Ezequiel 42:1-20
42 Upéi pe kuimbaʼe chegueraha pe korapy okapeguápe oĩva nórte gotyo.+ Chegueraha oĩháme umi komedorkuéra pe espásio nandi ykére,+ nórte gotyo pe óga guasu oĩvagui ijykére.+
2 Pe óga oĩháme pe entráda nortepegua ipuku 51 métro 80 sentímetro,* ha ipe 25 métro 90 sentímetro.*
3 Pe korapy hyepypegua ipe 10 métro 36 sentímetro,*+ ha umi komedór oĩ éntre pe korapy hyepypegua ha pe píso orekóva pe korapy okapegua. Umi komedór oĩ mokõi óga de 3 písope, koʼã óga oĩ ojovái ha káda písope oĩ peteĩ korredór.
4 Koʼã mokõi komedór* mbytépe oĩ peteĩ pasíllo,+ ipéva 5 métro 18 sentímetro* ha ipukúva 51 métro 80 sentímetro.* Umi komedór entráda omaña nórte gotyo.
5 Umi komedór oĩva yvate michĩve umi oĩvagui mbytépe ha yvýpe, pórke umi korredór tuichave ohóvo yvate gotyo.
6 Koʼã komedór ijyvate 3 píso, péro ndorekói pilár oĩháicha umi korapýpe. Upévare pe píso yvategua michĩve umi píso oĩvagui mbytépe ha yvýpe.
7 Pe murálla ojejapóva itágui oĩ oka gotyo umi ótro komedór renondépe, ha omaña pe korapy okapegua gotyo, upe murálla ipuku 25 métro 90 sentímetro.*
8 Umi komedór oĩva ojoykerepa pe korapy okapegua ypýpe oreko 25 métro 90 sentímetro,* péro umi komedór oĩva ojoykerepa pe témplo gotyo oreko 51 métro 80 sentímetro.*
9 Umi komedór oreko peteĩ pasíllo ojeike hag̃ua ésteguio, upéva rupive ikatu ojeike umi komedórpe pe korapy okapeguáguio ládo.
10 Pe murálla ojejapo vaʼekue itágui oĩ éste gotyo, ha ijypýpe oĩ avei umi komedór, pe espásio nandi ha pe óga guasu renondépe.+
11 Umi komedór oĩva sur gotyo oreko avei peteĩ pasíllo ojeike hag̃ua, orekoháicha umi komedór oĩva nórte gotyo.+ Umi komedór oreko la mísma medída, pe ipukukue ha ipekue, orekoháicha umi oĩva nórte gotyo. Ha peteĩchaite avei pe modélo ha umi salída orekóva. Umi iñentráda
12 ojogua umi komedór entráda oĩvape sur gotyo. Oĩ vaʼekue peteĩ entráda oñepyrũháme pe pasíllo, ha hovái oĩ pe tape ohóva pe murálla estepegua gotyo ha ojejapo vaʼekue itágui, ha upérupi ikatu vaʼekue ojeike.+
13 Upéi heʼi chéve: “Umi komedór oĩva nórtepe ha umi komedór oĩva súrpe, umi oĩva pe espásio nandi ypýpe,+ umíva hína umi komedór sagrádo. Upépe umi saserdóte oñemoag̃uíva Jehováre hoʼu umi ofrénda sagradovéva.+ Upépe omoĩ avei hikuái umi ofrénda sagradovéva, umi ofrénda de semílla, umi ofrénda ojepaga hag̃ua umi pekádore ha umi ofrénda por la kúlpa, pórke ko lugár sagrádo hína.+
14 Umi saserdóte oike vove upépe, nosẽi vaʼerã pe lugár sagrádogui pe korapy okapeguápe oipeʼaʼỹre ijao oipuru vaʼekue ombaʼapo hag̃ua,+ pórke umíva sagrádo hína. Haʼekuéra oipuru vaʼerã ótro ao oho hag̃ua umi lugár oñepermitihápe umi héntepe oike”.
15 Ha omedipa rire pe témplo ryepy,* chegueraha oka gotyo pe okẽ omañáva éste gotyo rupive,+ ha omedi pe lugár kompletoite.
16 Oipuru pe takuára oñemediha* omedi hag̃ua pe kostádo oĩva éste gotyo. Ha asegún pe takuára oñemediha, upe kostádo oreko 1 kilómetro 555 métro,* peteĩ púnta guive pe ótra púnta peve.
17 Upéi omedi pe kostádo nórte gotyo. Ha asegún pe takuára oñemediha, upe kostádo oreko 1 kilómetro 555 métro.*
18 Upéi omedi pe kostádo sur gotyo. Ha asegún pe takuára oñemediha, upe kostádo oreko 1 kilómetro 555 métro.*
19 Upéi ojere pe kostádo rehe oéste gotyo. Ha asegún pe takuára oñemediha, upe kostádo oreko 1 kilómetro 555 métro.*
20 Haʼe omedi umi 4 kostádo. Pe témplo oreko vaʼekue peteĩ murálla ijerére kompletoite,+ ipukúva 1 kilómetro 555 métro,* ha ipéva 1 kilómetro 555 métro,*+ upe murálla osepara pe lugár sagrádo pe lugár ndahaʼéivagui sagrádo.+
Nóta
^ Hebréope: “50 codo”.
^ Hebréope: “20 codo”.
^ Térã: “koty”.
^ Hebréope: “10 codo”.
^ Asegún pe Septuaginta Griega “ipuku 100 codo”. Pe téxto hebréope heʼi: “peteĩ pasíllo ipéva 1 codo”.
^ Hebréope: “50 codo”.
^ Hebréope: “50 codo”.
^ Hebréope: “100 codo”.
^ Hebréope: “pe óga ryepy”.
^ Hebréope: “500 takuára”.
^ Hebréope: “500 takuára”.
^ Hebréope: “500 takuára”.
^ Hebréope: “500 takuára”.
^ Hebréope: “500 takuára”.
^ Hebréope: “500 takuára”.
