Ezequiel 29:1-21
29 Pe áño 10-pe,* pe día 12 pe décimo méspe, Jehová oñeʼẽ chéve, ha heʼi:
2 “Yvypóra raʼy, emaña oĩha gotyo pe faraón rréi de Egipto, ha eprofetisa ikóntrape ha Egipto kompletoite kóntrape.+
3 Ere vaʼerã koʼã mbaʼe: ‘Péicha heʼi Ñandejára Jehová ogovernáva opa mbaʼe:
“Ápe aime hína ne kóntrape, faraón rréi de Egipto,+nde hína pe animál ypegua tuichaitéva oĩva Rrío Nilo* arrojokuérape,+ha heʼíva: ‘Pe Rrío Nilo chembaʼe hína,che ajapo vaʼekue chembaʼerã’.+
4 Péro amoĩta gáncho ne rañykãre ha umi pira oĩva nde Rrío Nílope ojapaitéta nde pirére.
Roguenohẽta pe nde Rrío Nílogui kompletoite umi pira oĩvandi upépe, umi ojapáva hína nde pirére.
5 Roheja reíta pe desiértope, rohejáta ndéve ha kompletoite umi pira oĩvape Rrío Nílope.
Reʼáta pe yvýpe, ha nde retekue isarambíta ha avave nombyatymoʼãi neñotỹ hag̃ua.+
Ne reʼongue ameʼẽta umi animál salváhe ha umi guyrápe hembiʼurã.+
6 Péicha entéro oikóva Egíptope oikuaáta che haʼeha Jehová,pórke haʼekuéra ndaideprovéchoi vaʼekue Israel rogayguápe, ndaideprovechoiháicha peteĩ kapiʼi.*+
7 Pe puévlo de Israel oñakaramárõ guare nde póre,ha ojejoko nderehe peteĩ mulétaicha, nde repẽ,ha upévare haʼekuéra hetyma* kangy ha ndaikatúi oñemboʼy,ha hoʼávo hikuái renohẽ chuguikuéra ijatiʼy ilugárgui”.+
8 Upévare, péicha heʼi Ñandejára Jehová ogovernáva opa mbaʼe: “Aguerúta peteĩ espáda ne kóntrape,+ ha ahundíta tahaʼe kuimbaʼe térã animál.
9 Egipto território opytáta nandi vera ha oñehundietéta,+ ha oikuaáta hikuái che haʼeha Jehová, pórke nde ere kuri:* ‘Pe Rrío Nilo chembaʼe hína, che ajapo vaʼekue chembaʼerã’.+
10 Che aime ne kóntrape ha pe nde Rrío Nilo kóntrape, ha Egipto território opytáta oñehundiete ha iséko veráta, ha oikóta chugui peteĩ desiérto,+ Migdol+ guive Siene peve,+ oĩva Etiopía frontérape.
11 Ni kuimbaʼe ni animál ndohasamoʼãi upérupi,+ ha avave ndoikomoʼãi upépe 40 áñore.
12 Ahejáta nandi vera Egipto território, ndaiporimoʼãi ótro yvy péicha opytáva nandi, ha isiudakuéra opytáta nandi vera ha ndaiporimoʼãi ótra siuda péicha opytáva nandi 40 áñore.+ Ha amosarambíta umi egípciope umi nasionkuérare ha amosarambíta chupekuéra diferénte lugárpe”.+
13 Pórke péicha heʼi Ñandejára Jehová ogovernáva opa mbaʼe: “Ohasa rire umi 40 áño ambyaty jeýta umi egípciope umi puévlo oñemosarambi haguégui chupekuéra.+
14 Agueru jeýta umi egipcio ojegueraha vaʼekuépe prisionéroramo Patrós + yvýpe, agueru jeýta chupekuéra ivállepe, ha upépe oikóta chuguikuéra peteĩ goviérno ndovaléiva mbaʼeverã.
15 Egíptogui oikóta pe goviérno iñarruinadovéva umi ótro goviérnogui ha nomandamoʼãvéima umi ótra nasión rehe,+ amomichĩetereíta chupe, upévare ndaikatumoʼãi oreko ipoguýpe umi ótra nasiónpe.+
16 Israel rogaygua arakaʼeve nokonfiamoʼãvéima hese,+ síno omomanduʼáta chupekuéra ofalla hague ojerurévo umi egípciope oipytyvõ hag̃ua chupekuéra. Ha oikuaáta hikuái che haʼeha Ñandejára Jehová ogovernáva opa mbaʼe”’”.
17 Upéi pe primer día, pe primer méspe, pe áño 27-pe* Jehová oñeʼẽ chéve, ha heʼi:
18 “Yvypóra raʼy, pe rréi Nabucodonosor*+ de Babilonia ningo heta omombaʼapo jejopy ijehérsitope oataka hag̃ua Tírope.+ Upévare umi isoldadokuéra iñakã perõmba ha ijatiʼy jepiropa. Haʼe ha ijehérsito hetaiterei oñehaʼã, péro noganái mbaʼeve umi mbaʼe ojapo vaʼekuére Tiro kóntrape.
19 Upévare péicha heʼi Ñandejára Jehová ogovernáva opa mbaʼe: ‘Ameʼẽta Egipto território rréi Nabucodonosor* de Babilóniape,+ ha haʼe ogueraháta umi rrikésa orekóva ha omondáta chugui hetaiterei mbaʼe, ha péva ojepurúta ojepaga hag̃ua ijehérsitope’.
20 ‘Ameʼẽta chupe Egipto território apaga hag̃ua chupe, pórke oñorairõ chéve g̃uarã Tiro kóntrape’,+ heʼi Ñandejára Jehová ogovernáva opa mbaʼe.
21 Upe tiémpope amopuʼãta peteĩ ipoderósova* Israel rogaygua apytépe,*+ ha ameʼẽta ndéve peteĩ oportunida reñeʼẽ hag̃ua ijapytepekuéra, ha oikuaáta hikuái che haʼeha Jehová”.
Nóta
^ Upéva hína pe áño 10 ojegueraha hague hetãgui rréi Joaquín, Ezequiel ha umi ótro judíope.
^ Koʼápe ha avei upe rire oñeñeʼẽ jave Nilo rehe, oñeñeʼẽ hína pe rrío ha ijarrojokuérare.
^ Hebréope: “takuarílla”.
^ Hebréope: “ikadéra”.
^ Hebréope: “haʼe heʼi kuri”.
^ Upéva hína pe áño 27 ojegueraha hague hetãgui rréi Joaquín, Ezequiel ha umi ótro judíope.
^ Hebréope: “Nabucodorosor”. Péicha avei ojeskrivi héra.
^ Hebréope: “Nabucodorosor”. Péicha avei ojeskrivi héra.
^ Térã: “animál ratĩngue”.
^ Térã: “amombaretéta Israel rogayguápe”.
