Ezequiel 32:1-32
32 Pe áño 12-pe,* pe mes 12-pe, pe primer díape, Jehová oñeʼẽ jey chéve ha heʼi:
2 “Yvypóra raʼy, epurahéi peteĩ músika jaheʼo oñeʼẽva pe rréi de Egipto faraón rehe, ha ere hese:
‘Nde ningo haʼe vaʼekue peteĩ león raʼyrusu imbaretéva umi tetãnguéra apytépe,péro koʼág̃a reñehundíma.
Rejogua vaʼekue peteĩ animál tuichaitereíva oĩvape ýpe,+ nde rejapajeréi vaʼekue reikóvo umi nde rríore.
Nde pýpe nde rembotyai pe y ha remongyʼa umi* rrío’.
3 Péicha heʼi Ñandejára Jehová ogovernáva opa mbaʼe:
‘Ajevaléta peteĩ grúpore oĩháme heta nasión apoi hag̃ua nde ári che rred,ha haʼekuéra neguenohẽta pe che rrédpe.
4 Roheja reíta pe yvýpe,ha romombóta pe yvy reípe.
Ahejáta kompletoite umi guyra ou oguejy nde ári.
Nde roʼokuépe amohyg̃uatãta umi animál salváhe oĩva ko yvy tuichakuére.+
5 Amombóta ne reʼongue umi montáña ári,amosarambipáta ha amyenyhẽta umi ñu nde retekuépe.+
6 Nde ruguy oñehẽvape amboykuéta pe yvy umi montáña peve,ha upéva omyenyhẽta umi arrójo’.*
7 ‘Ág̃a che rohundi vove, ajahoʼíta pe yvága ha amoypytũta umi estrellakuéra.
Amoʼãta araípe pe kuarahy,ha pe jasy ndohesapemoʼãi.+
8 Nde káusare amoypytũta entéro mbaʼe ohesapéva ha omimbíva yvágape,ha ajahoʼíta ko yvy pytũmbýpe’, heʼi Ñandejára Jehová ogovernáva opa mbaʼe.
9 ‘Amokorasõ rasýta heta puévlope ág̃a che agueraha vove nde puévlope prisionéroramo umi ótro tetãme,umi lugár nde ndereikuaái vaʼekuépe.+
10 Tuichaiterei amondýita heta puévlope,ha umi irreikuéra oryrýi osusũta okyhyjégui nde káusare, ág̃a che ambohasa vove henondepekuéra che espáda.
Upe reʼataha díape,haʼekuéra kontinuadoite oryrýi osusũta, káda uno okyhyjéta omanórõ g̃uarã’.
11 Pórke péicha heʼi Ñandejára Jehová ogovernáva opa mbaʼe:
‘Pe rréi de Babilonia espáda oúta ndéve.+
12 Umi gerréro ipoderósova ojukáta espádape umi nde ehérsitope.
Koʼã gerréro hína umi iviolentovéva oĩva umi tetãnguérape.+
Haʼekuéra oipeʼapáta umi mbaʼe Egipto oñemombaʼeguasuha, ha ohundipaitéta ijehérsitope.+
13 Ahundíta kompletoite umi hymbakuéra umi y rembeʼýgui,+ha ni peteĩ persóna ni animál nopyrũmoʼãi pype ombotyai jey hag̃ua’.+
14 ‘Upe tiémpope amopotĩta umi y,ha ambosyrýta umi irriokuéra aséiteicha’, heʼi Ñandejára Jehová ogovernáva opa mbaʼe.
15 ‘Ág̃a che aheja vove Egipto nandi vera, pe yvy ndorekomoʼãvéima umi mbaʼe omyenyhẽ vaʼekue chupe,+ha ág̃a akastiga vove umi hénte oikóvape upépe,oikuaáta hikuái che haʼeha Jehová.+
16 Kóva ningo peteĩ músika jaheʼo, ha umi hénte opurahéita kóva,umi kuñanguéra umi tetãmegua opurahéita avei.
Haʼekuéra ogueropurahéita Egíptope ha ijehérsitope’, heʼi Ñandejára Jehová ogovernáva opa mbaʼe”.
17 Upéi pe áño 12-pe, pe día 15 upe méspe,* Jehová oñeʼẽ chéve ha heʼi:
18 “Yvypóra raʼy, ejaheʼo Egipto ehérsitore ha ere oñemondotaha chupe yvyguýpe umi ohóvandi hína pe yvykuápe,* oñemondóta chupe ha avei umi hénte oĩva umi tetãnguéra ipoderósovape.
19 ‘Egipto, ¿nde piko reimoʼã neporãveha oimeraẽ ótrogui? ¡Tereho epyta umi noñesirkunsidáivandi!’.*
20 ‘Umi egipcio* hoʼáta umi ojejuka vaʼekue espádape apytépe.+ Egíptope* ningo ojejuka espádape, pembotyryry pegueraha chupe kompletoite ijehérsito reheve.
21 Pe Sepultúra* rugua guive umi gerréro ipoderosovéva oñeʼẽta chupe ha umi iñajudántepe. Ojejukáta chupekuéra espádape ha oguejýta opyta umi noñesirkunsidái vaʼekuéicha.
