Josué 7:1-26
7 Péro umi israelita naiñeʼẽrendúi ha nohundíri umi mbaʼe ojeʼe vaʼekue chupekuéra ohundi hag̃ua. Acán*+ ojagarra ogueraha peteĩ mbaʼe oñehundiete vaʼerã kuri.+ Upévare Jehová orrenegaiterei umi israelítare.+ Acán ningo hína Carmí familiare, Carmí hína Zabdí familiare, ha Zabdí hína Zérah familiare, haʼéva Judá trivugua.
2 Upéi Josué omondo Jericógui unos kuánto kuimbaʼe Háipe,+ oĩva Bet-Aven ypýpe, éste gotyo Betélgui,+ ha heʼi chupekuéra: “Tapeho pevichea pe yvy”. Upémarõ umi kuimbaʼe oho ovichea Hai yvy.
3 Haʼekuéra ou rire Josué rendápe, heʼi chupe: “Natekotevẽi oho pe ehérsito kompletoite. Oñemondóramo 2.000 térã 3.000 kuimbaʼérupi ovaletereítama oñehundi hag̃ua Háipe. Ani remondo pe puévlo kompletoite, remokaneʼõmba reíta ningo chupekuéra, pórke saʼieterei oĩ la oikóva upépe”.
4 Upémarõ oho amo 3.000 kuimbaʼérupi, péro osẽvo chupekuéra umi kuimbaʼe Haigua, odiparapaite hikuái.+
5 Umi kuimbaʼe Haigua ojuka 36 kuimbaʼe israelítape ha omuña chupekuéra pe siuda rokẽ guive Sebarim* peve, ha ojuka ohóvo chupekuéra pe vahádare. Upéicha rupi pe puévlo opyta okyhyjeterei ha ipyʼaju.*
6 Upépe Josué omondoro ijao, oñesũ ha oñakãity Jehová árka renondépe kaʼaruete peve. Haʼe ha umi kuimbaʼe omoakãva* Israel osegi omoĩ iñakã ári yvykuʼi.
7 Josué heʼi: “Áina Ñandejára Jehová regovernáva opa mbaʼe, ¿maʼerã piko regueru ko puévlope ko tape pukúre ha orembohasa ko Jordán oremeʼẽ hag̃uánte umi amorréope orerundi hag̃ua? ¡Iporãvénte vaʼerãmoʼã kuri ropytánte roiko éste gotyo pe Jordángui!
8 Cheperdonamína Jehová, ¿mbaʼe piko la haʼevétava koʼág̃a? Israel ningo odipara iñenemigokuéragui.
9 Ág̃a umi cananeo ha umi ótro puévlo oĩva ko yvy ape ári ohendu vove la oikóva, oúta oremongora ha oipeʼaitéta ore réra ko yvy árigui. ¿Ha mbaʼe piko rejapóta redefende hag̃ua nde réra tuichaitéva?”.+
10 Ha Jehová heʼi Josuépe: “¡Epuʼã! ¿Mbaʼére piko reñesũ ha reñakãity pe yvýpe?
11 Israel opeka hína. Haʼekuéra nokumplíri pe kompromíso+ ajapo vaʼekue hendivekuéra. Ogueraha hikuái peteĩ mbaʼe oñehundiete vaʼerã kuri,+ omonda+ ha oñomi ikosakuéra apytépe.+
12 Upéicha rupi umi israelita ndaipuʼakamoʼãi iñenemigokuérare. Haʼekuéra ojeréta odipara iñenemigokuéragui, pórke chupekuéra oñekondenáma oñehundiete hag̃ua. Che naimemoʼãvéima penendive ndapeipeʼái aja entéro pende apytégui upe mbaʼe oñehundiete vaʼerã kuri.+
13 ¡Epuʼã katu! Ha pe puévlo ojeprepara hag̃ua,+ ere chupekuéra: ‘Pejeprepara* koʼẽrõ g̃uarã, pórke péicha heʼi Jehová Israel Jára: “Israel, upe mbaʼe haʼe vaʼekue peẽme pehundi vaʼerãha, oĩ hína pende apytépe. Peẽ napendepuʼakamoʼãi pene enemigokuérare ndapeipeʼái aja entéro pende apytégui upe mbaʼe oñehundiete vaʼerã.
