Números 3:1-51
3 Koʼãva haʼe vaʼekue Aarón ha Moisés familiare Jehová oñeʼẽrõ guare Moisés ndive Sérro Sinaípe.+
2 Koʼãva hína Aarón raʼykuéra réra: pe ijypykue héra Nadab, upéi ou Abihú,+ Eleazar+ ha Itamar.+
3 Péicha héra vaʼekue Aarón raʼykuéra, ojeporavo ha oñenombra* vaʼekue oservi hag̃ua de saserdóte.+
4 Péro Nadab ha Abihú omano vaʼekue Jehová renondépe pe desiérto de Sinaípe, pórke ojapo hikuái Jehová renondépe ofrénda* noñepermitíriva.+ Upévare haʼekuéra omano ifamiliaʼỹre. Eleazar+ ha Itamar+ katu osegi ombaʼapo de saserdóte itúa Aarón ndive.
5 Upéi Jehová heʼi Moiséspe:
6 “Egueru umi levítape+ Aarón rendápe ha toipytyvõ+ chupe.
7 Haʼekuéra okumpli vaʼerã pe rresponsavilida orekóva hendive ha avei entéro umi israelítandi, okumplívo hembiapokuéra pe tavernákulope.*
8 Haʼekuéra oñenkarga vaʼerã entéro umi tembiporu+ ojepurúvare pe tavernákulope, ha entéro umi israelita rekovia haʼekuéra ojapo vaʼerã opa mbaʼe oñekotevẽva pe tavernákulope.+
9 Ha remeʼẽ vaʼerã Aarón ha itaʼyrakuérape entéro umi levita oipytyvõ hag̃ua chupekuéra. Umi levita ningo oñemeʼẽ Aarónpe umi israelita apytégui oajuda hag̃ua chupe.+
10 Enombra vaʼerã Aarón ha itaʼyrakuérape, ha ojapo vaʼerã hikuái umi hembiapo otokáva chupekuéra saserdóteramo.+ Ha oimeraẽ ndahaʼéiva saserdóte* oñemoag̃uíramo pe tavernákulore, ojejuka vaʼerã”.+
11 Jehová osegi oñeʼẽ Moiséspe ha heʼi chupe:
12 “Che aiporavo umi levítape umi israelitakuéra apytégui, entéro umi israelita raʼy ypykue rekovia,+ ha umi levita opytáta chembaʼerã.
13 Entéro umi ijypykue chembaʼe hína.+ Pórke ajukárõ guare umi taʼýra ypykue oĩ vaʼekue Egíptope,+ che aiporavo chembaʼerã umi israelita raʼy ypykue ha umi hymbakuéra raʼy ypykue.+ Upévare entéro umi ijypykue chembaʼe hína. Che hína Jehová”.
14 Jehová oñeʼẽ jey Moiséspe pe desiérto de Sinaípe,+ ha heʼi chupe:
15 “Eanota umi levítape por família ha asegún máva familiarépa hikuái. Reanota vaʼerã entéro kuimbaʼe levita, umi orekóva guive un mes pára arríva”.+
16 Ha Moisés oanota umi levítape Jehová heʼi hagueichaite chupe.
17 Koʼãva hína Leví raʼykuéra réra: Guersón, Cohat ha Merarí.+
18 Koʼãva hína Guersón raʼykuéra réra ha umi família oúva chuguikuéra: Libní ha Simeí.+
19 Koʼãva hína Cohat raʼykuéra réra ha umi família oúva chuguikuéra: Amram, Izhar, Hebrón ha Uziel.+
20 Koʼãva hína Merarí raʼykuéra réra ha umi família oúva chuguikuéra: Mahlí+ ha Musí.+
Koʼãva hína umi família levita asegún máva familiarépa hikuái.
21 Guersón familiarégui ou umi libnita+ ha umi simeíta. Koʼãva haʼe vaʼekue umi guersonita.
22 En totál oñeanota 7.500 kuimbaʼe orekóva un mes pára arríva.+
23 Umi guersonita omoĩ ikampaménto pe tavernákulo atukupépe,+ oéste gotyo.
24 Lael raʼy Eliasaf hína pe omoakãva itúa ypykue familiarépe, umi guersonita familiakuérape.
25 Umi guersonita+ oñenkarga vaʼekue pe tavernákulore,+ umi téla oĩvare hiʼári,+ ha pe kortína+ oĩvare pe entrádape.
26 Avei umi téla+ ojepurúvare oñemongora hag̃ua pe tavernákulo oĩháme pe altár, pe kortína oĩvare pe korapy entrádape+ ha umi piolín ojepurúva umi télare. Haʼekuéra ojapo vaʼerã entéro mbaʼe oñekotevẽva ojejapo hag̃ua ko traváho.
