Apocalipsis 14:1-20
14 Ha ahecha pe Ovecha Raʼy+ oñemboʼýva pe Sérro Siónpe,+ ha hendive 144.000+ orekóva isyváre pe Ovecha Raʼy réra ha avei Itúa+ réra.
2 Ahendu peteĩ tyapu oúva yvágagui, haʼete y osyrýva kontinuadoite, ha arasunu hyapu hatãva. Pe ahendúva haʼete heta músiko opurahéiva ha ombopúva hiʼárpa.
3 Haʼekuéra opurahéi peteĩ músika haʼetéva peteĩ purahéi pyahu.+ Opurahéi hikuái pe tróno renondépe, avei umi 4 keruvín*+ ha umi ansiáno+ renondépe. Ha avave ndaikatúi opurahéi upe músika, síno umi 144.000+ añoite. Ñandejára ojogua vaʼekue chupekuéra ko yvýgui.
4 Koʼãva hína umi noñemongyʼái vaʼekue kuñándi, haʼekuéra hekopotĩ,*+ ha osegi hikuái pe Ovecha Raʼýpe toho ohohápe.+ Chupekuéra ojejogua+ vaʼekue yvyporakuéra apytégui, ha haʼekuéra hína pe kosécha primeroite+ oñemeʼẽva Ñandejárape ha pe Ovecha Raʼýpe.
5 Haʼekuéra nombotavýi avavépe heʼíva rupive, ha ndorekói ni peteĩ defékto.+
6 Ha ahecha ótro ánhel ovevéva yvága mbytére, haʼe oreko notísia porã opytátava pára siémpre. Haʼe oikuaauka ko notísia porã umi oikóvape ko yvy ári, entéro tetã, trívu, puévlo ha umi oñeʼẽvape diferénte idióma.+
7 Ha pe ánhel hatã heʼi: “Perrespeta Ñandejárape ha pembotuicha chupe, pórke og̃uahẽma pe óra haʼe oporohusga+ hag̃ua. Upévare, peadora Ñandejárape, upe ojapo vaʼekue yvága, yvy, mar+ ha yvukuéra”.
8 Ha pe segundo ánhel ou upe rire ha heʼi: “¡Hoʼáma! ¡Babilonia Guasu+ hoʼáma!+ Haʼe hoʼuka vaʼekue entéro tetãme ivíno, upéva hína pe víno omoakãrakúva chupekuéra hekovai*+ hag̃ua”.
9 Upéi pe tercer ánhel osegi chupekuéra ha hatã heʼi: “Oĩramo oadoráva pe animál salváhepe+ ha haʼangápe, ha orresivíva peteĩ márka isyváre térã ipóre,+
10 hoʼúta avei Ñandejára víno, upéva hína ipochykue. Péva peteĩ víno ipuroitéva,+ Ñandejára oñohẽtava ikópape omoĩháme ipochykue. Ha upe persónape oñembohasa asýta tata ha asúfrepe,+ umi ánhel ipotĩva renondépe ha pe Ovecha Raʼy renondépe.
11 Umichagua hénte ohasa asýta* tatápe ha pe hatatĩ osegíta opa ára g̃uarã.+ Ára ha pyhare oñembohasa asýta chupekuéra. Péicha ojehúta umi oadorávape pe animál salváhepe ha haʼangápe, ha oimeraẽ ohejávape oñemoĩ hese pe animál salváhe réra peteĩ márkaicha.+
12 Upévare tekotevẽ umi ojeporavo vaʼekue*+ oaguantakuaa, haʼekuéra okumpli Ñandejára mandamiénto ha ojerovia mbarete+ Jesús rehe”.*
13 Ha ahendu peteĩ oñeʼẽva yvágagui ha heʼíva: “Eskrivi koʼã mbaʼe: ovyʼáta umi ñande Ruvicha disipulokuéra*+ omanóva ko tiémpo guive. Si, pe espíritu heʼi: topytuʼu hikuái hembiapógui, pórke umi mbaʼe porã ojapo vaʼekue ndopytamoʼãi tesaráipe”.*
14 Ha upéi ahecha peteĩ arai morotĩ ha hiʼári peteĩ ojoguáva yvypóra raʼýpe.+ Haʼe oreko iñakãre peteĩ koróna de óro ha ipópe peteĩ machéte* haimbéva.
15 Ha ótro ánhel osẽ pe témplogui* ha hatã heʼi pe oguapývape pe arai ári: “Ejagarra ne machéte* ha ekosecha, pórke og̃uahẽma pe tiémpo ojekosecha hag̃ua. Pe plantasión ko yvy arigua oĩma ojekosecha hag̃uáicha”.+
16 Upémarõ pe oguapýva pe arai ári, ojagarra imachéte* ha okosecha pe plantasión ko yvy arigua.
17 Ha ótro ánhel osẽ pe témplo oĩvagui yvágape ha haʼe oreko avei peteĩ machéte* haimbéva.
18 Ha ótro ánhel osẽ pe altárgui, ha haʼe oreko autorida odomina hag̃ua pe tata. Ha hatã heʼi pe orekóvape pe machéte* haimbéva: “Ejagarra ne machéte* haimbéva ha eikytĩ ha embyaty pe parrál yvy arigua, pórke hiʼajupáma”.+
19 Upéi pe ánhel ojagarra imachéte,* oikytĩ pe parrál yvy arigua ha omombo pe lugár oñeñamiháme umi parrál, upéva orrepresenta Ñandejára pochykue.+
20 Umi kavaju opyrũ umi parrál rehe okápe pe siudágui, ha pe tuguy osẽva upe lugár oñeñamihágui pe parrál ojupi ohupyty peve umi kavaju akã, ha osyry 296 kilómetrorupi.*
Nóta
^ Griégope: “vírhen”.
^ Térã: “oĩta ñembotyhápe, préso”.
^ Griégope: “umi sánto”.
^ Térã: “oñakarama hatã Ñandejára jeroviáre Cristo ojapo haguéicha”.
^ Térã: “umi ojoajúva ñande Ruvicha ndive”.
^ Griégope: “umi mbaʼe ojapo vaʼekue oho hendivekuéra”.
^ Térã: “hoz”.
^ Upéva hína pe lugár hérava Santísimo oĩva pe témplope.
^ Térã: “hoz”.
^ Térã: “hoz”.
^ Térã: “hoz”.
^ Térã: “hoz”.
^ Térã: “hoz”.
^ Térã: “hoz”.
