Ezequiel 23:1-49
23 Jehová oñeʼẽ jey chéve ha heʼi:
2 “Yvypóra raʼy, oĩ vaʼekue mokõi kuña ha peteĩnte la isykuéra.+
3 Chuguikuéra oiko vaʼekue prostitúta Egíptope,+ ha imitãite guive ojeprostitui hikuái. Upérõ haʼekuéra vírhen gueteri, ha upépe ojejopy ha ojepokopa ipechokuérare.
4 Peteĩ héra Oholá,* haʼe hína la majór, ha pe iñermána héra Oholibá.* Haʼekuéra chembaʼe ha imemby chehegui heta kuimbaʼe ha kuña. Oholá haʼe hína Samaria+ ha Oholibá haʼe hína Jerusalén.
5 Oholá oñepyrũ ojeprostitui+ haʼérõ guare chembaʼe gueteri. Haʼe iñakãrakuete vaʼekue umi kuimbaʼe iñakãvaívare hese,+ umíva hína umi ivesinokuéra asirio.+
6 Ijapytepekuéra ningo oĩ governadór oipurúva ao hovy iporãva ha avei umi ofisiál... enterovete haʼekuéra kariaʼy porã oikóva kavaju ári.
7 Oholá osegi ojeprostitui entéro umi asirio iñimportantevévandi, ha oñemongyʼa+ umi dios puerkésa* orekóvare umi kuimbaʼe haʼe iñakãvaiete vaʼekuére.
8 Haʼe osegi ojeprostitui Egíptope, pórke ikuñataĩme oñenóma vaʼekue voi hendive, ha haʼe haʼérõ guare vírhen gueteri haʼekuéra opokopa ipéchore, ha akãraku reheve oreko hendive rrelasión sexuál.*+
9 Upévare antrega chupe umi kuimbaʼe iñakãvaívape hese, umíva hína umi asirio,+ umíva rapykuéri haʼe oiko vaʼekue iñakãrakuete.
10 Haʼekuéra ohecha chupe opío+ ha oipeʼa chugui imembykuimbaʼe ha imembykuñanguéra,+ ha ojuka chupe hikuái espádape. Haʼe herakuã vaieterei umi kuñanguéra apytépe, ha ohusga chupe hikuái.
11 Iñermána Oholibá ohechárõ guare koʼã mbaʼe, iñakãvaive ha hekovaive chugui, ha ojeprostitui vaive pe iñermánagui.+
12 Oholibá iñakãrakuete umi ivesinokuéra asirio rehe,+ umi governadór ha umi ofisiál oñemonde porãva ha oikóvare kavaju ári... enterove haʼekuéra kariaʼy porã porã.
13 Haʼe oñemongyʼárõ guare ahechakuaa mokõivéva ohoha el mísmo tapérupi.+
14 Péro Oholibá ojeprostitui ha osegi ojapo hetave mbaʼe. Haʼe ohecha kuimbaʼe raʼanga ojetalláva umi parére, umíva hína umi caldeo raʼanga ojetalla vaʼekue ha oñepinta pytãme,
15 umíva oreko ikuʼáre sínto, iñakãre turvánte* ipukúva, ha ojogua hikuái umi gerrérope. Enterove umíva orrepresenta umi babilóniope, onase vaʼekue umi caldeo yvýpe.
16 Oholibá ohechávo chupekuéra oñepyrũ iñakãrakuete hesekuéra, ha omondo mensahéro hendapekuéra Caldéape.+
17 Upévare umi babilonio osegi ou oñeno hag̃ua hendive hupápe, ha omongyʼa chupe hikuái hekovaívo hendive. Ha haʼe oñemongyʼa rire hendivekuéra, ipochy ha oheja* chupekuéra.
18 Haʼe otĩʼỹre osegi vaʼekue ojeprostitui ha ojechauka opío,+ ha che chepochy vaʼekue ha aheja* chupe, aheja haguéicha iñermánape chepochýrõ guare.+
19 Haʼe osegi heta hetave ojeprostitui,+ imanduʼávo mbaʼéichapa ojeprostitui vaʼekue imitãrõ guare Egipto territóriope.+
20 Haʼe iñakãrakuete umi ohayhúvare chupe, ojogua umi tembireko* iñakãraku vaívape umi kuimbaʼe orekóvare hiʼórgano sexuál tuicháva umi vúrro ha umi kavajúicha.
