Josué 6:1-27
6 Ha Jericó rokẽ oñembotypaite umi israelita káusare, ndaipóri oikéva ni osẽva.+
2 Upémarõ Jehová heʼi Josuépe: “Ameʼẽma ndéve Jericó ha irréi, ha umi gerréro poderosoite orekóva hikuái.+
3 Ha enterove peẽ kuimbaʼe peñorairõtava pejere vaʼerã una vuélta pe siudáre. Péicha pejapo vaʼerã 6 día aja.
4 Nde rehecha vaʼerã toho pe Árka del Pákto renonderã 7 saserdóte, ha togueraha hikuái 7 turu.* Ha pe 7 diahápe, peẽ pejere vaʼerã pe siudáre 7 vése ha umi saserdóte ombopu vaʼerã umi turu.+
5 Oñembopu vove umi turu,* peẽ pehendu vovéntema upéva, pe puévlo kompletoite osapukái vaʼerã ku oñorairõtarõguáicha. Upépe pe siuda murálla hoʼáta,+ ha káda uno umi soldádo ohóta oike derechoite pe siudápe”.
6 Upémarõ Nun raʼy Josué ohenói umi saserdótepe ha heʼi chupekuéra: “Pejagarra pe Árka del Pákto, ha 7 saserdóte ogueraha vaʼerã 7 turu ha oho vaʼerã Jehová árka renonderã”.+
7 Upéi heʼi pe puévlope: “Pekuʼéke ha tapeho pejere pe siudáre, ha umi soldádo oho vaʼerã hiʼarmakuéra reheve+ Jehová Árka del Pákto renonderã”.
8 Ha ojejapo Josué heʼi hagueichaite pe puévlope, umi 7 saserdóte ogueraháva umi 7 turu oho Jehová renonderã, ha ombopu ohóvo hikuái umi turu, ha Jehová Árka del Pákto ojegueraha hapykuerikuéra.
9 Umi saserdóte ombopúva umi turu renonderã oho umi soldádo hiʼarmakuéra reheve, ha umi soldádo oĩva tapykuépe oho pe Árka del Pákto rapykuéri, ha upe aja kontinuadoite oñembopu umi turu.
10 Josué katu omanda kuri pe puévlope: “Aníke pesapukái, pekirirĩete vaʼerã. Mbaʼevete ndapejéi vaʼerã ág̃a che haʼe peve peẽme: ‘¡Pesapukái!’. Upépe ae pesapukái vaʼerã”.
11 Ha haʼe heʼi ojegueraha hag̃ua Jehová árka ha ojere hag̃ua hikuái heseve pe siudáre una vuélta. Upe rire oho jey hikuái pe kampaméntope ha opyta upépe upe pyhare.
12 Al ótro día Josué opuʼã pyharevete, ha umi saserdóte ojagarra Jehová árka,+
13 ha umi 7 saserdóte ogueraháva umi 7 turu oguata ohóvo Jehová árka renonderã, ha ombopu ohóvo hikuái umi turu. Umi soldádo oguata ohóvo hiʼarmakuéra reheve henonderãkuéra, ha upe aja umi soldádo oĩva tapykuépe oho avei Jehová árka rapykuéri, ha upe aja kontinuadoite oñembopu umi turu.
14 Haʼekuéra ojere pe siudáre una ves pe segundo díape ha upéi oho jey pe kampaméntope. Péicha ojapo hikuái 6 día aja.+
15 Pe 7 diahápe opuʼã hikuái pyharevete koʼẽtĩ jave, ha oho ojere hikuái pe siudáre ojapoháicha jepi voi, péro ko díape ojere hikuái 7 vése. Upe díape añoite haʼekuéra ojere pe siudáre 7 vése.+
16 Ha pe 7 vesehápe umi saserdóte ombopu umi turu, ha Josué heʼi pe puévlope: “¡Pesapukáike,+ pórke Jehová omeʼẽma peẽme ko siuda!
17 Ko siuda ha entéro mbaʼe oĩva pype oñehundiete vaʼerã,+ pórke entéro umíva Jehová mbaʼe hína. Rahab+ pe prostitúta añoite osegi vaʼerã oikove, haʼe ha enterove oĩva hendive hógape, pórke haʼe omokañy kuri umi kuimbaʼe ñamondo vaʼekuépe ovichea hag̃ua pe yvy.+
18 Péro peñemomombyry vaʼerã umi mbaʼe oñehundietétavagui,+ ani hag̃ua peipota ha pegueru umíva penembaʼerã.+ Pórke pejapóramo péicha pemongyʼáta Israel kampaménto, peguerúta hiʼári sarambi* ha oñehundietéta.+
19 Péro kompletoite pe pláta, óro ha opa mbaʼe ojejapóva iérro ha kóvregui, sagrádo hína Jehovápe g̃uarã.+ Umíva ojegueraha vaʼerã Jehová tesoreríape”.+
20 Upémarõ pe puévlo osapukái, umi turu ipu aja.+ Pe puévlo ohendúvo pe turu pu, osapukái oñorairõ hag̃uáicha, ha upepete hoʼa pe siuda murálla.+ Upéi pe puévlo oho oike pe siudápe, káda uno oho derechoite ha ojagarra hikuái pe siuda.
21 Haʼekuéra ohundiete espádape entéro mbaʼe oĩva pe siudápe, tahaʼe kuimbaʼe, kuña, imitãva ha ijedáva, tóro, ovecha ha vúrro.+
22 Josué heʼi umi mokõi kuimbaʼe oho vaʼekuépe ovichea pe yvy: “Tapeho peike pe prostitúta rógape, ha peguenohẽ chupe ha enterove oĩvape hendive, pehura haguéicha chupe”.+
23 Upémarõ umi mitãrusu oho vaʼekue ovichea pe yvy oike ha oguenohẽ Rahábpe, itúa, isy, iñermanokuéra ha enterove oĩvape hendivekuéra. Péicha oguenohẽ hikuái ifamília kompletoitépe+ ha ogueraha chupekuéra peteĩ lugár isegúrovape Israel kampaménto ypýpe, oka gotyo.
24 Upéi haʼekuéra ohapy pe siuda ha opa mbaʼe oĩva pype. Péro pe pláta, óro ha opa mbaʼe ojejapóva iérro ha kóvregui ogueraha hikuái Jehová tesoreríape.+
25 Ha Josué osalva pe prostitúta Rahábpe, itúa rogayguápe ha enterove oĩvape hendive. Chupekuéra añoite ojesalva.+ Ha Rahab oiko Israélpe koʼag̃aite peve,+ pórke haʼe omokañy vaʼekue umi kuimbaʼe Josué omondo vaʼekuépe ovichea hag̃ua Jericó.+
26 Upe tiémpope Josué heʼi ko huraménto:* “Toñemaldesi Jehová renondépe pe kuimbaʼe oñehaʼãvape omopuʼã jey ko siuda de Jericó. Ha omoĩ vove pe siuda simiénto, omanóta pe itaʼýra ypykue, ha omoĩ vove pe siuda rokẽ, omanóta pe itaʼýra pahague”.+
27 Péicha Jehová oĩ vaʼekue Josué ndive,+ ha ojekuaa chupe opárupi ko yvy ape ári.+
Nóta
^ Térã: “ovecha mácho ratĩngue”.
^ Térã: “ovecha mácho ratĩngue”.
^ Térã: “provléma, pejerrechasáta”.
^ Ikatu avei: “ombohura umi héntepe ko huraménto”.
