Ezequiel 22:1-31
22 Ha Jehová oñeʼẽ jey chéve ha heʼi:
2 “Yvypóra raʼy, ¿nde piko reiméma preparádo rehusga hag̃ua* pe siuda ojekulpávape oporojuka haguére*+ ha reikuaauka hag̃ua chupe entéro umi mbaʼe oporombojeguarúva ojapo vaʼekue?+
3 Ere vaʼerã: ‘Péicha heʼi Ñandejára Jehová ogovernáva opa mbaʼe: “Nde ningo peteĩ siuda rejukáva+ umi hénte oĩvape nde pype, og̃uahẽmbaitéma hína pe tiémpo+ rejehusga hag̃ua, nde rejapóva umi dios puerkésa* reñemongyʼa hag̃ua.+
4 Nde kulpávle hína rejuka haguére umi héntepe,+ ha umi dios puerkésa katu nemongyʼa.+ Nde ningo rembyapura hína og̃uahẽ hag̃ua umi nde ára paha, ha og̃uahẽma huʼãme umi ne áño. Upévare oñeʼẽ vaíta nderehe umi tetãnguéra ha opárupi oñeñembohorýta nderehe.+
5 Umi tetãnguéra oĩva nde jerére ha umi oĩva mombyry oñembohorýta nderehe,+ nde ningo peteĩ siuda herakuã vaíva ha henyhẽva provlémagui.
6 Káda uno umi kuimbaʼe omoakãva israelitakuérape oĩva nde pype, Jerusalén, oipuru hína ijautorida oporojuka hag̃ua.*+
7 Umi hénte odespresia itúa ha isýpe.+ Ombotavy hikuái umi extranhéro oikóvape ijapytepekuéra, ha otrata vai pe mitã tyreʼỹme ha pe viúdape”’”.+
8 “‘Nde redespresia umi che lugár sagrádo ha remongyʼa umi che sábado.+
9 Nde nerenyhẽ umi oñeʼẽ vaívagui hapicháre ha odesidímava oporojuka.+ Haʼekuéra hoʼu umi sakrifísio ne montañakuéra ári, ha oiko hekovai hikuái nde ryepýpe Jerusalén.+
10 Nde ryepýpe oĩ hína umi orekóva rrelasión sexuál itúa rembirekóndi,*+ ha umi mbaretépe orekóva rrelasión sexuál peteĩ kuña oguejývandi chupe iperiódo.+
11 Nde reguereko umi kuimbaʼe ojapóva umi mbaʼe oporombojeguarúva hapicha rembirekóre,+ ha hekotieʼỹgui orekóva rrelasión sexuál inuérandi,+ ha ótro katu mbaretépe oreko rrelasión sexuál iñermánandi, pe itúa rajýndi.+
12 Nde reguereko umi kuimbaʼe okoimeáva* ojuka hag̃ua peteĩ hapichápe.+ Nde rekovra interés umi reipurukávape pláta+ térã rejaprovecha hese,* ha rembotavy nde rapichakuérape reipeʼa hag̃ua chuguikuéra pláta.+ Nde ningo nderesaraiete voi chehegui’, heʼi Ñandejára Jehová ogovernáva opa mbaʼe.
13 ‘Chemorrenegaiterei upe rejapo vaʼekue rembotavy hag̃ua nde rapichápe regana hag̃ua pláta, ha mbaʼéichapa hetápe rejuka nde siuda ryepýpe.
14 ¿Resegíta piko ndepyʼaguasu* ha ndepyapy mbarete umi día che añemoĩ vove ne kóntrape?+ Chete Jehová haʼéma upéva ha katuete ajapóta.
15 Romosarambíta umi tetãnguérape ha romosarambíta opárupi ko yvy ape ári,+ ha ndahejamoʼãvéima rejapo umi mbaʼe kyʼa.+
16 Ha reñemotĩta umi tetãnguéra renondépe, ha reikuaáta che haʼeha Jehová’”.+
17 Ha Jehová oñeʼẽ jey chéve ha heʼi:
18 “Yvypóra raʼy, pe puévlo de Israel ningo chéve g̃uarã peteĩ mbaʼe kyʼa ndovaléiva mbaʼeverã. Enterove haʼekuéra haʼe hína kóvre, estáño, iérro ha plómo. Chuguikuéra oiko mbaʼe kyʼa osẽva oñemboyku jave pláta.+
19 Upévare Ñandejára Jehová ogovernáva opa mbaʼe heʼi péicha: ‘Pendehegui ningo oiko mbaʼe kyʼa ndovaléiva mbaʼeverã,+ upévare pombyatýta Jerusalén ryepýpe.
