Josué 8:1-35
8 Upémarõ Jehová heʼi Josuépe: “Ani ndepyʼaju ni rekyhyje.+ Eraha nendive enterovete umi kuimbaʼe oñorairõkuaáva, ha epuʼã tereho eñorairõ Hai kóntrape. Ahejáma nde poguýpe pe rréi de Hai, ipuévlo, isiuda ha ijyvy.+
2 Rejapo hagueichaite Jericó ha irréire,+ upéicha rejapo vaʼerã Hai ha irréire. Péro ikatu pegueru penembaʼerã umi mbaʼe peipeʼáva chuguikuéra ha hymbakuéra. Emondo unos kuánto kuimbaʼe pe siuda kupe gotyo opeska ha omoñuhã hag̃ua chupekuéra”.
3 Upéi Josué ha umi kuimbaʼe oñorairõkuaáva oho oñorairõ Hai kóntrape. Josué oiporavo 30.000 kuimbaʼe oñorairõkuaáva, ha omondo chupekuéra pyharekue.
4 Ha omanda chupekuéra: “Peẽ peho vaʼerã pehaʼarõ pe siuda kupe gotyo pepeska ha pemoñuhã hag̃ua chupekuéra. Aníke peñemomombyry pe siudágui, ha enterovete peime vaʼerã preparádo.
5 Ha che ha umi ótro oĩva chendive rohóta roñemoag̃ui pe siudáre, ha haʼekuéra osẽ vove oréve akokuehe guaréicha,+ ore rodiparáta chuguikuéra.
6 Haʼekuéra osẽ vove oréve, ore romomombyrýta chupekuéra pe siudágui, pórke haʼekuéra heʼíta hína: ‘Koʼãva odipara hína ñandehegui akokuehe guaréicha’.+ Ha ore rodiparáta chuguikuéra.
7 Upépe peẽ pepuʼã vaʼerã upe pekañyhágui, ha pejagarra pe siuda. Jehová pende Jára ontregáta peẽme pe siuda.
8 Pejagarra vovéntema pe siuda pehapypaite vaʼerã.+ Peẽ pejapo vaʼerã Jehová heʼi haguéicha. Haʼepáma peẽme mbaʼépa haʼe oipota pejapo”.
9 Upéi Josué omondo chupekuéra. Ha haʼekuéra oho pe lugár opytatahápe opeska umi iñenemigokuérare, oho ojekoloka hikuái éntre Betel ha Hai, oéste gotyo Háigui. Josué katu opyta upe pyharépe umi ótro soldádondi.
10 Upéi Josué opuʼã pyharevete voi porã ha ombyaty umi soldadokuérape, haʼe ha umi kuimbaʼe omoakãva* Israel ogia chupekuéra Háipe.
11 Enterovete umi kuimbaʼe oñorairõkuaáva+ oĩva hendive oho pe siuda gotyo, ha omoĩ hikuái ikampaménto nórte gotyo Háigui. Ha peteĩ ñúntema osepara chupekuéra Háigui.
12 Upe aja haʼe ogueraha hendive 5.000 kuimbaʼe ha okoloka chupekuéra opeska hag̃ua iñenemigokuérare,+ éntre Betel+ ha Hai, oéste gotyo pe siudágui.
13 Upémarõ umi soldadokuéra oho omoĩ ikampaménto nórte gotyo pe siudágui+ ha umi soldádo opeskáva iñenemigokuérare opyta oéste gotyo pe siudágui.+ Ha Josué oho oike alamitaha meve pe ñúme.
14 Pe rréi de Hai ohechamírente upéva, osẽ pyaʼe porã pyharevete umi kuimbaʼe upe siudapeguándi oñorairõ hag̃ua umi israelita kóntrape, peteĩ lugár oĩvape pe desiértope. Péro haʼe ndoikuaái kuri oĩha opeskáva hesekuéra pe siuda kupe gotyo.
15 Umi kuimbaʼe Haigua oatakávo chupekuéra, Josué ha enterovete umi israelita odipara chuguikuéra pe tape ohóvare pe desiérto gotyo.+
16 Upémarõ enterovete oĩva pe siudápe oñembyaty oho hag̃ua omuña chupekuéra. Ha Josué oñemuñaka chupekuéra, ha péicha omomombyry umi héntepe isiudágui.
17 Ni peteĩ kuimbaʼe ndopytái Háipe ni Betélpe, enterovete oho umi israelita rapykuéri. Haʼekuéra oheja pe siuda rokẽ nandipaite ha oho omuña umi israelítape.
18 Upémarõ Jehová heʼi Josuépe: “Ehupi pe lánsa erekóva nde pópe Hai gotyo,+ pórke che ahejáta nde poguýpe upe siuda”.+ Upépe Josué ohupi pe lánsa orekóva ipópe pe siuda gotyo.
