Josué 2:1-24
2 Upéi Josué Nun raʼy omondo Sitímgui+ ñemihaitépe mokõi kuimbaʼépe ovichea hag̃ua pe yvy. Haʼe heʼi chupekuéra: “Tapeho pevichea pe yvy, espesiálmente Jericó”. Upémarõ haʼekuéra osẽ oho, ha og̃uahẽ rire Jericópe oike peteĩ prostitúta rógape hérava Rahab,+ ha opyta hikuái upépe.
2 Ha oñemombeʼu pe rréi de Jericópe: “¡Eñatendékena! Ko pyharépe ou kuri umi kuimbaʼe israelita ovichea hag̃ua ñande yvy”.
3 Upépe, pe rréi de Jericó heʼika Rahábpe: “Eguenohẽ umi kuimbaʼe ou vaʼekue ha opytáva hína nde rógape, pórke haʼekuéra ou kuri ovichea hag̃ua ñande yvy kompletoite”.
4 Péro Rahab omokañy umi mokõi kuimbaʼépe. Upéi haʼe heʼi: “Si, ou kuri koʼápe umi kuimbaʼe, péro che ndaikuaái kuri moõguápa hikuái.
5 Ha pytũmbýrõ guare, pe siuda rokẽ oñemboty potápe, umi kuimbaʼe osẽ oho. Che ningo ndaikuaái moõpa oho hikuái, péro pyaʼe porã pemuñáramo chupekuéra katuete pehupytýta”.
6 (Péro haʼe ogueraha kuri chupekuéra hóga técho ári, ha omokañy chupekuéra umi líno rakã kuápe, oĩva hína ojoʼaripa hóga terrásape).
7 Upémarõ umi kuimbaʼe pe rréi omondo vaʼekue odipara hapykuerikuéra pe Jordán gotyo,+ pe rrío ipererĩveha gotyo, ha pe siuda rokẽ katu oñemboty kuri osẽ rire umi kuimbaʼe omuñáva chupekuéra.
8 Umi mokõi kuimbaʼe oñeno mboyve oke hag̃ua, Rahab ojupi hendapekuéra pe terrásape.
9 Haʼe heʼi chupekuéra: “Che aikuaa Jehová omeʼẽtaha peẽme ko yvy,+ ha koʼápe enterove rokyhyjepáma pendehegui.+ Ha umi hénte oikóva ko paíspe ningo ikangypáma pórke oryrýi okyhyje pendehegui.+
10 Rohendu mbaʼéichapa Jehová oavri pe Mar Rojo pene renondépe ha penembohasa yvy isekohárupi pesẽrõ guare Egíptogui.+ Ha rohendu avei mbaʼépa pejapo vaʼekue umi mokõi rréi amorréore, Sehón+ ha Og.+ Haʼekuéra oĩ vaʼekue pe ótro ládo pe Jordángui* ha peẽ pehundi chupekuéra.
11 Rohendúrõ guare koʼã mbaʼe, orekangypaite ha ndaipóri oñanimáva oñemoĩ penderehe, pórke pende Jára Jehová haʼe hína peteĩ Dios amo yvágape ha ko yvy ape ári avei.+
12 Ha koʼág̃a ajerure peẽme por favór, pehura hag̃ua chéve Jehová rérare penembaʼeporãtaha chendive,* pórke che chembaʼeporãiterei kuri penendive. Ha peẽ penembaʼeporã vaʼerã avei che túa hentekuérandi, ha peje chéve mbaʼéichapa ikatu aikuaa* peẽ pekumplitaha la pejéva.
13 Peẽ peiporiahuvereko ha ndapejukái vaʼerã che túa, che sy, che ermanokuéra ha che ermanakuérape, ha avei enterove oĩvape hendivekuéra, ha oresalva vaʼerã ani hag̃ua romano”.+
14 Upépe umi kuimbaʼe heʼi chupe: “¡Ore rekove jepe romeʼẽta penderehehápe! Ndapejaguáiramo orerehe ha napemombeʼúiramo maʼerãpa roju, upéicharõ orembaʼeporãta penendive ha rokumplíta la roʼe vaʼekue ág̃a Jehová omeʼẽ vove oréve ko yvy”.
15 Upe rire, Rahab omboguejy chupekuéra peteĩ piólare ventánarupi, pórke hóga oĩ vaʼekue pe siuda murálla kostádope. Hóga ningo oĩ vaʼekue voi pe murálla ári.+
16 Upéi haʼe heʼi: “Tapeho umi montañaháre ha pekañy upépe 3 día, ani hag̃ua otopa penderehe umi pendepersegíva. Upéi ág̃a umi pendepersegíva ou jey vove, ikatúta peho jey pende rapérupi”.
17 Umi kuimbaʼe heʼi chupe: “Ore rokumplíta katuete ko huraménto rojapóva ndéve.+
18 Péro upearã, roike vove ko yvýpe katuete eñapytĩ vaʼerã ko pióla pytã ne ventánare, pe oremboguejy haguérupi. Ha regueru vaʼerã koʼápe nde rógape nde túape, nde sy, ne ermanokuéra, ne ermanakuéra ha kompletoite nde túa hentekuérape.+
19 Ha oĩramo osẽva nde rógagui okápe, upéicharõ haʼe ikáusare omanóta* ha ndahaʼemoʼãi ore kúlpare. Péro oĩramo opytáva nendive nde róga ryepýpe ha ojehu chupe álgo, upéicharõ upéva ore kúlpata.
20 Péro rejaguáramo orerehe ha remombeʼúramo maʼerãpa roju raʼe,+ upéicharõ avave ndaorekulpamoʼãi norokumplíriramo pe huraménto rojapo vaʼekue ndéve”.
21 Upépe haʼe heʼi: “Toiko upe pejeháicha”.
Upéi haʼe omondo chupekuéra, ha oñapytĩ pe pióla pytã iventánare.
22 Upémarõ umi kuimbaʼe oho umi montañaháre ha opyta upépe 3 día ou jey peve umi opersegíva chupekuéra. Koʼãva ningo oheka kuri oikóvo chupekuéra opárupi, péro ndotopái hesekuéra.
23 Upéi umi mokõi kuimbaʼe oho vaʼekue ovichea hag̃ua pe yvy, oguejy umi montáñagui ha ohasa pe Rrío Jordán ha og̃uahẽ Nun raʼy Josué rendápe, ha omombeʼupaite chupe umi mbaʼe oiko vaʼekue hesekuéra.
24 Upéi haʼekuéra heʼi Josuépe: “Jehová omeʼẽma ñandéve pe yvy kompletoite ha ohejáma ñande poguýpe.+ Ha umi hénte oikóva upe paíspe ikangypáma, pórke oryrýi okyhyje ñandehegui”.+
Nóta
^ Upéva hína éste gotyo.
^ Térã: “pemeʼẽ chéve peteĩ señál ajerovia hag̃ua”.
^ Hebréope: “huguy oĩta iñakã ári”.
