Ezequiel 6:1-14
6 Jehová oñeʼẽ jey chéve ha heʼi:
2 “Yvypóra raʼy, ejere emaña umi montáña de Israel gotyo ha eprofetisa ikontrapekuéra.
3 Ha ere vaʼerã: ‘Israel montañakuéra, pehendu la heʼíva Ñandejára Jehová ogovernáva opa mbaʼe: Péicha heʼi Ñandejára Jehová ogovernáva opa mbaʼe umi montañakuérape, umi sérrope, umi ysyrýpe ha umi ñúme: “Aguerúta pene kóntrape peteĩ espáda ha ahundíta umi lugár yvate peguerekóva.
4 Pende altarkuéra oñemonguʼíta, umi pende altár ojehapyha insiénso ojeitypáta,+ ha amombóta umi ojejuka vaʼekue reʼongue umi pende dios puerkésa* renondépe.+
5 Umi israelita reʼongue amombóta umi idiós puerkésa renondépe, ha umi pene kanguekue amosarambíta umi pende altarkuéra jerére.+
6 Entéro umi lugár peikohápe oñehundíta umi siuda,+ ha umi lugár yvate oñemonguʼíta ha opytáta oñehundiete.+ Umi pende altár ojeitypáta ha oñemonguʼíta, ha umi pende dios puerkésa oñehundipáta, umi pende altár ojehapyha insiénso ojeitypáta ha oñehundipaitéta umi pene rembiapokue.
7 Ha umi ojejuka vaʼekue hoʼáta pende apytépe,+ ha peikuaáta che haʼeha Jehová.*+
8 Péro amohembýta unos kuántope, pórke oĩta pende apytépe ojesalváva pe espádagui umi tetãnguéra apytépe, ág̃a peñemosarambipa vove umi ótro paíspe.+
9 Ha umi ojesalva vaʼekue imanduʼáta cherehe umi país ojegueraha haguépe prisionéroramo.+ Ohechakuaáta hikuái chemokorasõ rasy hague, chetraisiona* rupi ikorasõme ha cherrechasa,+ ha hesa verapa ohóvo hikuái* umi idiós puerkésa rapykuéri.+ Haʼekuéra otĩetereíta ha ijeguarúta ojapo haguére umi mbaʼe vai ha entéro mbaʼe oporombojeguarúva.+
10 Oikuaáta hikuái che haʼeha Jehová, ha nañeʼẽreíri hague aamenasárõ guare aguerutaha hiʼarikuéra ko mbaʼe vai”’.+
11 Péicha heʼi Ñandejára Jehová ogovernáva opa mbaʼe: ‘Ejopy ne akã* ha esapateapa, embyasy umi mbaʼe vai ha entéro mbaʼe oporombojeguarúva ojapo vaʼekue Israel rogaygua, pórke omanóta hikuái mbaʼasýgui, ñembyahýigui ha espádape.+
12 Pe oĩva mombyry omanóta mbaʼasýgui, pe oĩva ag̃ui omanóta espádape, ha oimeraẽ ojesalváva koʼãvagui ha hembýva omanóta ñembyahýigui. Ahykuavóta hiʼarikuéra che pochykue.+
13 Ha peẽ peikuaa vaʼerã che haʼeha Jehová,+ ág̃a umi omanóva isarambipa vove umi idiós puerkésa renondépe, umi ijaltarkuéra jerére,+ umi serrokuéra ári, umi montáña púntape, umi yvyramáta guasu guýpe, ha umi yvyramáta ijyvatéva rakã guýpe, entéro umi lugár haʼekuéra ojapo haguépe ofrénda hyakuã asýva ombopyʼaguapy hag̃ua umi idiós puerkésape.+
14 Ahupíta che po akastiga hag̃ua chupekuéra ha amonandíta pe yvy, ha kompletoite umi lugár haʼekuéra oikoha opytáta nandive pe desiérto oĩvagui Diblá ypýpe. Ha oikuaáta hikuái che haʼeha Jehová’”.
Nóta
^ Hebréope ojepuru peteĩ ñeʼẽ heʼiséva “animál rekaka”, ha ojepuru ojeapoʼi hag̃ua ótrope.
^ Ko fráse ojepuru mas de 60 vése Ezequiélpe ha heʼise oñembotuichataha Jehová réra ko yvy ape ári. Kóva hína pe primera ves ojepurúva.
^ Térã: “hekovai osegívo hikuái”.
^ Térã: “hekokyʼa, hekovai”.
^ Hebréope: “Ejepopete”. Yma ojejapo vaʼekue péicha ojehechauka hag̃ua ndojevyʼaiha.
