Números 22:1-41
22 Upe rire umi israelita osẽ ha oho oiko pe desiérto de Moábpe, oĩva hína pe Jordánpe, Jericó rovaiete.+
2 Ha Balac,+ Zipor raʼy, ohecha opa mbaʼe ojapo vaʼekue Israel umi amorreokuérare,
3 upéicha rupi haʼe ha umi moabita okyhyjeterei, pórke hetaiterei umi israelita. Umi moabita ningo oryrýi osusũ opytávo okyhyjetereígui chuguikuéra.+
4 Upémarõ umi moabita heʼi umi kuimbaʼe omoakãvape* Madián:+ “Koʼã hénte ningo ohundipaitéta opa mbaʼe oĩva ñande jerére ha omoperõta ñande yvy, umi tóro omoperõháicha pe kapiʼipe”.
Upérõ ningo Balac, Zipor raʼy, rréi kuri Moábpe.
5 Haʼe omondo peteĩ mensahéro Balaam rendápe. Balaam hína Beor raʼy ha oiko siuda de Petórpe,+ oĩva hína Rrío Éufrates ypýpe. Balac ohenoika chupe ha heʼi: “Peteĩ puévlo osẽ kuri Egíptogui ha hetaitereígui hikuái ojagarrapaite voi ko yvy,+ ha koʼág̃a oiko hína hikuái che território renondetépe.
6 Upévare ajerure ndéve ejumi hag̃ua ha emaldesi chéve ko puévlo,+ pórke haʼekuéra ningo imbareteve chehegui. Upéicharõ ikatu mbaʼe chepuʼaka hesekuéra ha amosẽmba chupekuéra upe lugár oĩhágui, pórke che aikuaa porã nde revendesívape oñevendesi, ha upe remaldesívape oñemaldesi”.
7 Upémarõ umi kuimbaʼe omoakãva Moab ha Madián oho Balaam+ rendápe, ha ogueraha chupe pláta oporomaldesi* hag̃ua. Haʼekuéra omombeʼu avei mbaʼe mbaʼépa heʼika chupe Balac.
8 Ha Balaam heʼi chupekuéra: “Pepytána peke koʼápe ko pyharépe, ha amombeʼúta peẽme mbaʼépa heʼi chéve Jehová”. Upémarõ umi prínsipe de Moab opyta oke Balaam rógape.
9 Ha Ñandejára oñeʼẽ Balaámpe ha heʼi:+ “¿Mávaiko koʼã kuimbaʼe opytáva nendive?”.
10 Balaam heʼi Ñandejára teépe: “Balac, Zipor raʼy, Moabpegua rréi heʼika chéve:
11 ‘Pe puévlo osẽ vaʼekue Egíptogui ningo hetaiterei, ojagarrapaite voi ko yvy, upévare ejumína ha emaldesi chéve ko puévlo,+ upéicharõ ikatu mbaʼe chepuʼaka hesekuéra ha amosẽ upe oĩhágui’”.
12 Péro Ñandejára heʼi Balaámpe: “Nderehói vaʼerã hendivekuéra, ha neremaldesíri vaʼerã pe puévlope, pórke che avendesíma chupekuéra”.+
13 Upéi Balaam opuʼã pyharevete ha heʼi umi prínsipe ombou vaʼekuépe Balac: “Tapeho jeýnte pene retãme, pórke Jehová nopermitíri chéve aha penendive”.
14 Upémarõ umi prínsipe de Moab osẽ oho jey Balac rendápe, ha heʼi chupe: “Balaam ndouséi orendive”.
15 Péro Balac omondo jey unos kuánto prínsipe hendápe, ha omondo voi hetave ha iñimportantevéva umi primero oho vaʼekuégui.
16 Haʼekuéra og̃uahẽ Balaam rendápe ha heʼi chupe: “Balac, Zipor raʼy, heʼika ndéve: ‘Anína reheja mbaʼeve ndejoko reju hag̃ua che rendápe,
17 pórke che ameʼẽta ndéve heta mbaʼe ha rombotuicháta, ha ajapóta oimeraẽ mbaʼe reipotáva. Ejumíntena che rendápe ha emaldesi chéve ko puévlope’”.
18 Péro Balaam heʼi Balac siervokuérape: “Balac omeʼẽramo jepe chéve hóga renyhẽ pláta ha órogui, che ndaikatumoʼãi ajapo mbaʼeve Jehová ndeʼíriramo chéve, tahaʼe michĩva térã tuicháva.+
19 Péro pepytána avei koʼápe ko pyharépe, ha jahecha mbaʼépa heʼi chéve Jehová”.+
20 Upéi, upe pyharépe Ñandejára oñeʼẽ Balaámpe ha heʼi: “Oimérõ koʼã kuimbaʼe ou raʼe nde piári, tereho hendivekuéra. Péro nde ere vaʼerã umi mbaʼe che haʼéva añoite ndéve”.+
21 Upémarõ Balaam opuʼã pyharevete, onsilla hymba vúrro* ha oho umi prínsipe de Moab ndive.+
22 Péro Ñandejára orrenegaiterei Balaam oho haguére, ha Jehová ánhel oho oñemoĩ pe tapépe ohapejoko hag̃ua chupe. Balaam ningo oho hína kuri hymba vúrro ári, ha mokõi isiérvo oho avei hendive.
