Ezequiel 28:1-26
28 Jehová oñeʼẽ jey chéve ha heʼi:
2 “Yvypóra raʼy, ere pe omoakãvape Tiro: ‘Péicha heʼi Ñandejára Jehová ogovernáva opa mbaʼe:
“Ne korasõ oñemombaʼeguasu rupi,+ nde resegi ere: ‘Che hína peteĩ dios.
Che aguapy hína peteĩ dios trónope pe mar mbytépe’.+
Péro nde ningo peteĩ kuimbaʼénte, ndahaʼéi peteĩ dios,reñandúramo jepe ne korasõme nde haʼeha peteĩ dios.
3 ¿Nde piko nearanduve mbaʼe Daniélgui?+
¿Nde piko reimoʼã ndaiporiha mbaʼeve okañýva ndehegui?
4 Nde ningo reñemborríko pórke nearandu ha rentende hetaiterei mbaʼe,ha resegi rembyaty óro ha pláta nde tesoreriakuérape.+
5 Renegosiakuaa rupi rembyaty heta rrikésa,+ha ne korasõ oñemombaʼeguasu reguereko haguére umi rrikésa”’.
6 ‘Upévare péicha heʼi Ñandejára Jehová ogovernáva opa mbaʼe:
“Reñandu rupi ne korasõme nde haʼeha peteĩ dios,
7 aguerúta umi extranhéro ne kóntrape, umi iviolentovéva oĩva umi nasionkuérape,+ha haʼekuéra oguenohẽta ijespáda ha ohundipáta entéro mbaʼe porã rekonsegi vaʼekue nearandu rupi,ha omongyʼáta pe ne porãngue omimbipáva.+
8 Haʼekuéra nemondóta pe sepultúrape,*
ha remano vaíta pe mar mbytépe.+
9 ¿Resegíta piko ere upe ndejukávape hína: ‘Che hína peteĩ dios’?
Nde ndahaʼemoʼãi peteĩ dios umi nemongyʼáva pópe, síno peteĩ kuimbaʼe reítante”’.
10 ‘Umi extranhéro pópe remanóta, remanóta umi noñesirkunsidáivaicha,*
pórke che haʼéma upéva’, heʼi Ñandejára Jehová ogovernáva opa mbaʼe”.
11 Ha Jehová oñeʼẽ jey chéve ha heʼi:
12 “Yvypóra raʼy, epurahéi peteĩ músika jaheʼo oñeʼẽva rréi de Tiro rehe, ha ere chupe: ‘Péicha heʼi Ñandejára Jehová ogovernáva opa mbaʼe:
“Nde ningo ndereguerekói vaʼekue ni peteĩ defékto, ha ehémplo vaʼekue upévape,*
nerenyhẽ arandúgui+ ha neporãiterei rasapa.+
13 Nde reime vaʼekue Edénpe, pe Ñandejára hardínpe.
Nde reñadorna vaʼekue opaichagua ita vera iporãvape:
rruvi, topásio ha háspe, krisólito, ónise, háde, safíro, turkésa+ ha esmerálda.
Umi vaseʼi ha umi ita oñemoĩha ojejapo vaʼekue órogui.
Umíva ningo che aprepara vaʼekue, upe rojapoha díape.
14 Che roiporavo vaʼekue oiko hag̃ua ndehegui peteĩ keruvín* oporoprotehéva.
Nde ningo reime vaʼekue Ñandejára montáña sagrádape,+ ha reguata vaʼekue reikóvo umi ita hendýva apytépe.
15 Upe rojapoha día guive nde nderejapói vaʼekue mbaʼeve ivaíva,péro upéi rejapo mbaʼe vai.+
16 Nde heta renegosia haguére,+nerenyhẽ violénsiagui ha reñepyrũ repeka.+
Upévare, nde keruvín oporoprotehéva, che roguerekóta peteĩ mbaʼe kyʼáramo ha romosẽta Ñandejára montáñagui, ha rohundíta+
mombyry umi ita hendýva apytégui.
17 Ne korasõ oñemombaʼeguasu neporã haguére.+
Ne porãngue omimbipáva ohundi ne arandu.+
Roitýta yvýpe.+
Umi rreikuéra oñembohorýta nderehe.
18 Tuichaiterei refalla haguére ha naneonrrádoi haguére renegosia jave, remongyʼa umi nde lugár sagrádo.
Ambojepotáta tata nde território mbytépe ha rekaipaitéta.+
Ajapóta ndehegui tanimbu pe yvy ape ári, enterove umi omañáva nderehe renondépe.
19 Enterove umi ndekuaáva umi puevlokuéra apytépe, ijurujáita omañávo nderehe.+
Derrepentete reñehundíta ha ivaietereíta voi upéva,ha redesapareséta pára siémpre”’”.+
20 Ha Jehová oñeʼẽ jey chéve ha heʼi:
21 “Yvypóra raʼy, ejere emaña Sidón+ gotyo, ha eprofetisa ikóntrape.
22 Ere vaʼerã: ‘Péicha heʼi Ñandejára Jehová ogovernáva opa mbaʼe:
“Sidón, ápe aime hína ne kóntrape, ha añemombaʼeguasúta umi mbaʼe ajapótava rupive nderehe,ha umi hénte oikuaáta che haʼeha Jehová ág̃a rohusga vove ha añesantifika vove nde rupive.
23 Amondóta ndéve mbaʼasy ha hetápe ojejukáta* umi nde kallekuérare.
Ojeatakáta espádape nde puévlope opáguio ládo, ha omanóta hikuái nde território mbytépe,ha oikuaáta hikuái che haʼeha Jehová.+
24 Upéicharõ Israel rogayguápe nomongoramoʼãvéima umi jukeri ivaíva ha umi ñuatĩ oporokutu rasýva,+ umi oñembohorýva hesekuéra, ha umi hénte oikuaáta che haʼeha Ñandejára Jehová ogovernáva opa mbaʼe”’.
25 ‘Péicha heʼi Ñandejára Jehová ogovernáva opa mbaʼe: “Ág̃a ambyaty jey vove Israel rogayguápe umi puevlokuéra apytégui, umi oñemosarambi haguégui chupekuéra,+ che añesantifikáta ijapytepekuéra umi tetãnguéra renondépe.+ Ha haʼekuéra oikóta pe yvy+ ameʼẽ vaʼekuépe che siérvo Jacóbpe.+
26 Haʼekuéra oikóta upépe pyʼaguapýpe ha ndokyhyjemoʼãi,+ ojogapóta, oñotỹta parrál+ ha oikóta kyhyjeʼỹme ág̃a che ahusga vove enterove oĩvape ijerére ha oñembohorýva hesekuéra,+ ha oikuaáta hikuái che haʼeha Ijára Jehová”’”.
Nóta
^ Térã: “yvykuápe”.
^ Hebréope: “reheja vaʼekue peteĩ modélo”.
^ Hebréope: “oñeñohẽta heta tuguy”.
