Números 5:1-31
5 Jehová oñeʼẽ jey Moiséspe ha heʼi chupe:
2 “Ere umi israelítape tomondo mombyry pe kampaméntogui umi ilépravape,+ umi hasykatúvape ha osẽvape hiʼórgano sexuálgui peteĩ líkido,+ ha umi oñemongyʼa vaʼekuépe opoko rupi peteĩ teʼonguére.+
3 Pemondo vaʼerã chupekuéra mombyry pe kampaméntogui, tahaʼe kuña térã kuimbaʼe. Peẽ pejapo vaʼerã péicha ani hag̃ua haʼekuéra omongyʼa+ pe kampaménto, pórke che aime hína pende apytépe”.+
4 Upémarõ umi israelita ojapo upéicha ha omondo umívape pe kampaméntogui. Umi israelita ojapo Jehová heʼi hagueichaite Moiséspe.
5 Jehová osegi oñeʼẽ Moiséspe ha heʼi:
6 “Ere umi israelítape: ‘Peteĩ kuimbaʼe térã peteĩ kuña opekáramo ojapoháicha jepi umi hénte, ha ojapo peteĩ mbaʼe Jehová heʼi vaʼekue ndojejapói vaʼerãha, upéicharõ haʼe ofalla hína Ñandejára renondépe.+
7 Ha omombeʼu vaʼerã+ hembiapo vaikue ha omyengoviapaite la oipeʼa vaʼekue hapichágui ofalla haguére hendive, ha omeʼẽve vaʼerã hiʼári 20 por ciento.+ Haʼe omeʼẽ vaʼerã koʼã mbaʼe upe hapicha operhudika vaʼekuépe.
8 Péro pe ojeperhudika vaʼekue omanóramo ha ndorekói ipariénte serkáno orresivi hag̃ua pe oñemyengoviátava chupe, upéicharõ oñemeʼẽ vaʼerã upéva Jehovápe ha opytáta pe saserdótepe g̃uarã. Ha upévandi oñemeʼẽ vaʼerã avei peteĩ ovecha mácho, ikatu hag̃uáicha pe saserdóte ojapo pe ofrénda pe persóna rehehápe ojepaga hag̃ua ipekádore.+
9 Entéro kontrivusión sagráda+ omeʼẽva umi israelita pe saserdótepe, opytátama pe saserdótepe g̃uarã.+
10 Umi mbaʼe sagrádo orekóva káda persóna, upéva imbaʼe hína. Ha oimeraẽ mbaʼe omeʼẽva peteĩ persóna pe saserdótepe, upéva opytáma pe saserdótepe g̃uarã’”.
11 Jehová osegi oñeʼẽ Moiséspe ha heʼi:
12 “Ere umi israelítape: ‘Peteĩ kuña omendáva oúramo hembiapo vai Ñandejára renondépe omoakãratĩvo iménape,
13 ha oreko rrelasión sexuál ótro kuimbaʼéndi,+ péro iména ndoikuaái upéva, ha ndojepillái chupe, upéicharõ pe kuña oñemongyʼa hína Ñandejára renondépe. Ndaipóriramo avave ohecháva chupe omombeʼu hag̃ua ojapo hague upéva ni avave ndopillái chupe ojapohápe upéva, upéicharõ ojejapo vaʼerã koʼã mbaʼe:
14 pe ména iselósoramo ha odeskonfia hembireko omoakãratĩ hague chupe, ndoikuaáiramo jepe siértopa térã nahániri,
15 upéicharõ pe kuimbaʼe ogueraha vaʼerã hembirekópe pe saserdóte renondépe, ha ogueraha vaʼerã avei hesehápe una décima de efá* arína de seváda ofrendarã. Haʼe nomoĩri vaʼerã aséite ni olívano upe ofréndare, pórke upéva peteĩ ofrénda de semílla omeʼẽva peteĩ iselósova, ha omomanduʼáva Ñandejárape pe kuña rembiapo vaíre ojekastiga hag̃ua chupe, oiméramo ojapo raʼe upe mbaʼe vai.
16 Upéi pe saserdóte ogueraháta pe kuñáme oñemboʼy hag̃ua Jehová renondépe.+
17 Ha pe saserdóte omoĩta y potĩ* peteĩ mbaʼyru ojejapo vaʼekuépe ñaiʼũgui, ha ojagarráta michĩmi yvy pe tavernákulogui ha opoíta pe ýpe.