23 Péro pe vúrro ohechávo Jehová ánhel oñemboʼyha hína pe tape mbytépe ha ipópe orekoha peteĩ espáda, pe vúrro oñehaʼã ojedesvia chugui oho hag̃ua pe ñúre. Upémarõ Balaam oñepyrũ ogarrotea hymba vúrro oho jey hag̃ua pe tapére.
24 Upévo Jehová ánhel oho oñemoĩ pe tape poʼípe ohasáva peteĩ parraltýrupi, ha mokõive ládo oĩ peteĩ múro.
25 Pe vúrro ohechávo Jehová ánhelpe, oñepyrũ oñemboja pe múrore ha ojopy Balaámgui ipy pe múrore, upévare Balaam oñemoĩ jey ogarrotea chupe.
26 Upémarõ Jehová ánhel ohomieve henonderãkuéra ha opyta jey oñemboʼy pe tape ipoʼivehápe, ha upépe ndaikatúi ojepia moõve gotyo, ni a la derécha ni a la iskiérda.
27 Ha pe vúrro ohecha jeývo Jehová ánhel, ojeity yvýpe ha upépe oñempaka Balaámgui. Upéva omorrenegaiterei Balaámpe ha oñemoĩ ogarrotea jey hymba vúrro ivastónpe.
28 Upéi Jehová oheja pe vúrro oñeʼẽ*+ Balaámpe ha heʼi: “¿Mbaʼe mbaʼéiko che ajapo nderehe ajeve péicha chegarrotea vaipa koʼã 3 vése?”.+
29 Balaam heʼi pe vúrrope: “Nde ningo reñembohory cherehe ha chemorrenega. Ha arekórire peteĩ espáda che pópe, ajeʼíma rojuka vaʼerãmoʼã”.
30 Upémarõ pe vúrro heʼi Balaámpe: “Che ningo ne rymba vúrro ymaite guivéma ha mboy tiémpoma piko reiko che ári, ¿ha che piko ajapómava nderehe péicha?”. Ha Balaam heʼi chupe: “Nahániri”.
31 Upépe Jehová ohesapeʼa+ Balaámpe ohecha hag̃ua Jehová ánhel, oñemboʼýva hína pe tape mbytépe ha orekóva ijespáda ipópe. Balaam katu ensegída oñesũ ha oñakãityete voi.
32 Ha Jehová ánhel heʼi chupe: “¿Mbaʼéreiko regarrotea ne rymba vúrro koʼã 3 vése? Che voi asẽ ne renonderãme rohapejoko hag̃ua, pórke nderejaposéi hína la haʼéva ndéve.+
33 Pe vúrro ningo cherecha kuri ha oñehaʼã ojedesvia chehegui koʼã 3 vése.+ ¡Eguatána ekalkula, ko vúrro ndojedesviáirire chehegui, ajeʼíma rojuka vaʼerãmoʼã ha aheja ko vúrro oikove!”.
34 Ha Balaam heʼi Jehová ánhelpe: “Afalla ningo raʼe, pórke che ndaikuaái kuri nde reimeha pe tapépe cherapejoko hag̃ua. Ha nde ndereipotáiramo aha, ndahamoʼãinte upéicharõ”.
35 Péro Jehová ánhel heʼi chupe: “Tereho katu umi kuimbaʼéndi, péro nde eréta umi mbaʼe che haʼévante ndéve”. Upémarõ Balaam okontinua iviáhe umi prínsipe de Moab ndive.
36 Balac oikuaávo Balaam oumaha, pyaʼe porã osẽ oho ohug̃uaitĩ chupe pe siuda de Moábpe, oĩva pe Arnón oríllape, opahápe Moab território.
37 Ha Balac heʼi Balaámpe: “Chéngo amondo kuri nde piarigua, ¿ha mbaʼéreiko nderejúi che rendápe? ¿Nde piko reimoʼã che ndaikatumoʼãiha ameʼẽ ndéve heta mbaʼe ha avei rombotuicha?”.+
38 Balaam heʼi Balácpe: “Oĩ porã, koʼág̃a ajúma ne rendápe, ¿péro ikatúpa haʼe ndéve peteĩ mbaʼe? Che ningo ikatúta haʼe ndéve umi mbaʼe Ñandejára heʼívante chéve”.+
39 Upéi Balaam oho Balac ndive Quiryat-Huzótpe.
40 Ha Balac osakrifika unos kuánto tóro ha ovecha, ha oguerahaka michĩmi umi animál roʼokue Balaam ha umi prínsipe oĩvape hendive.
41 Al ótro día pyhareve, Balac ogueraha Balaámpe ha ojupi hikuái Bamot-Baálpe. Upe guive ningo haʼe ohecha pe puévlo de Israélpe.+
Nóta
^ Hebréope: “ansianokuéra”.
^ Térã: “oadivina”.
^ Hebréope: “vúrra”.
^ Hebréope: “oavri ijuru pe vúrrape”.
