Ezequiel 31:1-18
-
Egipto hoʼáta, pe sédro máta ijyvatetéva (1-18).
31 Pe primer día, pe mes tercérope, pe áño 11-pe, Jehová oñeʼẽ jey chéve ha heʼi:
2 “Yvypóra raʼy, ere faraón rréi de Egíptope ha ijehérsitope:+
‘¿Máva piko ndéicha tuicha?
3 Nde rejogua vaʼekue peteĩ asíriope, ha avei rejogua vaʼekue peteĩ sédro Libanopeguápe,umi hakã ningo hogue heta ha isómbra porã, ijyvateterei,pe huʼã ohupyty voi umi arai.
4 Umi y rupive haʼe okakuaa porã, umi y oĩva yvyguýpe omongakuaa chupe ijyvate hag̃ua.
Oĩ vaʼekue ijerére heta arrójo pe lugár oñeñotỹ haguépe chupe,umi ijarrojokuéra orrega enterove umi yvyramáta oĩvape pe ñúme.
5 Upévare haʼe okakuaa ha ijyvateve entéro umi ótro yvyramáta oĩvagui pe ñúme.
Umi hakã tuicháva heta hetave, ha umi hakãnguéra ipuku pukuve,pórke hiʼy heta vaʼekue umi ijarrojokuéra.
6 Kompletoite umi guyra ojaitypo umi hakã tuichavévare,enterove umi animál oĩva pe ñúre imemby iguýpe,ha enterove umi nasión heta ihénteva oiko hína kuri isómbra guýpe.
7 Oiko chugui peteĩ yvyramáta iporãitereíva ha ndaijojaháiva, ha umi hakãnguéra ipuku puku,pórke umi hapo ohupyty umi lugár hetahápe y.
8 Ni peteĩ ótro sédro oĩva Ñandejára hardínpe+ ndaikatúi vaʼekue oñembojoja hese.
Ni peteĩ enévro nahakãtuichái vaʼekue haʼéicha,ha ni peteĩ plátano* rakã ndaikatúi vaʼekue oñembojoja umi hakãre.
Ni peteĩ ótro yvyramáta oĩ vaʼekue Ñandejára hardínpe naiporãi vaʼekue haʼéicha.
9 Amoporãiterei ha ambohogue hetaiterei chupe,ha oenvidia vaʼekue chupe entéro umi ótro yvyramáta oĩva Edénpe, Ñandejára tee hardínpe’.
10 Upévare péicha heʼi Ñandejára Jehová ogovernáva opa mbaʼe: ‘Haʼe* ijyvateterei rupi, pe huʼã ohupyty voi umi arai, ha ikorasõ oñemombaʼeguasu haʼe ijyvate haguére,
11 upévare antregáta chupe pe governánte ipoderosoitévape umi tetãnguéra apytépe.+ Haʼe katuete okastigáta chupe, ha che arrechasáta chupe iñaña haguére.
12 Ha umi extranhéro, umi iviolentovéva oĩva umi tetãnguérape, oitýta chupe ha oheja reíta chupe umi montáña ári, ha umi hogue hoʼapáta ñúme, ha umi hakã opẽ vaʼekue opytapáta kompletoite umi arrójo oĩvape ko yvy ape ári.+ Enterove umi puévlo oĩva isómbra guýpe ohopáta ha oheja reíta chupe.
13 Kompletoite umi guyra oikóta imáta hoʼa vaʼekue ári, ha entéro umi animál salváhe oĩva umi ñúre oikóta umi hakãngue paʼũrupi.+
14 Péicha ni peteĩ yvyramáta oĩva umi y ypýpe ndaikatumoʼãvéima okakuaa ijyvateterei peve, térã pe huʼã ohupyty peve umi arai, ha ani hag̃ua ni peteĩ yvyramáta hiʼy porãva ohupyty chupe ijyvatekuépe. Pórke enterovetépe oñehundíta, ha ohóta yvyguýpe umi yvyporakuérandi, umi ohóvandi pe sepultúrape’.*
15 Péicha heʼi Ñandejára Jehová ogovernáva opa mbaʼe: ‘Haʼe ohoha díape Sepultúrape,* ahejáta umi héntepe oñembyasy. Upéicha rupi, ajokóta umi y ipypukuetéva ha ajokóta umi ijarrojokuéra, ha péicha pe y hetaite orekóva ndosyrymoʼãvéima. Ikáusare amoypytũta pe Líbano, ha kompletoite umi yvyramáta oĩva pe ñúme ipirupáta.
16 Amondýita umi tetãnguérape ohendu vove haʼe hoʼa hague, ág̃a amondo vove chupe pe Sepultúrape* umi ótro ohóvandi hína pe yvykuápe.* Upépe kompletoite umi yvyramáta Edenpegua,+ umi tuichavéva ha iporãvéva pe Libanopegua, enterove umi yvyramáta hiʼy porãva, oñekonsoláta yvyguýpe.
17 Haʼekuéra oho hendive pe Sepultúrape,* umi ojejuka vaʼekue espádape,+ ha avei umi oapojáva chupe* ha oiko vaʼekue isómbra guýpe umi tetãnguéra apytépe’.+
18 ‘¿Oĩ piko raʼe peteĩ yvyramáta pe Edénpe ndéicha iporãva ha tuicháva?+ Péro nde reñemondóta yvyguýpe umi yvyramáta Edenpeguándi. Repytáta umi noñesirkunsidái vaʼekue* apytépe, umi ojejuka vaʼekuéndi espádape. Péicha oikóta faraón rehe ha kompletoite ijehérsitore’, heʼi Ñandejára Jehová ogovernáva opa mbaʼe”.
Nóta
^ Péva peteĩ yvyramáta hakã ipukuetereíva ha ojepireʼopáva.
^ Hebréope: “Nde”.
^ Térã: “yvykuápe”.
^ Térã: “sepultúrape”.
^ Hebréope: “ijyva”.