21 Rehechagaʼu umi mbaʼe tieʼỹ rejapo vaʼekue Egíptope+ nekuñataĩrõ guare, upépe haʼekuéra opokopa kuri nde péchore, upérõ ningo nde nemitã gueteri.+
22 Upévare Oholibá, péicha heʼi Ñandejára Jehová ogovernáva opa mbaʼe: ‘Che amokyreʼỹta umi nderayhúvape,+ umi nde* reheja vaʼekuépe ndepochy rupi, ha aguerúta chupekuéra ne kóntrape opáguio ládo,+
23 umi babilóniope+ ha kompletoite umi caldéope,+ umi kuimbaʼe Pecod,+ Soa ha Coaguápe, ha avei enterovete umi asíriope. Enterove haʼekuéra kariaʼy porã porã hína, governadór ha ofisiál, gerréro ha kuimbaʼe ojeporavo* vaʼekue, ha enterove haʼekuéra oiko kavaju ári.
24 Haʼekuéra ndeatakáta heta kárro de gérra reheve ha heta soldádo reheve, orekóva eskúdo tuicháva, eskudoʼi* ha kásko iñakãre. Haʼekuéra ojekolokáta nde jerére kompletoite, ha amandáta chupekuéra ndehusga hag̃ua, ha haʼekuéra ndehusgáta ogustaháicha chupekuéra.+
25 Che ahechaukáta chepochyha nderehe, ha haʼekuéra pochy reheve ojahéita nderehe. Otrosáta ndehegui ne tĩ ha umi ne nambi, ha umi hénte hembýva ndéve ojejukáta espádape. Haʼekuéra ogueraháta ndehegui ne membykuimbaʼe ha ne membykuñanguérape, ha umi opytáva okaipáta tatápe.+
26 Oipeʼáta ndehegui umi nde ao+ ha ogueraháta ndehegui umi nde joya* iporãitéva.+
27 Che ndahejamoʼãvéima nderekotieʼỹ ha rejeprostitui,+ upéva nde reñepyrũ vaʼekue rejapo Egíptope.+ Neremañamoʼãvéima hesekuéra ha nanemanduʼamoʼãvéima Egíptore’.
28 Pórke péicha heʼi Ñandejára Jehová ogovernáva opa mbaʼe: ‘Che rontrega potaite hína umi nde nderechaʼéivare pópe, umi nde reheja* vaʼekuépe ndepochy rupi.+
29 Haʼekuéra ojahéita nderehe, ha oipeʼapaitéta ndehegui umi mbaʼe reñehaʼã vaʼekue rehupyty,+ ha nderejáta hikuái opío vera. Enterove ohecháta mbaʼéichapa nderekovai ha umi mbaʼe tieʼỹ rejapóva, ha enterove oikuaáta nde haʼeha prostitúta.+
30 Koʼã mbaʼe ojejapóta nderehe, pórke reho umi nasionkuéra rapykuéri peteĩ prostitútaicha,+ ha reñemongyʼa umi idioskuéra puerkésa raʼangáre.+
31 Nde rejapo ojapo hagueichaite ne ermána,+ ha amoĩta nde pópe pe ikópa’.+
32 Péicha heʼi Ñandejára Jehová ogovernáva opa mbaʼe:
‘Nde reʼúta pe oĩva ne ermána kópape,+ ipypuku ha ipyrusúvape.
Nderehe ojepuka ha oñeñembohorýta, ha umi mbaʼe henyhẽte hína pe kópape.+
33 Reʼupaitéta* pe oĩva ne ermána Samaria kópape,rekaʼúta ha reñembyasyetereíta,ojekyhyjepáta ndehegui ha repytáta nandi vera.
34 Katuete reʼu vaʼerã ha remonandi,+ ha reikarãita pe kópa jekakue ojejapo vaʼekue ñaiʼũgui,ha upéi reikytĩta umi nde pécho ñembyasýgui.*
“Pórke che haʼéma upéva”, heʼi Ñandejára Jehová ogovernáva opa mbaʼe’.
35 Upévare, péicha heʼi Ñandejára Jehová ogovernáva opa mbaʼe: ‘Nderesarái haguére chehegui ha nerepenaveiete rupi cherehe,*+ repagáta umi mbaʼe tieʼỹ rejapo vaʼekuére ha rejeprostitui haguére’”.
36 Upémarõ Jehová heʼi chéve: “Yvypóra raʼy, ¿rehusgáta piko Oholá ha Oholibápe+ ha rembojovakéta piko chupekuéra umi mbaʼe oporombojeguarúva ojapóvare?