18 Pe saserdóte ogueraháta chupe Jehová renondépe, opoíta pe kuña akãranguégui ha omoĩta ipópe pe ofrénda de semílla omomanduʼátava Ñandejárape, upéva hína pe iselósova ofrénda.+ Ha pe saserdóte oreko vaʼerã ipópe pe y iróva oguerúva maldisión.+
19 Pe saserdóte heʼíta pe kuñáme ohura hag̃ua, ha heʼíta chupe koʼã mbaʼe: “Oiméramo nde ndereguerekói raʼe rrelasión sexuál ótro kuimbaʼéndi reime aja ne ména poguýpe,+ ha neremoakãratĩri chupe, ni nereñemongyʼái Ñandejára renondépe, upéicharõ ndojapomoʼãi nderehe mbaʼeve ko y iróva oguerúva maldisión.
20 Péro oiméramo nde remoakãratĩ raʼe ne ménape reime aja ipoguýpe ha reñemongyʼa Ñandejára renondépe erekóvo rrelasión sexuál ótro kuimbaʼéndi...”.+
21 Ha pe saserdóte heʼíta pe kuñáme ohura hag̃ua oñemaldesitaha chupe oiméramo ojapo raʼe koʼã mbaʼe. Pe saserdóte heʼíta pe kuñáme: “Jehová nemoĩta ehémploramo pe puévlope g̃uarã, imanduʼa hag̃ua hikuái nderehe omaldesi ha ohura jave. Oiméramo nde rejapo raʼe ko mbaʼe, Jehová nopermitimoʼãvéima ndéve nememby* ha ombotuicháta ndehegui nde rye.
22 Ko y oguerúva maldisión oikéta nde retepýpe ha ombotuicháta nde rye ha ndaikatumoʼãvéima nememby”.* Upévo pe kuña heʼi vaʼerã: “¡Amén! ¡Amén!”.*
23 Upéi pe saserdóte oskrivíta koʼã maldisión pe lívrope ha ojohéi vaʼerã upéva pe y iróvape.
24 Pe saserdóte hoʼuka vaʼerã pe kuñáme pe y iróva oguerúva maldisión. Ha pe y oike vove hetepýpe ombohasýta chupe.
25 Pe saserdóte ojagarráta pe kuña pógui pe iselósova ofrénda de semílla,+ ha ombokacháta Jehová renondépe pe ofrénda de semílla ha ogueraháta pe altár ypýpe.
26 Ha pe saserdóte ojagarráta un púño pe ofrénda de semíllagui, ha upéva orrepresentáta pe ofrénda kompletoite. Upéi opoi vaʼerã pe altárpe ikatu hag̃uáicha okái ha otimbo,+ ha upéi hoʼukáta pe kuñáme pe y.
27 Oiméramo pe kuña oñemongyʼa raʼe Ñandejára renondépe omoakãratĩvo iménape, upéicharõ haʼe hoʼúvo pe y oguerúva maldisión, oikéta hetepýpe ha ombohasýta chupe, ha ombotuicháta chugui hye ha ndaikatumoʼãvéima imemby.* Avei pe puévlo imanduʼáta pe kuñáre oporomaldesi jave.
28 Péro oiméramo pe kuña noñemongyʼái ha ipotĩ Ñandejára renondépe, upéicharõ ndojekastigamoʼãi chupe ha ikatúta hyeguasu ha imemby.
29 Kóva hína pe léi heʼíva mbaʼépa ojapo vaʼerã peteĩ iselósova,+ oĩramo peteĩ kuña omoakãratĩva iménape oĩ aja ipoguýpe ha oñemongyʼáva Ñandejára renondépe,
30 térã peteĩ kuimbaʼe iselósoramo ha odeskonfia hembireko omoakãratĩha chupe, upéicharõ haʼe ogueraha vaʼerã hembireko Jehová renondépe ha pe saserdóte ojapo vaʼerã opa mbaʼe heʼíva ko léipe.
31 Pe kuimbaʼépe ndojekulpamoʼãi mbaʼevére, péro hembirekópe ojekastiga vaʼerã pe hembiapo vaikuére’”.
Nóta
^ Hebréope: “y sagrádova”.
^ Hebréope: “omokangýta ne rumby”. Koʼápe oiméne oñeñeʼẽ hína umi órgano sexuál rehe.
^ Hebréope: “omokangýta ne rumby”. Koʼápe oiméne oñeñeʼẽ hína umi órgano sexuál rehe.
^ Térã: “¡Taupéicha! ¡Taupéicha!”.
^ Hebréope: “omokangýta humby”. Koʼápe oiméne oñeñeʼẽ hína umi órgano sexuál rehe.