20 Pe pláta, kóvre, iérro, plómo ha estáño ningo oñemoĩ peteĩ órnope ha ojejatapy hese ha oñemboyku, péicha avei che pombyatýta pochy ha rreniégo reheve, ha ambojepotáta penderehe tata ha pomboykupáta ojuehe.+
21 Pombyatýta ha ambojepotáta penderehe che pochykue hendýva tatáicha,+ ha peẽ penderykúta pe siuda ryepýpe.+
22 Pe pláta oñemboykuháicha peteĩ órnope, péicha avei peẽ peñemboykúta pe siuda ryepýpe, ha peẽ peikuaáta chete Jehová ahykuavo hague che pochykue pende ári’”.
23 Ha Jehová oñeʼẽ jey chéve ha heʼi:
24 “Yvypóra raʼy, ere vaʼerã chupe: ‘Nde hína peteĩ yvy noñemopotĩmoʼãiva ni ndokymoʼãihápe chepochyha díape.
25 Umi iprofetakuéra okalkula ojapo hag̃ua mbaʼe vai,+ ojogua hikuái peteĩ león pochy odeskuartisávape peteĩ animál ojagarráva.+ Upéicha avei haʼekuéra ojuka umi héntepe.* Ojagarra hikuái imbaʼerã umi tesóro ha mbaʼe porã hepýva. Ha heta kuñáme oheja hikuái viúda pe siuda ryepýpe.
26 Umi isaserdotekuéra nokumplíri che léi,+ ha osegi omongyʼa umi che lugár sagrádo.+ Peteĩchante chupekuéra g̃uarã umi mbaʼe sagrádova ha umi ndahaʼéiva,+ ha ndoikuaaukái hikuái mbaʼépa hína umi mbaʼe ikyʼáva ha umi mbaʼe ipotĩva,+ ha nomboareteséi umi che sábado, ha chéve chemongyʼa hikuái ijapytepekuéra.
27 Umi iprinsipekuéra* oĩva upépe ojogua umi lóvope odeskuartisáva umi ojagarrávape ojuka hag̃ua, haʼekuéra ohundi umi héntepe* ojaprovecha ha ogana hag̃ua hesekuéra pláta.+
28 Ha umi iprofetakuéra opinta kálpe umi hembiapokue. Haʼekuéra ohecha umi visión japu ha heʼi umi adivinasión oporombotavýva.+ Ha Jehová ndeʼíriramo jepe mbaʼeve, haʼekuéra heʼi: “Péicha heʼi Ñandejára Jehová ogovernáva opa mbaʼe”.
29 Umi hénte katu ombotavy ha omonda hapichakuérape,+ ha omaltrata hikuái pe ohasa asy ha imboriahúvape, ha pe extranhéro oikóvape ijapytepekuéra ombotavy ha ndojapói chupe hustísia’.
30 ‘Ha asegi aheka peteĩ kuimbaʼe ijapytepekuéra omyatyrõ vaʼerã pe murálla ojejapo vaʼekue itágui, térã peteĩ oñemboʼy vaʼerã che renondépe pe murálla hoʼa haguépe odefende hag̃ua pe yvy ani hag̃ua oñehundi,+ péro ndatopái ni peteĩ.
31 Upéicha rupi, ahykuavóta che pochykue hiʼarikuéra. Ahundíta chupekuéra che pochykue hendývape tatáicha. Che akovráta chupekuéra entéro mbaʼe ojapo vaʼekuére’, heʼi Ñandejára Jehová ogovernáva opa mbaʼe”.
Nóta
^ Hebréope: “nde piko rehusgáta, nde piko rehusgáta”.
^ Hebréope: “siuda oñohẽvape tuguy”.
^ Hebréope ojepuru peteĩ ñeʼẽ heʼiséva “animál rekaka”, ha ojepuru ojeapoʼi hag̃ua ótrope.
^ Hebréope: “oñohẽ hag̃ua tuguy”.
^ Hebréope: “umi omboʼopíova itúape”.
^ Térã: “rekovra rasapa interés”.
^ Térã: “otransáva”.
^ Térã: “Oaguantáta piko ne korasõ”.
^ Térã: “umi álmape”.
^ Térã: “igovernadorkuéra”.
^ Térã: “umi álmape”.
