Ezequiel 43:1-27
43 Upéi haʼe chegueraha oĩháme pe okẽ omañáva éste gotyo.+
2 Upépe ahecha Israel Jára podér omimbipáva ouha hína ésteguio ládo,+ ha iñeʼẽ ryapu haʼete y hatã osyrýva hína,+ ha ipodér omimbipáva ohesape pe yvy.+
3 Upe ahecha vaʼekue ojogua pe visión ahecha vaʼekuépe ajúrõ guare aikuaauka hag̃ua pe siuda oñehunditaha.* Haʼete voi upe ahecha vaʼekue rrío Kebar ypýpe,+ upémarõ añesũ ha añakãityete.
4 Upéi Jehová podér omimbipáva oike pe témplope,* pe okẽ omañáva éste gotyo rupive.+
5 Ha peteĩ espíritu* chejagarra ha chemoinge pe korapy hyepypeguápe, ha ahecha Jehová podér omimbipáva ojagarrapaite hague pe témplo.+
6 Upéi ahendu Ñandejára* oñeʼẽha chéve pe témplo guive, ha upe kuimbaʼe ou oñemboʼy che ykére.+
7 Ñandejára* heʼi chéve:
“Yvypóra raʼy, kóva haʼe hína pe lugár oĩha che tróno+ ha che pyrendag̃ua,+ koʼápe che aikóta pára siémpre che puévlo Israel apytépe.+ Israel rogaygua nomongyʼamoʼãvéima che réra sagrádo,+ haʼekuéra ni irreikuéra, pórke haʼekuéra omongyʼa che réra chetraisionávo* ha oadorávo umi idioskuéra peteĩ rréicha.*
8 Avei koʼã óga entráda omoĩ che róga entráda ykére, ha umi hokẽ márko che róga rokẽ márko ykére, ha peteĩ parénte oredividi.+ Haʼekuéra omongyʼa che réra sagrádo umi mbaʼe oporombojeguarúva ojapo vaʼekuére oikóvo, upévare arrenegaiterei ha ahundi chupekuéra.+
9 Ha anivémakena chetraisiona* hikuái, tomomombyry upéva chehegui, ha tomomombyry avei irreikuéra reʼongue, ha péicha aikóta ijapytepekuéra pára siémpre.+
10 Nde katu yvypóra raʼy, ere Israel rogayguápe mbaʼéichapa pe témplo,+ ikatu hag̃uáicha otĩ hikuái hembiapo vaikuére,+ ha ostudia vaʼerã hikuái pe pláno.*
11 Ha otĩramo hikuái hembiapo vai haguére, remombeʼu vaʼerã chupekuéra pe témplo pláno, mbaʼe modélopa oreko, umi salída ha entráda orekóva.+ Ehechauka chupekuéra kompletoite umi pláno ha umi léi oñeʼẽva hese ha mbaʼeichaitépa ojejapo vaʼekue pe témplo. Koʼã mbaʼe reskrivi vaʼerã henondepekuéra ikatu hag̃uáicha haʼekuéra oñatende kompletoite iplánore ha okumpli hag̃ua hikuái entéro mbaʼe oĩva umi léipe.+
12 Kóva hína pe léi oñeʼẽva pe témplore: kompletoite pe lugár oĩva pe montáña ruʼãme, pe témplo jerére kompletoite sagradoiterei hína.+ Kóva hína pe léi oñeʼẽva pe témplore.
13 Koʼág̃a ahechaukáta ndéve mbaʼeichaitépa tuicha pe altár.+ Kóva oñemedi avei oñemedi haguéicha pe témplo.* Pe iváse oreko 51,8 sentímetro* ha ipe 51,8 sentímetro.* Pe ikántore oreko peteĩ vórde opuʼãva ha ipéva 22,2 sentímetro.* Péva hína pe altár váse.
14 Pe gráda oĩva pe váse ári ijyvate 1 métro 4 sentímetro* ha ipe 51,8 sentímetro.* Pe tercera gráda ijyvate 2 métro 7 sentímetro* ha ipe 51,8 sentímetro.*
15 Pe párte ijyvatevéva haʼe hína pe oñemoĩha tata pe altárpe, ha upéva ijyvate 2 métro 7 sentímetro,* ha pe yvate umi 4 iñeskínagui osẽ umi 4 vaka ratĩ joguaha.+
16 Pe párte oñemoĩha tata pe altárpe kuadrádo vaʼekue, ha umi 4 ládo ipuku 6 métro 22 sentímetro.*+
17 Pe tercera gráda ipuku umi 4 ládo 7 métro 25 sentímetro.* Kóva ipeve pe gráda oĩvagui hiʼári 51,8 sentímetro* umi 4 ládope. Pe ikántore oreko peteĩ vórde opuʼãva ha ipéva 25,9 sentímetro.* Ha pe iváse ipe 51,8 sentímetro* umi 4 ládope.