14 Peju koʼẽrõ pyharevete, trívu por trívu, ha pe trívu Jehová oiporavóva oñembojáta henondépe. Upéi família por família, ha pe família Jehová oiporavóva+ oñembojáta henondépe. Upéi káda ogapegua oñembojáta, ha pe Jehová oiporavóva oñembojáta henondépe, ha upéi káda kuimbaʼe upe ogapegua oñembojáta henondépe.
15 Ha ojepilla vove upe orekóvape upe mbaʼe oñehundiete vaʼerã, upévape ojejukáta ha ojehapýta chupe+ ha opa mbaʼe orekóva. Pórke haʼe nokumplíri pe kompromíso+ Jehová orekóva hendivekuéra ha ojapo peteĩ mbaʼe omotĩ ha omongyʼáva Israélpe”’”.
16 Upémarõ al ótro día Josué opuʼã pyharevete voi porã, ha heʼi umi israelítape oñemoag̃ui hag̃ua trívu por trívu, ha Ñandejára oiporavo Judá trívupe.
17 Upéi Josué heʼi oñemboja hag̃ua enterove umi família oĩva Judá trívupe, ha Ñandejára oiporavo umi zerahítape.+ Upéi heʼi oñemoag̃ui hag̃ua káda kuimbaʼe umi zerahíta apytégui, ha Ñandejára oiporavo Zabdí rogayguápe.
18 Ultimoitépe heʼi oñemoag̃ui hag̃ua káda kuimbaʼe Zabdí rogaygua, ha Ñandejára oiporavo Acánpe, haʼe ningo Carmí familiare, Carmí hína Zabdí familiare, ha Zabdí hína Zérah familiare, haʼéva Judá trivugua.+
19 Upéi Josué heʼi Acánpe: “Che raʼy, por favór, emombaʼeguasúna Israel Jára Jehovápe, ha emombeʼu chupe la rejapo vaʼekue. Eréna chéve mbaʼépa la rejapo vaʼekue. Ani reñomi chehegui”.
20 Acán heʼi Josuépe: “Che hína la mbaʼe vai apoha, apeka Israel Jára Jehová kóntrape, ha amombeʼúta ndéve la ajapo vaʼekue.
21 Ahechárõ guare umi mbaʼe jasakea vaʼekue apytépe peteĩ ao iporãitereíva Sinárpe guare,+ ha 2 kílo 280 grámo* pláta, ha peteĩ várra de óro orekóva 570 grámo,* che aipotaiterei ha ajagarra chembaʼerã. Oime añomi che róga* ryepýpe, pe ao amoĩ yvyguýpe ha pe pláta ha óro oĩ hína pe ao guýpe”.
22 Upépe Josué omondo unos kuánto kuimbaʼe Acán rógape, ha haʼekuéra odipara oho oike upépe ha otopa pe ao oñeñomi vaʼekue, ha iguýpe pe pláta ha pe óro.
23 Upémarõ haʼekuéra oguenohẽ koʼã mbaʼe ha ogueru Josuépe, enterove umi israelita rovake, ha omoĩ hikuái Jehová renondépe.
24 Upépe Josué ha kompletoite umi israelita ojagarra Acánpe+ ha ogueraha chupe Acor Ñúme,+ Acán hína Zérah raʼy. Ha ogueraha avei hikuái pe pláta, pe ao porã, pe várra de óro,+ itaʼýra ha itajyrakuéra, hymba tóro, hymba vúrro, umi ijovecha ha ikavara, hóga kárpa ha opa mbaʼe orekóva.
25 Josué heʼi chupe: “¿Mbaʼére piko rejapo orerehe péicha ha regueru sarambi* ore ári?+ Upéicha rupi koestedía Jehová oguerúta avei nde ári mbaʼe vai”. Upépe Israel kompletoite ojapi chupekuéra itápe omano meve,+ ha upe rire ohapy chupekuéra.+ Péicha umi israelita ojuka chupekuéra itápe.
26 Upéi omopuʼã hikuái hiʼári peteĩ ita atýra, ha upéva oĩ upépe koʼag̃aite peve. Upépe ae Jehová ipochyjera.+ Upéicha rupi upe lugár héra Acor* Ñu koʼag̃aite peve.
Nóta
^ Heʼiséva: “Kantéra”.
^ Hebréope: “pe puévlo korasõ hyku ha ýicha opyta”.
^ Hebréope: “ansianokuéra”.
^ Térã: “Peñesantifika”.
^ Hebréope: “róga kárpa”.
^ Hebréope: “50 siclo”.
^ Térã: “provléma, jerrechasa”.
^ Heʼiséva: “Sarambi, jehasa asy”.
