Números 15:1-41
15 Jehová oñeʼẽ jey Moiséspe ha heʼi:
2 “Ere umi israelítape: ‘Ág̃a peike vove pe yvy ameʼẽtavape peẽme peiko hag̃ua,+
3 ha pejapo peteĩ ofrénda ojehapýva+ Jehovápe g̃uarã, tahaʼe peteĩ tóro térã vaka, ovecha térã kavara, hyakuã asy* hag̃ua Jehovápe,+ tahaʼe peteĩ ofrénda ojehapýva térã peteĩ sakrifísio oñekumpli hag̃ua peteĩ promésa, térã ofrénda voluntária,+ ỹrõ peteĩ ofrénda oñemboarete jave umi fiésta+ ojejapóva jepi voi,
4 upéicharõ pe oguerúva iñofrénda opresenta vaʼerã avei Jehovápe peteĩ ofrénda de semílla: una décima de efá* arína iporãva+ oñembojeheʼa pyréva 1 lítro* aséitere.
5 Ha ojejapo vove pe ofrénda ojehapýva+ térã ojesakrifika vove káda ovecha raʼyrusu mácho, haʼe ogueru vaʼerã avei 1 lítro* víno ojejapo hag̃ua pe ofrénda líkida.
6 Ha ojesakrifika vove peteĩ ovecha mácho, haʼe oofrese vaʼerã ofrénda de semíllaramo 2 décima de efá* arína iporãva, oñembojeheʼa pyréva 1 lítro un cuarto* aséitere.
7 Avei ogueru vaʼerã 1 lítro un cuarto* víno ojejapo hag̃ua pe ofrénda líkida, ikatu hag̃uáicha otimbo ha hyakuã asy* Jehovápe g̃uarã.
8 Péro reofreséramo peteĩ tóro rejapo hag̃ua peteĩ ofrénda ojehapýva,+ térã peteĩ sakrifísio rekumpli hag̃ua peteĩ promésa,+ térã peteĩ ofrénda de paz Jehovápe g̃uarã,+
9 upéicharõ reofrese vaʼerã pe tórondi peteĩ ofrénda de semílla+ orekóva 3 décima de efá* arína iporãva, oñembojeheʼa pyréva 2 lítro* aséitere.
10 Avei reofrese vaʼerã 2 lítro* víno ojejapo hag̃ua pe ofrénda líkida,+ rejaporamoguáicha ofrénda ojehapýva, ikatu hag̃uáicha otimbo ha hyakuã asy* Jehovápe g̃uarã.
11 Péicha ojejapo vaʼerã ojeofrese vove peteĩ tóro, peteĩ ovecha mácho, peteĩ ovecha raʼyrusu máchova térã peteĩ kavara.
12 Tahaʼe haʼéva pe kantida peofreséva, peẽ pepresenta vaʼerã káda únondi pe arína oñembojeheʼa pyréva aséitere ha pe ofrénda líkida.
13 Péicha ojapo vaʼerã umi israelita opresenta jave peteĩ ofrénda ojehapýva ha hyakuã asýva* Jehovápe g̃uarã.
14 Ha peteĩ extranhéro oikóva penendive, térã peteĩ persóna oikómava pende apytépe heta tiémpore, ohapyséramo peteĩ ofrénda hyakuã asýva* Jehovápe g̃uarã, ojapo vaʼerã peẽ pejapohaichaite avei.+
15 Oĩta peteĩ léinte peẽ israelita ha umi extranhérope g̃uarã. Ko léi siémpre pekumpli vaʼerã peẽ ha umi pene familiare. Jehová renondépe peteĩchaite pekumpli vaʼerã pe léi, tahaʼe extranhéro térã israelita.+
16 Peteĩ léinte oĩ vaʼerã ha peteĩchante ojehusga vaʼerã umi israelita ha extranherokuéra oikóvape pende apytépe’”.
17 Jehová osegi oñeʼẽ Moiséspe ha heʼi chupe:
18 “Ere umi israelítape: ‘Peike vove pe yvy poguerahahápe hína peiko hag̃ua,
19 ha peʼu vove umi mbaʼe* oprodusíva pe yvy,+ peẽ pemeʼẽ vaʼerã upévagui peteĩ kontrivusión Jehovápe.
20 Pe trígo tenonderãite pekosecháva+ pemolina vaʼerã vai vai, ha pejapo chugui pan argólla ha pemeʼẽ ofréndaramo Ñandejárape. Ko ofrénda remeʼẽ vaʼerã chéve, remeʼẽháicha avei chéve umi mbaʼe reguenohẽ vaʼekue pe lugár oñemopotĩhágui semílla.
21 Peẽ ha pene familiare siémpre pemeʼẽ vaʼerã ofréndaramo Jehovápe peteĩ párte pende arína, umi trígo primeroite pemolina vai vai vaʼekuégui.