Ha pe eskaléra gráda omaña éste gotyo”.
18 Upéi pe kuimbaʼe heʼi chéve:* “Yvypóra raʼy, péicha heʼi Ñandejára Jehová ogovernáva opa mbaʼe: ‘Koʼã mbaʼe ojejapo vaʼerã ág̃a ojejapo vove pe altár, ojeofrese hag̃ua hiʼári umi ofrénda ojehapypaitéva ha ojehypýi hag̃ua hese tuguy’.+
19 ‘Remeʼẽ vaʼerã peteĩ tóro raʼyrusu ojejapo hag̃ua pe ofrénda ojepaga hag̃ua umi pekádore,+ upéva remeʼẽ vaʼerã umi saserdóte levítape haʼéva Sadoc familiare,+ haʼekuéra hína umi oñemoag̃uíva che rendápe cheservi hag̃ua’, heʼi Ñandejára Jehová ogovernáva opa mbaʼe.
20 ‘Rejagarra vaʼerã michĩmi pe animál ruguykue, ha emona pe tuguy umi vaka ratĩ joguaháre oĩva pe altárpe, umi 4 eskína orekóvare pe tercera gráda ha pe ivórdere kompletoite alrrededór. Péicha resantifikáta* upéva ojejapo hag̃ua hiʼári umi sakrifísio.+
21 Upéi ejagarra pe tóro raʼyrusu, haʼéva pe ofrénda ojepaga hag̃ua umi pekádore, ikatu hag̃uáicha ojehapy pe lugár ojeporavo vaʼekuépe oĩva oka gotyo pe témplogui.+
22 Upéi pe segundo díape, reofrese vaʼerã peteĩ kavara mácho isánova ojejapo hag̃ua pe ofrénda ojepaga hag̃ua umi pekádore, ha umi saserdóte osantifikáta pe altár osantifikáma haguéicha pe tóro raʼyrusu rupive’.
23 ‘Resantifikapa rire reofreséta peteĩ tóro raʼyrusu isánova ha peteĩ ovecha mácho.
24 Representa vaʼerã umíva Jehová renondépe ha umi saserdóte opoíta hiʼári juky+ ha oofreséta ofrénda ojehapypaitévaramo Jehovápe.
25 Reofreséta 7 día aja peteĩ kavara mácho ojejapo hag̃ua káda día pe ofrénda ojepaga hag̃ua umi pekádore,+ avei peteĩ tóro raʼyrusu ha peteĩ ovecha mácho. Reofrese vaʼerã animál ndorekóiva defékto.*
26 Umi saserdóte osantifika vaʼerã pe altár 7 día aja, avei omopotĩ ha oheja vaʼerã ojepuru hag̃uáicha.
27 Oñekompleta vove umi día, ha pe 8 diahápe+ ha upe rire avei, umi saserdóte oofreséta pe altár ári umi iñofrénda* ojehapypaitéva ha umi ofrénda de paz, ha che poguerohorýta’,+ heʼi Ñandejára Jehová ogovernáva opa mbaʼe”.
Nóta
^ Hebréope: “ajúrõ guare ahundi hag̃ua ko siuda”. Ikatu avei: “haʼe oúrõ guare”.
^ Hebréope: “ógape”.
^ Pe ñeʼẽ espíritu ikatu hína heʼise peteĩ ánhel térã Ñandejára espíritu.
^ Ikatu avei: “pe kuimbaʼe”.
^ Hebréope: “umi irreikuéra omano vaʼekue reʼongue”.
^ Térã: “ojeprostituívo espirituálmente”.
^ Ikatu avei: “pe kuimbaʼe”.
^ Térã: “ojeprostitui espirituálmente”.
^ Hebréope: “omedi vaʼerã pe pláno”.
^ Hebréope: “1 palmo”.
^ Hebréope: “1 codo”.
^ Pe téxto hebreo ohechauka pe altár oñemedi hague pe codo lárgope. Ehecha Eze 40:5. Ehecha Info. B14.
^ Hebréope: “1 codo”.
^ Hebréope: “2 codo”.
^ Hebréope: “1 codo”.
^ Hebréope: “4 codo”.
^ Hebréope: “1 codo”.
^ Hebréope: “4 codo”.
^ Hebréope: “12 codo”.
^ Hebréope: “1 codo”.
^ Hebréope: “médio codo”.
^ Hebréope: “1 codo”.
^ Hebréope: “14 codo”.
^ Oiméne omombeʼu peteĩ mensáhe oúva Ñandejáragui.
^ Hebréope: “remopotĩta pekádogui”.
^ Térã: “perfékto”.
^ Upéva hína umi hénte mbaʼéva.
