Josué 9:1-27
9 Upéi umi rréi oĩva oéste gotyo pe Rrío Jordángui+ oikuaa upe oiko vaʼekue. Umíva hína umi oĩva umi montañaháre Sefelápe, opytáva pe Mar Grande*+ orílla pukukuére ha pe Líbano rovái, umíva hína umi hitita, amorreo, cananeo, perizita, heveo ha jebuseo.+
2 Upémarõ oñomoirũmba hikuái oñorairõ hag̃ua Josué ha Israel kóntrape.+
3 Umi oikóva Gabaónpe+ oikuaa avei mbaʼépa Josué ojapo vaʼekue Jericó+ ha Hai rehe.+
4 Péro haʼekuéra iñarandu ha iletrádo, upévare ojapo koʼã mbaʼe: omoĩ hiʼupy vosa tujakuépe ha ohupi hymba vúrro ári, ha ogueraha avei hikuái víno ryru* ituja ha okapupáma vaʼekue ha oñerremenda pyréva.
5 Ha ogueraha avei hikuái ipýre sandália tujakue ojegastapámava ha oñerremendapa vaʼekue, ha omonde avei ao tujakue. Ha umi pan ogueraháva hikuái ituja, havẽmba ha ikuʼipáma.
6 Upéi haʼekuéra oho Josué rendápe pe kampaméntope Guilgálpe,+ ha heʼi chupe ha umi kuimbaʼe israelítape: “Ore ningo mombyryetereígui roju. Koʼág̃a pejapomína ikatúramo orendive peteĩ kompromíso”.
7 Péro umi israelita heʼi umi hevéope:+ “Moõ piko ore roikuaáta peẽpa ndapeikói hína ag̃uieténte orehegui. ¿Mbaʼéicha piko upéicharõ rojapóta peteĩ kompromíso penendive?”.+
8 Haʼekuéra heʼi Josuépe: “Ore ningo ne rembiguái”.
Upépe Josué heʼi chupekuéra: “¿Máva piko peẽ ha moõgui piko peju?”.
9 Ha heʼi chupe hikuái: “Ore ne rembiguaikuéra ningo roju mombyryetereígui,+ ha romombaʼe nde Jára Jehová réra, pórke roikuaa kuri opárupi oñeñeʼẽha hese ha rohendu avei mbaʼépa ojapo vaʼekue Egíptope.+
10 Avei roikuaa opa mbaʼe ojapo vaʼekue umi mokõi rréi amorréore oĩva pe ótro ládo pe Jordángui, umíva hína pe rréi Sehón+ de Hesbón ha pe rréi Og+ de Basán, oĩ vaʼekue Astarótpe.
11 Upévare umi kuimbaʼe oremoakãva* ha enterovete oikóva ore yvýpe heʼi oréve: ‘Pejagarra pegueraha hiʼupy pende aviorã ha tapeho hendapekuéra. Ha peje chupekuéra: “Roikóta pene rembiguáiramo.+ Pejapóna orendive koʼág̃a peteĩ kompromíso”’.+
12 Ko pan rogueru vaʼekue ore aviorã ningo haku asy kuri rosẽrõ guare ore rógagui roju hag̃ua koʼápe. Ha koʼág̃a pehecháma mbaʼéichapa ituja, havẽmba ha ikuʼipaitéma.+
13 Koʼã víno ryru katu ipyahuete kuri romyenyhẽrõ guare, péro koʼág̃a okapupáma orehegui.+ Ha la ore ao ha ore sandália katu ituja ha ojegastapáma orehegui, ipukueterei rupi la ore viáhe”.
14 Upépe umi kuimbaʼe israelita ojagarra ha orrevisa umi hiʼupy ogueru vaʼekue hikuái, péro noporandúi mbaʼeve Jehovápe.+
15 Upémarõ Josué ojapo hendivekuéra la tráto oiko porã hag̃ua hikuái oñondive,+ ha ani hag̃ua ojuka chupekuéra. Ha umi omoakãva pe puévlo* ohura okumplitaha iñeʼẽ.+
16 Upéi 3 día haguépe, ojapo rire hendivekuéra pe kompromíso, umi israelita oikuaa ag̃uieténte oikoha hikuái, ivesinokueraite raʼe.
17 Upémarõ umi israelita osẽ oho upe oĩhágui, ha og̃uahẽ umi isiudakuérape pe tercer díape. Umi isiudakuéra hína Gabaón,+ Kefirá, Beerot ha Quiryat-Jearim.+
18 Péro umi israelita ndoatakái chupekuéra, pórke umi omoakãva pe puévlo ohura kuri Ijára Jehová rérare ndojapomoʼãiha hesekuéra mbaʼeve.+ Upévare pe puévlo kompletoite oñepyrũ ojeplagea ha oñeʼẽ vai umi omoakãvare chupekuéra.
19 Upépe umi kuimbaʼe omoakãva umi israelítape heʼi pe puévlope: “Ore rohuráma chupekuéra Jehová Israel Jára rérare, upévare ndaikatumoʼãi jajapo hesekuéra mbaʼeve.
20 Ndajajukamoʼãi chupekuéra ani hag̃ua Ñandejára ipochy ñanendive nañakumplíri haguére upe jahura vaʼekue chupekuéra”.+
21 Upéi umi omoakãva pe puévlo osegi heʼi: “Jahejáta chupekuéra toikove, péro haʼekuéra ojapóta jepeʼa ha oguenohẽta y kompletoite pe puévlope g̃uarã”. Péva opromete chupekuéra umi omoakãva pe puévlo.
22 Upéi Josué ohenói chupekuéra ha heʼi: “¿Mbaʼére piko orembotavy pejévo: ‘Ore ningo mombyryetereígui roju’, péro ag̃uieténte peiko raʼe orehegui?+
23 Koestedía guive peẽ peñemaldesi,+ ha siémpre peikóta esklávoramo, pejapóta jepeʼa ha peguenohẽta y che Jára rógape g̃uarã”.
24 Ha haʼekuéra heʼi Josuépe: “Rojapo ningo péicha pórke oñemombeʼu porã kuri oréve nde Jára Jehová omanda hague isiérvo Moiséspe omeʼẽ hag̃ua peẽme ko yvy kompletoite, ha ohundipa vaʼerãha pene renonderãgui umi oikóvape pype.+ Upéicha rupi rokyhyjeterei peẽ orejukapárõ g̃uarã,+ ha upévare rojapo péicha.+
25 Ha koʼág̃a roñemoĩ pende poguýpe. Ejapo katu orerehe la repensáva oĩ porãvetaha”.
26 Ha haʼe oprotehe umi héntepe ha ndohejái umi israelita ojuka chupekuéra. Péicha ojapo Josué hesehapekuéra.
27 Péro upe día guive Josué omeʼẽ chupekuéra hembiaporã: ombyaty vaʼerã hikuái jepeʼa ha oguenohẽ vaʼerã y pe puévlo kompletoitépe g̃uarã+ ha Jehová altárpe g̃uarã, pe lugár Haʼe oiporavohápe.+ Ha péicha osegi hikuái koʼag̃aite peve.+
