Ezequiel 13:1-23
13 Ha Jehová oñeʼẽ jey chéve ha heʼi:
2 “Yvypóra raʼy, eprofetisa umi proféta de Israel kóntrape,+ ha ere umi oprofetisávape umi mbaʼe oúvante iñakãme:*+ ‘Pehendu mbaʼépa heʼi Jehová.
3 Péicha heʼi Ñandejára Jehová ogovernáva opa mbaʼe: “¡Aichejáranga umi proféta ñembotavy ndohecháiva ni peteĩ visión, ha oprofetisáva umi mbaʼe oúvante iñakãme!+
4 Israel, nde profetakuéra ningo haʼete umi aguara oikóva umi siuda hoʼapa vaʼekue apytépe.
5 Peẽ ndapehomoʼãi pemopuʼã jey umi murálla hoʼapa vaʼekue ha ojejapo vaʼekue itágui. Peẽ ndapejapomoʼãi upéva Israel rogayguápe g̃uarã+ ikatu hag̃uáicha oaguanta Jehová oñorairõha díape”.+
6 “Ohecha hikuái visión japu ha oprofetisa japu memete, ha heʼi hína: ‘Jehová heʼi péicha’, péro Jehová ndojokuáiri chupekuéra, ha haʼekuéra katu ohaʼarõ oñekumpli umi mbaʼe heʼíva.+
7 ¿Ndahaʼéi piko peteĩ visión japu la peẽ pehecháva, ha peprofetisa japu pejévo: ‘Jehová heʼi péicha’, che ndaʼéiramo jepe mbaʼeve?”’.
8 ‘Upévare, péicha heʼi Ñandejára Jehová ogovernáva opa mbaʼe: “‘Che añemoĩ pene kóntrape, pórke peẽ pende japu ha pemombeʼu umi visión japu’, heʼi Ñandejára Jehová ogovernáva opa mbaʼe”.+
9 Aipurúta che podér umi proféta kóntrape, umi omombeʼúva visión japu ha opredesíva japu.+ Haʼekuéra noĩmoʼãi che puévlo atrata porãva apytépe, ha herakuéra ndojeskrivimoʼãi Israel rogaygua dokuméntope, ha ndoumoʼãvéima avei Israel yvýpe. Ha peẽ peikuaáta che haʼeha Ñandejára Jehová ogovernáva opa mbaʼe.+
10 Upéva oikóta pórke haʼekuéra ogueraha che puévlope tape vaíre, heʼívo: “¡Jaiko pyʼaguapýpe!”, péro añetehápe ndaipóri pyʼaguapy.+ Haʼekuéra omopuʼã vai vai peteĩ pare, ha opintapaite kálpe* ani hag̃ua ojekuaa’.+
11 Ere umi opintávape kálpe upe pare hoʼataha. Oúta peteĩ aguaséro tuichaitereíva, hoʼáta amandáu tuichaicháva,* oipejúta yvytu atã ha oitypaitéta pe pare.+
12 Ha ág̃a hoʼa vove pe pare, umi hénte oporandúta peẽme: ‘¿Mbaʼe piko oiko raʼe pe kal peipuru vaʼekuégui pende parére?’.+
13 Upévare péicha heʼi Ñandejára Jehová ogovernáva opa mbaʼe: ‘Amboúta peteĩ aguaséro tuichaitereíva, ahejáta oipeju peteĩ yvytu hatãitereíva pórke chepochyeterei voi. Amboúta umi amandáu tuichaicháva ohundi hag̃ua pe pare, pórke arrenegaiterei hína.
14 Aitýta pe pare pepinta vaʼekue kálpe ha ajapetéta yvýre, ha pe isimiénto ojekuaapáta. Ág̃a pe siuda oñehundi vove peẽ pemanombáta hyepýpe, ha peẽ peikuaáta che haʼeha Jehová’.
15 ‘Ág̃a ahykuavopaite vove che pochykue pe parére ha umi opinta vaʼekuére kálpe, haʼéta peẽme: “Pe pare ndaiporivéima, ha umi opinta vaʼekue ndaiporivéima avei.+
16 Ha umi proféta de Israel odesapareséta, umi oprofetisáva Jerusalénpe ha ohecháva hína peteĩ visiónpe outaha pyʼaguapy chupe g̃uarã, péro añetehápe ndaipóri hína pyʼaguapy”’,+ heʼi Ñandejára Jehová ogovernáva opa mbaʼe.
17 Nde katu yvypóra raʼy, ejere emaña umi kuña nde puevlopeguáre oprofetisáva hína umi mbaʼe oúvante iñakãme, ha eprofetisa ikontrapekuéra.
18 Ere chupekuéra: ‘Péicha heʼi Ñandejára Jehová ogovernáva opa mbaʼe: “¡Aichejáranga umi kuña ombovyvýva oñondive umi sínta umi hénte jyváre* g̃uarã, ha ojapóva pañoléta opaichagua akãre g̃uarã, tahaʼe michĩva térã tuicháva, ojagarra hag̃ua umi hénte rekove!* ¿Peẽ piko pejagarra hína che puévlo rekove?* ¿Ha pejapo aja upéva piko peẽ peimoʼã pesalvataha pende rekove?*
19 Peẽ pechemotĩ che puévlo apytépe pekonsegi hag̃uánte michĩmi seváda ha pan,+ ha upearã pejuka umi* nomereséivape omano, ha peheja oikove umi* nomereséivape oikove, peẽ pejapo upéva pendejapúvo che puévlo ogueroviávape umi japu pejéva”’.+
20 Upévare péicha heʼi Ñandejára Jehová ogovernáva opa mbaʼe: ‘Ndachaʼeiete umi pene sintakuérare, peẽ kuña peipurúva hína umíva pejagarra hag̃ua umi héntepe* guyráicha, ha aipeʼáta pende jyvágui umi sínta ha asalváta umi peẽ pejagarra vaʼekuépe guyráicha.
21 Aipeʼáta pendehegui umi pañoléta ha asalváta che puévlope pende poguýgui, ha haʼekuéra ndoʼamoʼãvéima pene ñuhãme, ha peẽ peikuaáta che haʼeha Jehová.+
22 Pórke peẽ pemokorasõ rasy pe ihústovape pendejapúvo chupe,+ ha che nambohasaʼasyséi* kuri chupe, ha pemboliga umi iñañávape+ ani hag̃ua ojevy hape vaígui ha péicha osegi oikove.+
23 Upéicha rupi peẽ kuña ndapehechamoʼãvéima umi visión japu ni napeadivinamoʼãvéima mbaʼeve,+ ha che asalváta che puévlope pende poguýgui. Ha peẽ peikuaáta che haʼeha Jehová’”.
Nóta
^ Térã: “umi mbaʼe osẽva ipyʼapýguinte”.
^ Upéva heʼise omopuʼãha hikuái peteĩ pare kangy peteĩ óga ryepýpe ha opinta kálpe, péicha haʼetéta la imbaretéva pe pare.
^ Térã: “ha peẽ amandáu tuichaicháva peʼáta”.
^ Umíva hína umi sínta máhika oipurúva umi hénte ikódo térã ipyapýre.
^ Térã: “álma”.
^ Térã: “álma”.
^ Térã: “pene álma”.
^ Térã: “umi álma”.
^ Térã: “umi álma”.
^ Térã: “umi álmape”.
^ Térã: “nakevrantaséi”.