37 Haʼekuéra oporomoakãratĩ*+ ha oporojuka.* Haʼekuéra hekovai umi idiós puerkésandi, ha ndahaʼéi upévante, síno ohapy avei tatápe* umi idioskuérape g̃uarã umi imembykuéra oreko vaʼekue chehegui.+
38 Haʼekuéra ojapo avei cherehe koʼã mbaʼe: omongyʼa hikuái che lugár sagrádo upe díape ha omongyʼa umi che sábado.
39 Ojuka rire imembykuéra sakrifísioramo umi idiós puerkésape,+ oike hikuái che lugár sagrádope omongyʼa hag̃ua+ upe díape voi. Upéva ningo ojapo hikuái che róga ryepýpe voi.
40 Omondo avei hikuái mensahéro ikatu hag̃uáicha ou umi kuimbaʼe mombyrýgui.+ Ha umi kuimbaʼe oúrõ guare tapére, nde rejahu, repinta nde resa ha remoĩmba ndejehe adórno.+
41 Upéi reguapy peteĩ tupa iporãitereívape+ ha henondépe oĩ peteĩ mesa,+ ha upéva ári remoĩ che insiénso+ ha che aséite.+
42 Upépe oñehendu oĩha atyraite kuimbaʼe ofarreáva, ha ijapytepekuéra oĩ umi okaʼúva ojegueru vaʼekue pe desiértogui. Haʼekuéra omoĩ pulséra umi mokõi kuña oñoermánava pyapýre, ha omoĩ avei iñakãrekuéra umi koróna iporãitereíva.
43 Upéi che haʼe pe kuña ikaneʼõvare hetaiterei oporomoakãratĩ haguére: ‘Péro upéicharõ jepe haʼe osegíta ojeprostitui’.
44 Upévare umi hénte osegi ou hendápe, ojejuháicha peteĩ prostitúta rendápe. Péicha ou hikuái Oholá ha Oholibá rendápe, umi kuña hekotieʼỹva rendápe.
45 Péro umi kuimbaʼe ihústova ohusgáta chupe* hendaitépe, oporomoakãratĩ+ ha oporojuka haguére,*+ pórke haʼe oporomoakãratĩ ha oporojuka.*+
46 Pórke péicha heʼi Ñandejára Jehová ogovernáva opa mbaʼe: ‘Peteĩ ehérsito ohóta ikontrapekuéra ha osakeáta chupekuéra ha umi nasión oĩva ijerére opytáta okyhyje chugui.+
47 Pe ehérsito ojapíta chupekuéra itápe+ ha ojukáta chupekuéra ijespadakuérape. Ojukáta chuguikuéra imembykuimbaʼe ha imembykuñanguéra+ ha ohapypáta hogakuéra.+
48 Ha aipeʼáta umi hekotieʼỹvape ko yvy ape árigui, enterove umi kuña oaprendéta mbaʼépa ndojejapói vaʼerã, ha ndojapomoʼãi umi mbaʼe tieʼỹ ojapo vaʼekue hikuái.+
49 Umi babilonio pendekastigáta penderekotieʼỹ haguére, ha umi pekádo pejapo vaʼekuére umi pende dios puerkésandi, ha peẽ peikuaáta che haʼeha Ñandejára Jehová ogovernáva opa mbaʼe’”.+
Nóta
^ Heʼiséva: “Che róga kárpa oĩ pype”.
^ Heʼiséva: “Hóga kárpa”.
^ Hebréope ojepuru peteĩ ñeʼẽ heʼiséva “animál rekaka”, ha ojepuru ojeapoʼi hag̃ua ótrope.
^ Térã: “hekovai hendive”.
^ Térã: “hiʼálma oheja”.
^ Térã: “che álma oheja”.
^ Térã: “ne álma”.
^ Hebréope: “oñehenoika”.
^ Ko eskudoʼi oipuru jepi umi orekóva árko ha flécha.
^ Térã: “ne adórno”.
^ Térã: “ne álma oheja”.
^ Hebréope: “Neryg̃uatãta”.
^ Hebréope: “reipeʼáta umi nde pécho”.
^ Hebréope: “chemoĩ rupi nde rapykue gotyo”.
^ Hebréope: “ombohasa avei tatárupi”.
^ Hebréope: “omongyʼa ipo tuguýpe”.
^ Upéva heʼise hekovaiha espirituálmente.
^ Hebréope: “ipopekuéra oĩ tuguy”.
^ Hebréope: “oñohẽ haguére tuguy”.
^ Oiméne oñeñeʼẽ hína Oholibá rehe.
