Zacarías 5:1-11
5 Amaña jey ha ahecha peteĩ visión rupive peteĩ kuatiañeʼẽ* ovevéva.
2 Ha pe ánhel oporandu chéve: “¿Mbaʼépa rehecha?”.
Ha che akontesta chupe: “Ahecha peteĩ kuatiañeʼẽ ovevéva, ipukúva 8 métro 90 sentímetro* ha ipéva 4 métro 45 sentímetro”.*
3 Upépe pe ánhel heʼi chéve: “Kóva hína pe maldisión osẽva ko yvy tuichakuére, pórke entéro umi mondaha+ ndojekastigái gueteri koʼág̃a peve, oĩháicha umi maldisión un ládo pe kuatiañeʼẽme, ha umi ijapúva ohura jave+ ndojekastigái gueteri koʼág̃a peve, oĩháicha umi maldisión pe ótro ládo pe kuatiañeʼẽme.
4 ‘Amondóma ko maldisión’, heʼi Jehová, umi ehérsito yvagapegua ruvicha, ‘ha oikéta pe mondaha rógape ha pe ijapúva rógape, upe ijapúva ohura jave che rérape, ha opytáta umíva rógape ha ohundipaitéta umi óga, umi ijyvyra ha ijitakuéra’”.
5 Upémarõ pe ánhel oñeʼẽva chendive oñemboja che rendápe ha heʼi chéve: “Emañamína, ha ehecha mbaʼépa la osẽva hína”.
6 Ha che aporandu: “¿Mbaʼe piko péva?”.
Ha haʼe heʼi chéve: “Pe osẽva haʼe hína peteĩ mbaʼyru oñemoĩha semílla”.* Ha heʼive chéve: “Péicha hína umi hénte ko yvy tuichakuére”.
7 Ha ahecha oñemopuʼãha pe mbaʼyru tápa de plómo ijapuʼáva, ha hyepýpe oĩha peteĩ kuña oguapýva hína.
8 Upépe haʼe heʼi: “Ko kuñáme oñembohéra Umi Mbaʼe Aña”. Upémarõ haʼe omyaña chupe oike jey hag̃ua pe mbaʼyrúpe, ha omboty pe mbaʼyru pe tápa de plómope.
9 Upéi amaña ha ahecha mokõi kuña ovevéva yvate pe yvytúre ha oñemoag̃uíva hína oúvo. Haʼekuéra ipepo, ha umi ipepo ojogua siguéña pepópe. Ha haʼekuéra ohupi pe mbaʼyru yvate yvágare.*
10 Upémarõ aporandu pe ánhel oñeʼẽvape chendive: “¿Moõ piko ogueraha hikuái pe mbaʼyru?”.
11 Haʼe okontesta chéve: “Ogueraha hikuái Sinárpe,*+ upépe omopuʼãta hikuái peteĩ óga pe kuñáme g̃uarã. Ha pe óga ojejapopa vove, oñemoĩta chupe upépe hendag̃uaitépe”.
Nóta
^ Hebréope: “10 codo”.
^ Hebréope: “efá”. Kóva hína peteĩ mbaʼyru térã kanásto oñemediha un efá. Un efápe ija hína 22 lítro. Ehecha Info. B14.
^ Hebréope: “éntre pe yvy ha pe yvága”.
^ Upéva hína Babilonia.