19 Josué ohupívo ipo, upepete umi kuimbaʼe opeska vaʼekue iñenemigokuérare opuʼã odipara ha oho oike pe siudápe ha ojagarra. Ha ensegída voi ohapy hikuái pe siuda.+
20 Umi kuimbaʼe Haigua ojerévo omaña, ohecha pe siudágui opuʼãha tatatĩ yvágare, ha opyta ikangypaite hikuái, moõve gotyo ndaikatúi oho okañy. Upépe umi soldádo odipara vaʼekue ohóvo pe desiérto gotyo ojevy ha oataka ikontrariokuérape.
21 Ha Josué ha kompletoite umi israelita ohechávo umi soldádo opeska vaʼekue iñenemigokuérare oikemaha pe siudápe, ha avei ohechávo pe tatatĩ opuʼãva pe siudágui, ojere hikuái ha oataka umi kuimbaʼe Haiguápe.
22 Ha umi ótro soldádo osẽ pe siudágui oho hag̃ua oataka chupekuéra, péicha umi kuimbaʼe Haigua opyta imbytepekuéra, umi israelita oho chupekuéra koʼáguio ha amóguio ládo avei. Ha ojukapaite chupekuéra, ni peteĩ ndojesalvái ni ndohói okañy.+
23 Péro haʼekuéra ndojukái pe rréi de Háipe,+ ojagarra chupe hikuái ha ogueraha Josué rendápe.
24 Umi israelita ojukapa umi Haiguápe pe ñúme, upe desiérto omuña haguépe chupekuéra, upépe ojuka hikuái espádape káda únope. Upe rire enterovete umi israelita oho jey pe siudápe ha ojukapaite umi oĩvape upépe.
25 Upe díape umi kuña ha kuimbaʼe Haigua ojejuka vaʼekue espádape ohupyty en totál 12.000.
26 Ha Josué nomboguejýi ipo ojokoha ilánsa,+ ohundipa peve hikuái enterovete oikóvape Háipe.+
27 Péro umi israelita ojagarra ogueraha imbaʼerã umi animál ha umi kosakuéra oĩ vaʼekue upe siudápe, Jehová heʼi haguéicha Josuépe.+
28 Upémarõ Josué ohapy ha ohundi Hai, oiko peve chugui peteĩ siuda ndovaléiva mbaʼeverã.+ Ha opyta upéicha koʼag̃aite peve.
29 Upéi Josué ojuka pe rréi de Háipe ha omosaingo chupe peteĩ yvyráre* kaʼaruete peve. Ha oike potávo pe kuarahy, Josué heʼi oñemboguejy hag̃ua pe rréi retekue pe yvyrágui.+ Upéi oñemombo chupe pe siuda rokẽ entrádape ha omoĩ hikuái hiʼári atyraite ita, ha upéva oĩ upépe koʼag̃aite peve.
30 Upérõ guare Josué omopuʼã peteĩ altár Sérro Ebálpe+ Israel Jára Jehovápe g̃uarã.
31 Haʼe ojapo heʼi haguéicha umi israelítape Jehová siérvo Moisés, ha ojeskrivi haguéicha pe lívro orekóvape Moisés léi:+ “Pejapo hag̃ua peteĩ altár peipuru vaʼerã umi ita noñekytĩri ha noñemoldeái vaʼekue, ha ndapeipurúi vaʼerã erramiénta de iérro peikytĩ térã pejoka hag̃ua umi ita”.+ Ha pe altár ári haʼekuéra ojapo ofrénda ojehapýva Jehovápe g̃uarã ha umi ofrénda de paz.+
32 Upéi oskrivi upépe umi itáre peteĩ kópia pe léi+ Moisés oskrivi vaʼekuégui umi israelita renondépe.+
33 Enterove umi israelita, umi kuimbaʼe omoakãva pe puévlo, umi ofisiál, ha umi hués, oñemboʼy mokõive ládope pe Árka del Pákto ykére umi saserdóte levita renondépe, haʼekuéra ningo ogueraha jepi Jehová Árka del Pákto. Oĩ upépe umi extranhéro oikóva ijapytepekuéra ha umi israelita teetéva.+ Alamita umi hénte oñemboʼy Sérro Guerizim renondépe ha umi ótro alamita Sérro Ebal+ renondépe, ikatu hag̃uáicha oñevendesi pe puévlo de Israélpe.+ Ojapo hikuái heʼi haguéicha Moisés, Jehová siérvo.
34 Upe rire olee hatã porã opa mbaʼe heʼíva pe lívro de la léi,+ umíva apytépe umi vendisión+ ha maldisión,+ ojeskrivíma haguéicha pe lívro de la léipe.
35 Josué olee hatã porã Israel kongregasión renondépe opa mbaʼe Moisés heʼi vaʼekue, ni peteĩ mbaʼe ndohejái oleeʼỹre.+ Umi kuña, mitã ha umi extranhéro+ oikóva ijapytepekuéra ohendu avei koʼã mbaʼe.+
