umi ehérsito yvagapegua ruvicha.+
Katuete odefendéta chupekuéra ojehusga vove,+péicha omombytuʼúta ijyvykuéra,+ha oguerúta heta jehasa asy umi oikóvape Babilóniape”.+
35 “Oĩ peteĩ espáda umi caldeokuéra kóntrape”, heʼi Jehová,“umi hénte oikóva Babilonia kóntrape, umi prínsipe ha umi kuimbaʼe iñarandúva kóntrape.+
36 Oĩ peteĩ espáda umi oñeʼẽ reíva* kóntrape, ha ojapóta hikuái vyrorei.
Oĩ peteĩ espáda umi isoldadokuéra kóntrape, ha okyhyjetereíta hikuái.+
37 Oĩ peteĩ espáda umi ikavaju ha umi kárro de gérra kóntrape,oĩ peteĩ espáda enterove umi extranhéro oikóva ijapytepekuéra kóntrape,ha haʼekuéra okyhyjéta umi kuñáicha.+
Oĩ peteĩ espáda umi itesorokuéra kóntrape, ha ojesakeapaitéta.+
38 Oñembyaipáta chuguikuéra hiʼykuéra, ha hypáta.+
Pórke Babilóniape henyhẽ umi dioskuéra raʼanga,+ha itavyraipáta hikuái ohecha rupi umi visión oporomongyhyjéva.
39 Upévare umi animál desiertopegua ha umi animál oguahúva oikóta upépe,ha umi ñandu guasu oikóta avei upépe.+
Ndojeikomoʼãvéima upépe arakaʼeve,ha umi henerasión oútava ndopytamoʼãvéi upépe oiko hag̃ua”.+
40 “Ha avave ndoikomoʼãvéima upépe ha ni peteĩ kuimbaʼe ndopytamoʼãi oiko upépe”, heʼi Jehová, “opyta haguéicha Sodoma ha Gomorra+ ha umi puevloʼi oĩva ijerére+ Ñandejára ohundi rire chupekuéra.+
41 ¡Emañami!, ou hína peteĩ puévlo nórteguio.
Opuʼãta peteĩ país tuicháva ha umi rréi iñimportantetereíva,+oúta hikuái umi lugár mombyryvehágui ko yvy ape ári.+
42 Oreko hikuái ipópe árko ha flécha ha avei lánsa.+
Haʼekuéra iviolénto ha ndoiporiahuverekomoʼãi avavépe.+
Ou jave hikuái ikavajukuéra ári,oñehendu chupekuéra mar pochýicha.+
Oñomoirũmba hikuái ou hag̃ua oñorairõ ne kóntrape, Babilonia.+
43 Pe rréi de Babilóniape oñemombeʼu upéva,+ha haʼe ikangypaite, ndoikuaái mbaʼépa ojapóta.+
Ojepyʼapyeterei,ha ojogua peteĩ kuña hasyetévape hína imemby hag̃ua.
44 Peteĩ león osẽháicha umi ñanandy vai oĩvagui Jordánpe, oĩta peteĩ osẽva ha oataka umi pastoty isegúro porãva, péro sapyʼaitépe che amuñáta chupekuéra* upégui. Ha amoĩta chupe pe ojeporavo vaʼekue poguýpe.+ Pórke, ¿oĩ mbaʼe piko ótro cheichagua, ha máva piko chedesafiáta? ¿Ikatu piko peteĩ pastór opyta oñemboʼy che renondépe?+
45 Upévare pehendu mbaʼépa Jehová odesidi ojapo Babilonia rehe,+ ha mbaʼépa haʼe opensa ojapo umi caldeo yvýre.
Katuete mombyry oñembotyryrýta umi ovecha raʼýpe pe ovecha atýgui.
Haʼe ohejáta nandi vera umi ipastoty umi hénte káusare.+
46 Ág̃a Babilonia hoʼa vove, hyapu hatãitereíta ha pe yvy oryrýita.
Ha umi tetãnguérape oñehendúta osapukáiva”.+
Nóta
^ Térã: “póste oservítava de señál”.
^ Hebréope ojepuru peteĩ ñeʼẽ heʼiséva “animál rekaka”, ha ojepuru ojeapoʼi hag̃ua ótrope.
^ Hebréope: “oturuñeʼẽta”.
^ Térã: “hoz”.
^ Hebréope: “Nabucodorosor”. Péicha avei ojeskrivi héra.
^ Térã: “hiʼálma”.
^ Térã: “toñemboyke oñehundiete hag̃ua”.
^ Térã: “Pemboyke pehundiete hag̃ua”.
^ Hebréope: “oñemokirirĩta”.
^ Térã: “umi proféta japu”.
^ Amalisia koʼápe oñeñeʼẽ hína umi babilóniore.