22 Asiria oĩ upépe ijehérsito kompletoiténdi. Umi asirio sepulturakuéra oĩ pe irréi jerére,* enterovete chupekuéra ojejuka vaʼekue espádape.+
23 Umi asirio sepulturakuéra oĩ pe yvykuápe* pe ipypukuvehápe, ha pe ipuévlo oĩ pe rréi sepultúra jerére, enterovete haʼekuéra ojejuka vaʼekue espádape, pórke haʼekuéra oikovérõ guare heta omongyhyje vaʼekue umi héntepe.
24 Elam+ oĩ upépe ijehérsito kompletoiténdi. Umi isepulturakuéra oĩ pe irréi jerére, enterovete chupekuéra ojejuka vaʼekue espádape. Haʼekuéra oguejy pe yvyguýpe oñesirkunsidaʼỹre, pórke oikovérõ guare heta omongyhyje vaʼekue umi héntepe. Koʼág̃a oñemotĩta hikuái umi oguejývandi pe yvyguýpe.*
25 Haʼekuéra omoĩ peteĩ tupa chupe* g̃uarã umi omano vaʼekue apytépe, ha umi ijehérsito kompletoite oĩ isepultúra jerére. Enterove haʼekuéra noñesirkunsidái vaʼekue ha ojejuka espádape, pórke haʼekuéra oikovérõ guare heta omongyhyje vaʼekue umi héntepe. Koʼág̃a oñemotĩta hikuái umi oguejývandi pe yvykuápe.* Elámpe oñemoĩ umi omano vaʼekue apytépe.
26 Mesec ha Tubal+ oĩ upépe ijehérsito kompletoiténdi. Umi isepulturakuéra oĩ pe irréi jerére, enterove haʼekuéra noñesirkunsidái ha ojekutu vaʼekue espádape, pórke haʼekuéra oikovérõ guare heta omongyhyje vaʼekue umi héntepe.
27 ¿Haʼekuéra piko ndopytamoʼãi umi gerréro poderóso noñesirkunsidái ha ojejuka vaʼekuéndi? Umíva ningo oho vaʼekue pe Sepultúrape* hiʼárma de gérra reheve. Umi hénte omoĩta chupekuéra ijespáda iñakã guýpe,* ha pe kastígo hembiapo vaikuére hoʼáta ikanguekuéra ári, pórke koʼã gerréro poderóso oikovérõ guare heta omongyhyje vaʼekue umi héntepe.
28 Péro nde* katu reñembochipéta umi noñesirkunsidái vaʼekue apytépe, ha repytáta umi ojejuka vaʼekuéndi espádape.
29 Edom+ oĩ upépe, umi irréi ha kompletoite umi kuimbaʼe iñimportantevéva. Umíva ipoderósoramo jepe oñemoĩ chupekuéra umi ojejuka vaʼekuéndi espádape. Haʼekuéra opytáta umi noñesirkunsidái vaʼekuéndi+ ha umi oguejy vaʼekuéndi pe yvykuápe.*
30 Upépe oĩ enterove umi prínsipe* nortegua, kompletoite umi sidonio ndive.+ Umíva ningo ñemotĩme oguejy umi ojejuka vaʼekuéndi, oporomongyhyjéramo jepe ipoderóso haguére. Haʼekuéra opytáta oñesirkunsidaʼỹre umi ojejuka vaʼekuéndi espádape, ha oñemotĩta umi oguejývandi pe yvykuápe.*
31 Faraón ohechapáta entéro umi mbaʼe ha oñekonsoláta pe oiko vaʼekuére ijehérsito rehe.+ Faraón ha kompletoite ijehérsitope ojejukáta espádape’, heʼi Ñandejára Jehová ogovernáva opa mbaʼe.
32 ‘Faraón ha kompletoite ijehérsito opytuʼúta umi noñesirkunsidáiva apytépe, umi ojejuka vaʼekuéndi espádape, pórke haʼe oikovérõ guare heta omongyhyje vaʼekue umi héntepe’, heʼi Ñandejára Jehová ogovernáva opa mbaʼe”.
Nóta
^ Upéva hína pe áño 12 ojegueraha hague hetãgui rréi Joaquín, Ezequiel ha umi ótro judíope.
^ Hebréope: “umi irriokuéra”.
^ Hebréope: “heta arrójo henyhẽta upe osẽvape ndehegui”.
^ Oiméne oñeñeʼẽ hína pe mes 12-re. Ehecha versíkulo 1.
^ Térã: “sepultúrape”.
^ Hebréope: “Haʼe”.
^ Hebréope: “haʼekuéra”.
^ Hebréope: “Umi isepulturakuéra oĩ ijerére”.
^ Térã: “sepultúrape”.
^ Térã: “sepultúrape”.
^ Péva hína pe nasión de Elam.
^ Térã: “sepultúrape”.
^ Amalisia oñeñeʼẽ hína umi gerréro oñeñotỹ vaʼekuére ijespáda reheve, ha oñeñotỹvo oñemombaʼe chupekuéra umi militarkuéra apytépe.
^ Amalisia oñeñeʼẽ hína faraón rehe térã Egíptore.
^ Térã: “sepultúrape”.
^ Térã: “líder”.
^ Térã: “sepultúrape”.