27 Cohat familiarégui ou umi amramita, umi izharita, umi hebronita ha umi uzielita. Koʼãva haʼe vaʼekue umi cohatita.+
28 En totál oñeanota 8.600 kuimbaʼe orekóva un mes pára arríva. Haʼekuéra oñenkarga vaʼekue pe lugár sagrádore.+
29 Umi cohatita omoĩ ikampaménto sur gotyo pe tavernákulogui.+
30 Uziel+ raʼy Elizafán hína pe omoakãva itúa ypykue familiarépe, umi cohatita familiakuérape.
31 Umi cohatita oñenkarga vaʼekue pe árkare,+ pe mesáre,+ pe kandelávrore,+ umi altár rehe,+ umi tembiporukuéra+ ojepurúvare oñembaʼapo hag̃ua pe lugár sagrádope, ha pe kortína hyepypeguáre.*+ Haʼekuéra ojapo vaʼerã entéro mbaʼe oñekotevẽva ojejapo hag̃ua ko traváho.+
32 Eleazar+ omoakã vaʼekue umi levítape, ha ipoguýpe oĩ vaʼekue umi kuimbaʼe oñenkargáva pe lugár sagrádore. Haʼe hína Aarón pe saserdóte raʼy.
33 Merarí familiarégui ou umi mahlita ha umi musita. Koʼãva haʼe vaʼekue umi merarita.+
34 En totál oñeanota 6.200 kuimbaʼe orekóva un mes pára arríva.+
35 Abihail raʼy Zuriel hína pe omoakãva itúa ypykue familiarépe, Merarí familiarépe. Umi merarita omoĩ ikampaménto nórte gotyo pe tavernákulogui.+
36 Umi merarita oñenkarga vaʼekue umi armáhere,+ umi yvyra pukúre,+ umi orkón rehe,+ umi vaseʼi ikuávare mbytépe ha hembiporukuérare.+ Haʼekuéra ojapo vaʼerã entéro mbaʼe oñekotevẽva ojejapo hag̃ua ko traváho.+
37 Avei oñenkarga hikuái umi póste ojepurúvare oñemongora hag̃ua pe tavernákulo, umi vaseʼi ikuávare mbytépe,+ umi estákare ha umi piolín rehe.
38 Moisés, Aarón ha itaʼyrakuéra omoĩ ikampaménto pe tavernákulo renondépe, éste gotyo, pe kuarahyresẽ gotyo. Haʼekuéra oñenkarga vaʼekue pe lugár sagrádore, ha opa mbaʼe tekotevẽvare ojejapo umi israelita rehehápe. Ha oimeraẽ ndahaʼéiva saserdóte* oñemoag̃uíramo pe tavernákulore, ojejuka vaʼerã.+
39 Entéro umi kuimbaʼe levita orekóva guive un mes pára arríva, ohupyty en totál 22.000. Moisés ha Aarón oanota vaʼekue chupekuéra por família, Jehová heʼi hagueichaite.
40 Upéi Jehová heʼi Moiséspe: “Eanota entéro israelita raʼy ypykue orekóva un mes pára arríva.+ Ekonta mboýpa oĩ ha eanota herakuéra peteĩ lístape.
41 Eaparta vaʼerã umi levítape chembaʼerã, entéro umi israelita raʼy ypykue rekovia.+ Eaparta avei umi levita rymbakuéra, entéro umi israelita rymba raʼy ypykue rekovia.+ Che hína Jehová”.
42 Upémarõ Moisés oanota entéro taʼýra ypykue oĩva umi israelita apytépe, Jehová heʼi hagueichaite.
43 Entéro umi kuimbaʼe ypykue oñeanota vaʼekue ha orekóva un mes pára arríva ohupyty en totál 22.273. Káda únope oñeanota hérarupi.
44 Jehová osegi oñeʼẽ Moiséspe ha heʼi:
45 “Eaparta vaʼerã umi levítape chembaʼerã, entéro umi israelita raʼy ypykue rekovia. Eaparta avei umi levita rymbakuéra, entéro umi israelita rymbakuéra rekovia. Umi levita opytáta chembaʼerã. Che hína Jehová.
46 Umi taʼýra ypykue oĩva Israélpe hetave umi levítagui,+ upéicha rupi hemby 273 taʼýra ypykue israelita, ha umívare ojepaga vaʼerã.+
47 Káda únore oñemeʼẽ vaʼerã 57 grámo de pláta,*+ asegún pe kiláhe ojepurúva pe tavernákulope. Ha pe siclo ojepurúva oreko vaʼerã 20 guerá.*+
48 Pe pláta remeʼẽ vaʼerã Aarón ha itaʼyrakuérape ojepaga hag̃ua umi taʼýra ypykue hembývare”.
49 Upémarõ Moisés ojagarra pe pláta oñemeʼẽ vaʼekue ojepaga hag̃ua umi taʼýra ypykue hembývare.
50 Ha pe pláta ojagarra vaʼekue ohupyty 15 kílo 561 grámo,* asegún pe kiláhe ojepurúva pe tavernákulope.
51 Upéi Moisés omeʼẽ Aarón ha itaʼyrakuérape pe pláta oñemeʼẽ vaʼekue umi taʼýra ypykuére, Jehová heʼi haguéicha chupe. Moisés ojapo opa mbaʼe Jehová heʼi hagueichaite chupe.
Nóta
^ Hebréope: “tata”.
^ Hebréope: “oimeraẽ extráño”. Péva heʼise ndahaʼeiha Aarón familiare.
^ Ko kortína odividi vaʼekue pe tavernákulo.
^ Hebréope: “oimeraẽ extráño”. Péva heʼise ndahaʼeiha levita.
^ Hebréope: “1.365 siclo”.