22 Ha peẽ pejavýramo ha ndapejapói koʼã léi Jehová omeʼẽ vaʼekue Moiséspe,
23 entéro umi mbaʼe Jehová heʼi vaʼekue Moisés rupive pejapo vaʼerãha peẽ ha pene familiare, pe día Jehová heʼi ypy guive chupe,
24 ha pejavýramo ha pe puévlo ndopillái upéva, upéicharõ pe puévlo oofrese vaʼerã peteĩ tóro raʼyrusu ojejapo hag̃ua peteĩ ofrénda ojehapýva ha hyakuã asýva* Jehovápe. Oofrese vaʼerã upévandi pe ofrénda de semílla ha ofrénda líkida ojejapoháicha jepi voi.+ Avei oofrese vaʼerã peteĩ kavara raʼyrusu ojejapo hag̃ua pe ofrénda ojepaga hag̃ua umi pekádore.+
25 Ha pe saserdóte oofreséta koʼã mbaʼe umi israelita rehehápe oñeperdona hag̃ua chupekuéra. Ha oñeperdonáta chupekuéra,+ pórke ojavýnte kuri hikuái, ha omeʼẽ Jehovápe peteĩ ofrénda ojehapýva ha omeʼẽ avei Jehovápe peteĩ ofrénda ojepaga hag̃ua umi pekádore, upe mbaʼe vai ojapo vaʼekuére hikuái ojaposeʼỹre.
26 Oñeperdonáta entéro umi israelítape ha avei umi extranhéro oikóvape hendivekuéra, pórke haʼekuéra ojavýnte kuri ha ojapo ojaposeʼỹrente upe mbaʼe vai.
27 Ha peteĩ persóna opekáramo ojapo rupi peteĩ mbaʼe vai ojaposeʼỹre, upéicharõ oofrese vaʼerã peteĩ kavara kuña de un áño ojejapo hag̃ua pe ofrénda ojepaga hag̃ua umi pekádore.+
28 Pe saserdóte oofreséta upéva pe persóna rehehápe, ha péicha oñeperdonáta chupe+ upe mbaʼe vai ojapo vaʼekue ojaposeʼỹre Jehová renondépe.
29 Tahaʼe israelita térã extranhéro oikóva pende apytépe, peteĩ léinte oĩta peẽme g̃uarã ha chupekuéra g̃uarã, oĩramo ojapóva peteĩ mbaʼe vai ojaposeʼỹre.+
30 Péro oĩramo ojapóva peteĩ mbaʼe vai oikuaa porãramo jepe oĩ vaiha upéva,+ tahaʼe israelita térã extranhéro, upe persóna ombopochy hína Jehovápe ha ojejuka vaʼerã chupe.
31 Haʼe odespresia Jehová ñeʼẽ ha nokumplíri iléi, upévare ojejuka vaʼerã katuete chupe.+ Upe persóna oĩta rresponsávle upe mbaʼe vai ojapóvare’”.+
32 Umi israelita oĩ aja pe desiértope, otopa peteĩ kuimbaʼe ombyatýva hína jepeʼa peteĩ sábadope.+
33 Umi otopa vaʼekue hese ombyatyhápe jepeʼa, ogueraha upe kuimbaʼépe, Moisés, Aarón ha entéro israelita rendápe.
34 Haʼekuéra ojagarra upe kuimbaʼépe ha oheja chupe préso,+ ndojekuaáigui mbaʼépa ojejapo vaʼerã chugui.
35 Ha Jehová heʼi Moiséspe: “Upe kuimbaʼépe ojejuka vaʼerã katuete.+ Penohẽ pe kampaméntogui ha pe puévlo ojapi vaʼerã chupe itápe omano meve”.+
36 Upémarõ pe puévlo oguenohẽ chupe pe kampaméntogui ha ojapi chupe itápe omano meve, Jehová heʼi haguéicha Moiséspe.
37 Upéi Jehová heʼi Moiséspe:
38 “Eñeʼẽ umi israelítape ha ere chupekuéra: ‘Pembofléko vaʼerã pende ao ruguái, ha pe fléko ári pemoĩ vaʼerã peteĩ piolín hovy. Peẽ ha pene familiare siémpre pemoĩ vaʼerã upéva pende aóre.+
39 Pemoĩ vaʼerã umi fléko pende ao ruguáire, péicha pemañávo hese penemanduʼáta entéro umi léi Jehová omeʼẽvare peẽme ha pekumplíta umíva.+ Peẽ ndapejapói vaʼerã pene korasõ ha pende resa oipotávante, pórke pejapo rupi umi mbaʼe peẽ petraisiona hína Ñandejárape.*+
40 Ameʼẽ peẽme ko léi penemanduʼa ha pekumpli hag̃ua entéro umi léi ameʼẽva peẽme, péicha penepotĩta Ñandejára renondépe.+
41 Che hína Jehová pende Jára, poguenohẽ vaʼekue Egíptogui oiko hag̃ua chehegui pende Jára.+ Che hína Jehová pende Jára’”.+
Nóta
^ Térã: “omombytuʼu, okalma”. Hebréope: “otrankilisa”.
^ Hebréope: “un cuarto de hin”.
^ Upéva oreko en totál 2,5 kílorupi.
^ Hebréope: “un tercio de hin”.
^ Hebréope: “un tercio de hin”.
^ Térã: “omombytuʼu, okalma”. Hebréope: “otrankilisa”.
^ Upéva oreko en totál 3,5 kílorupi.
^ Hebréope: “médio hin”.
^ Hebréope: “médio hin”.
^ Térã: “omombytuʼu, okalma”. Hebréope: “otrankilisa”.
^ Térã: “omombytuʼúva, okalmáva”. Hebréope: “otrankilisáva”.
^ Térã: “omombytuʼúva, okalmáva”. Hebréope: “otrankilisáva”.
^ Hebréope: “pe pan”.
^ Térã: “omombytuʼúva, okalmáva”. Hebréope: “otrankilisáva”.
^ Térã: “ojeprostitui espirituálmente”.
