Ezequiel 34:1-31
34 Jehová oñeʼẽ jey chéve ha heʼi:
2 “Yvypóra raʼy, eprofetisa Israel pastorkuéra kóntrape. Eprofetisa ha ere umi pastórpe: ‘Péicha heʼi Ñandejára Jehová ogovernáva opa mbaʼe: “¡Aichejáranga umi pastór oĩva Israélpe,+ haʼekuéra ningo oñangareko ijehénte! ¿Ndahaʼéi piko umi ovecháre la oñangareko vaʼerã umi pastór?+
3 Peẽ peʼu umi animál kyrakue ha pemonde umi ao ojejapo vaʼekue lánagui, ha pekarnea pe animál ikyravéva+ péro napeñangarekói che ovechakuérare.+
4 Peẽ napemombaretéi pe ikangývape ni napemonguerái pe hasývape, napevendái pe oñelastima vaʼekuépe, ndapeguerúi jey umi oñedesatina vaʼekuépe ni ndapehekái umi okañy vaʼekuépe.+ Upéva rangue peẽ mbaretépe pegoverna chupekuéra ha petrata vai.+
5 Upéicha rupi isarambipa hikuái ndorekói rupi pastór.+ Upévare umi animál salváhe hoʼu chupekuéra.
6 Che ovechakuéra oñedesatina oikóvo umi montáñare ha kompletoite umi sérrore. Umi che ovechakuéra isarambipa opárupi ko yvy ape ári ha ndaipóri ohekáva chupekuéra ni oñehaʼãva otopa hesekuéra.
7 Upévare peẽ pastór, pehendu mbaʼépa heʼi Jehová:
8 ‘“Che rekovére ahura peẽme”, heʼi Ñandejára Jehová ogovernáva opa mbaʼe, “umi che ovechakuérape ojejagarra, ha opaichagua animál salváhe oreko chupekuéra hembiʼurã, pórke ndaipóri vaʼekue pastór, ha umi che pastorkuéra ndohekái che ovechakuérape, upéva rangue haʼekuéra osegi oñangareko ijehénte ha noñangarekói che ovechakuérare”’,
9 upévare peẽ pastór, pehendu mbaʼépa heʼi Jehová.
10 Péicha heʼi Ñandejára Jehová ogovernáva opa mbaʼe: ‘Che aime hína umi pastorkuéra kóntrape, ha akovráta chupekuéra upe ojapo vaʼekuére che ovechakuérare,* amosẽta chupekuéra anivéma hag̃ua oñangareko* che ovechakuérare,+ ha noñangarekomoʼãvéima hikuái ijehénte. Asalváta che ovechakuérape umi pastór jurúgui ha ndorekomoʼãvéima chupekuéra hembiʼúramo’”.
11 Pórke péicha heʼi Ñandejára Jehová ogovernáva opa mbaʼe: “Che aime hína ápe ha chete voi ahekáta che ovechakuérape ha añangarekóta hesekuéra.+
12 Añangarekóta che ovechakuérare ojapoháicha peteĩ pastór otopa vaʼekue umi ijovecha isarambipa vaʼekuére, ha omongaru chupekuéra.+ Asalváta chupekuéra entéro umi lugár isarambi haguépe pe día ijaraipa ha iñypytũmbárõ guare.+
13 Aguenohẽta che ovechakuéra umi puévlogui ha ambyatýta chupekuéra umi diferénte lugárgui ha aguerúta ijyvy teépe.+ Ha amongarúta chupekuéra Israel montañakuérape, umi arrójo ykére ha kompletoite umi lugár ojeikoha ypýpe ko yvy ape ári.
14 Peteĩ pastoty porãme amongarúta chupekuéra, ha pe lugár opasteataha hikuái oĩta Israel montañakuéra ijyvatetéva ári.+ Upépe oñenóta hikuái peteĩ pastotýpe,+ ha okarúta umi pastoty porãme Israel montañakuéra ári”.
15 “Chete voi amongarúta umi che ovechakuéra+ ha chete amoñenóta chupekuéra opytuʼu hag̃ua”,+ heʼi Ñandejára Jehová ogovernáva opa mbaʼe.
