Ezequiel 12:1-28
12 Jehová oñeʼẽ jey chéve ha heʼi:
2 “Yvypóra raʼy, nde ningo reiko hína umi hénte opuʼãva cherehe apytépe. Haʼekuéra hesa péro ndohechái, ijapysa péro nohendúi,+ pórke umi hénte opuʼã hína cherehe.+
3 Ha nde katu yvypóra raʼy, eprepara ne volsón ku rehotaramoguáicha prisionéroramo ne retãgui. Upéi de diakue rejapo vaʼerã ku rehoramoguáicha prisionéroramo ótro tetãme haʼekuéra omaña aja nderehe. Tereho nde rógagui ótro lugárpe haʼekuéra omaña aja nderehe. Ikatu mbaʼe ningo ohecha hikuái upéva, jepe umi hénte oñemoĩ hína cherehe.
4 De diakue omaña aja hikuái nderehe, reguenohẽ vaʼerã ne volsón eprepara vaʼekue reho hag̃ua prisionéroramo, ha reho vaʼerã kaʼaruete haʼekuéra omaña aja nderehe. Resẽ vaʼerã reho ku rejegueraharamoguáicha prisionéroramo ótro tetãme.+
5 Ha omaña aja hikuái, embokua nde róga pare, ha embohasa nde kosakuéra pe ikuahárupi.+
6 Omaña aja hikuái, emoĩ nde kosakuéra ne lómore ha egueraha pyharekue. Emoʼã nde rova ani hag̃ua rehecha pe yvy, pórke ajapo ndehegui peteĩ señál Israel rogayguápe g̃uarã”.+
7 Ajapo upe oñemanda hagueichaite chéve. De diakue aguenohẽ che volsón aha hag̃ua prisionéroramo ótro tetãme ha kaʼaruete che porupiete ambokua pe pare. Ha pytũmbývo, ajagarra che kosakuéra agueraha che lómore omaña aja hikuái cherehe.
8 Upéi pyhareve Jehová oñeʼẽ jey chéve ha heʼi:
9 “Yvypóra raʼy, umi Israel rogaygua oñemoĩva cherehe oporandu ndéve mbaʼépa rejapo, ¿ajépa?
10 Ere chupekuéra: ‘Péicha heʼi Ñandejára Jehová ogovernáva opa mbaʼe: “Ko mbaʼe haʼéva, haʼe hína Jerusalén mburuvicha kóntrape,+ ha kompletoite umi Israel rogaygua kóntrape, oĩva hína pe siuda ryepýpe”’.
11 Ere vaʼerã: ‘Che hína peteĩ señál peẽme g̃uarã.+ Pe che ajapo hagueichaite ojejapóta hesekuéra, haʼekuéra ohóta prisionéroramo ótro tetãme.+
12 Pe mburuvicha oĩva ijapytepekuéra ogueraháta ilómore ikosakuéra ha osẽta oho pytũ jave. Haʼe ombokuáta pe murálla ha ombohasáta ikosakuéra upérupi.+ Haʼe omoʼãta hova pono ohecha pe yvy’.
13 Apoíta hiʼári che rred ha haʼe hoʼáta pype.+ Upéi agueraháta chupe Babilóniape umi caldeokuéra yvýpe péro ndohechamoʼãi pe yvy, ha omanóta upépe.+
14 Ha amosarambíta opa gotyo ládo enterove umi oĩvape ijerére,+ umi iñajudantekuéra ha ijehérsito, ha aguenohẽta peteĩ espáda apersegi hag̃ua chupekuéra.+
15 Ha oikuaáta hikuái che haʼeha Jehová, ág̃a amosarambipa vove chupekuéra umi nasionkuérarupi ha umi tetãnguérarupi.
16 Péro ahejáta unos kuánto ojesalva pe espádagui, ñembyahýi ha mbaʼasýgui, ikatu hag̃uáicha omombeʼu umi tetãnguéra ohotahápe entéro mbaʼe oporombojeguarúva ojapo vaʼekue hikuái. Ha oikuaáta hikuái che haʼeha Jehová”.
17 Upéi Jehová oñeʼẽ jey chéve ha heʼi:
18 “Yvypóra raʼy, reʼúvo ne pan eryrýi esusũ vaʼerã, ha tuicha kevránto ha jehasa asy reheve reyʼu vaʼerã.+
19 Ere vaʼerã umi hénte ko yvy ariguápe: ‘Péicha heʼi Ñandejára Jehová ogovernáva opa mbaʼe umi hénte oikóvape Jerusalénpe, oĩva Israel territóriope: “Kyhyjepópe hoʼúta hikuái ipán, ha tuicha kevránto reheve hoyʼúta, pórke umi oikóva pype iviolentoiterei,+ upévare ijyvykuéra opytáta nandi vera.+
20 Umi siuda oĩháme hénte oñehundipaitéta ha pe yvýgui oikóta peteĩ yvy perõ.+ Ha peikuaáta che haʼeha Jehová”’”.+
21 Ha Jehová oñeʼẽ jey chéve ha heʼi:
22 “Yvypóra raʼy, ¿mbaʼe piko pe ñeʼẽnga peẽ perekóva Israélpe heʼíva: ‘Ohasa la tiémpo ha umi visión opa rei’?+
23 Upévare ere chupekuéra: ‘Péicha heʼi Ñandejára Jehová ogovernáva opa mbaʼe: “Ndahejamoʼãvéima ojeʼe ko ñeʼẽnga, ha haʼekuéra ndoipurumoʼãvéima ko ñeʼẽnga Israélpe”’. Péro ere chupekuéra: ‘Hiʼag̃uimbaitéma hína umi día,+ ha oñekumplipaitéta entéro umi visión’.
24 Pórke ndaiporimoʼãvéima Israel rógape ni peteĩ visión japu ni adivinasión oporombojuruheʼẽva.*+
25 ‘“Pórke che Jehová añeʼẽta. Oimeraẽ mbaʼe haʼéva oñekumplíta itiempoitépe, ha ndotardamoʼãi.+ Peẽ peñemoĩva cherehe, peẽ peikove aja+ che haʼéta peteĩ mbaʼe ha akumplíta”, heʼi Ñandejára Jehová ogovernáva opa mbaʼe’”.
26 Ha Jehová oñeʼẽ jey chéve ha heʼi:
27 “Yvypóra raʼy, péicha heʼi hína umi hénte Israelgua:* ‘Hetaiterei gueteri ofalta oñekumpli hag̃ua pe visión haʼe ohecháva, ha ofaltáiti heta tiémpo oñekumpli hag̃ua umi mbaʼe oprofetisáva koʼág̃a’.+
28 Upévare ere chupekuéra, ‘péicha heʼi Ñandejára Jehová ogovernáva opa mbaʼe: “‘Ni peteĩ umi mbaʼe haʼéva guive ndotardamoʼãi, enteroite mbaʼe haʼe vaʼekue oñekumplíta’, heʼi Ñandejára Jehová ogovernáva opa mbaʼe”’”.