16 “Ahekáta pe okañy vaʼekuépe+ ha agueru jeýta pe oñedesatina vaʼekuépe, avendáta pe oñelastima vaʼekuépe ha amombaretéta pe ikangývape. Péro ahundíta pe ikyra ha imbaretévape, upévape ahusgáta ha akastigáta omereseháicha”.
17 Peẽ katu che ovechakuéra, péicha heʼi Ñandejára Jehová ogovernáva opa mbaʼe: “Ahusgáta káda ovechápe, ahusgáta umi ovecha mácho ha umi kavara máchope.+
18 ¿Napeñekontentáima piko pekaru haguére umi pastoty iporãvévape? ¿Pepyrũmba vaʼerã piko avei umi pásto hembývare? Ha peʼu rire pe y ipotĩvéva, ¿pembotyai vaʼerã piko pe y pepyrũmbávo pype?
19 ¿Che ovechakuéra piko okaru vaʼerã pe pastoty peẽ pepyrũmba vaʼekuére, ha hoʼu vaʼerã piko hikuái pe y peẽ pembotyaipa vaʼekue pende pýpe pepyrũmbávo pype?”.
20 Upévare péicha heʼi chupekuéra Ñandejára Jehová ogovernáva opa mbaʼe: “Ápe aime hína ha ahusgáta káda únope, pe ovecha ikyrávape ha pe ovecha ipirúvape.
21 Pórke pende kostádope ha pende atiʼýpe peẽ pemyaña myaña chupekuéra, ha pene ratĩme pesegi pemyaña umi hasývape pemosarambipa peve chupekuéra mombyrymbyry.
22 Ha asalváta che ovechakuérape ha ndojeguerekomoʼãvéima chupekuéra tembiʼurã,+ ha ahusgáta káda ovechápe.
23 Amoĩta peteĩ pastór chupekuéra g̃uarã,+ che siérvo Davídpe,+ ha haʼe oñangarekóta hesekuéra. Haʼete voi omongarúta chupekuéra ha oñangarekóta hesekuéra ojapoháicha peteĩ pastór.+
24 Ha che Jehová haʼéta Ijarakuéra,+ ha che siérvo David omoakãta chupekuéra.+ Chete Jehová haʼéma ko mbaʼe.
25 Ha ajapóta peteĩ kompromíso de paz hendivekuéra,+ ha ahundipaitéta ko yvýgui umi animál salváhe iñarõva,+ péicha oikóta hikuái segúro porã pe desiértope ha okéta umi kaʼaguýpe.+
26 Ajapóta chuguikuéra ha pe lugár oĩvagui che sérro jerére peteĩ vendisión,+ ha amboúta ama itiempoitépe. Umi vendisión hoʼáta amáicha.+
27 Umi yvyramáta hiʼáta, pe yvy oprodusi porãta ha che puévlo oikóta trankílo+ ha segúro porã pe yvýpe. Ha ág̃a amopẽ vove ijugokuéra, ha asalva vove umi orekóvagui chupekuéra esklávoramo,+ oikuaáta hikuái che haʼeha Jehová.
28 Ndoikomoʼãvéima chuguikuéra umi tetãnguéra rembiʼu, ha umi animál salváhe ko yvy ape arigua ndoʼumoʼãvéima chupekuéra, ha oikóta hikuái segúro porã, ha avave nomongyhyjemoʼãi chupekuéra.+
29 Ameʼẽta chupekuéra peteĩ plantasión ojekuaátava opárupi,* ha nomanomoʼãvéima hikuái ñembyahýigui upe paíspe,+ ha umi nasionkuéra noñembohorymoʼãvéima hesekuéra.+
30 ‘Péicha oikuaáta hikuái che Jehová, Ijarakuéra aĩha hendivekuéra, ha haʼekuéra, haʼéva Israel rogaygua haʼeha che puévlo’,+ heʼi Ñandejára Jehová ogovernáva opa mbaʼe”’.
31 ‘Peẽ katu che ovechakuéra,+ che añangareko hína penderehe, ha peẽ ningo kuimbaʼénte hína ha che haʼe pende Jára’, heʼi Ñandejára Jehová ogovernáva opa mbaʼe”.
