Ezequiel 7:1-27
7 Jehová oñeʼẽ jey chéve, ha heʼi:
2 “Yvypóra raʼy, Ñandejára Jehová ogovernáva opa mbaʼe heʼi péicha Israel yvýre: ‘¡Og̃uahẽma pe fin! Pe fin oúma ko yvy tuichakuére.
3 Pe fin oĩma nde ári, ha ahykuavóta nde ári che pochykue, ha rohusgáta asegún ne rembiapokue, ha rokovráta entéro umi mbaʼe oporombojeguarúva rejapo vaʼekuére.
4 Norombyasymoʼãi ni ndoroiporiahuverekomoʼãi,+ ha rokastiga vove rehechakuaáta umi mbaʼe vai nderupytyha ne rembiapo vaikuére.+ Ha reikuaáta che haʼeha Jehová’.+
5 Péicha heʼi Ñandejára Jehová ogovernáva opa mbaʼe: ‘Peteĩ sarambi guasu, peteĩ sarambi guasu ijojahaʼỹva ou hína.+
6 Peteĩ fin ou hína, upe fin og̃uahẽta, reimoʼãʼỹve jave oúta* nde ári. ¡Emañami! Ou hína.
7 Og̃uahẽma ne túrno, nde reikóva pe yvýpe. Og̃uahẽma hína pe tiémpo, hiʼag̃uimbaitéma hína upe día. Umi hénte oñemondyipa ha osapukái joa umi montáñare, péro ndahaʼéi vyʼágui.+
8 Koʼẽrõitéma ahykuavóta nde ári che pochykue,+ ha ajahéita nderehe,+ ha rohusgáta asegún ne rembiapokue ha rokovráta entéro umi mbaʼe oporombojeguarúva rejapo vaʼekuére.
9 Norombyasymoʼãi ni ndoroiporiahuverekomoʼãi.+ Che rokastiga vove rehechakuaáta umi mbaʼe vai nderupytyha ne rembiapo vaikuére. Ha reikuaáta che haʼeha Jehová, ha che rokastigaha hína.+
10 ¡Pemañami, og̃uahẽma hína pe día!+ Ne túrno og̃uahẽma, pe garróte aipurútava rokastiga hag̃ua oĩma aipuru hag̃uáicha. Pe enemígo oñemombaʼeguasuve hína oikóvo.
11 Ne rembiapo vaikue káusare,+ pe garróte ndegolpea vaietereíta. Ni peteĩva ndapejesalvamoʼãi, ndojehejamoʼãi peẽme ni umi pende rrikésa, ni umi pene hénte aty ha avavéma napenembotuichamoʼãvéi.
12 Oúta pe tiémpo, pe día og̃uahẽta. Aníke ovyʼa pe ombaʼejoguáva, ha pe ovendéva noñembyasýi vaʼerã, pórke Ñandejára ipochy enterovete umi hénte aty kóntrape.*+
13 Pórke pe ovendéva ndoumoʼãvéima pe yvy ovende vaʼekuépe, haʼe ojesalváramo jepe, pórke pe visión haʼe hína enterovete umi hénte aty kóntrape. Ni peteĩ ndoumoʼãvéima, ha ni peteĩ ndojesalvamoʼãi hembiapo vai káusare.*
14 Ombopúma hikuái pe trompéta+ ha enterovéva ojepreparapáma, péro avave ndohói oñorairõ, pórke che chepochy enterove umi hénte aty kóntrape.+
15 Pe espáda ojuka umi okápe oĩvape,+ ha pe mbaʼasy ha ñembyahýi ojuka umi oĩvape óga ryepýpe. Oimeraẽ oĩva ñúme omanóta espádape ha umi oĩva pe siudápe omanóta ñembyahýi ha mbaʼasýgui.+
16 Umi ojesalváva koʼã mbaʼégui katu ohóta okañy umi montáñare, ojoguáta hikuái umi palóma oĩvape umi ñúre, káda uno hasẽta hembiapo vaikuére.+
17 Umi ijyvakuéra ikangypáta ha umi irrodillakuéra hykuepáta.*+
18 Omondéta hikuái umi ao ohechaukáva oñembyasyha,+ ha oryrýi osusũta hikuái okyhyjégui.* Enterovete oñemotĩta ha oñemoakã perõmbáta.*+
19 Haʼekuéra omombóta ipláta kállepe ha hiʼorokuéra ombojeguarúta chupekuéra. Pe pláta ni pe óro ndosalvamoʼãi chupekuéra Jehová ipochyha díape.+ Haʼekuéra* nahyg̃uatãmoʼãi ha ipyʼa nandíta, pórke umíva* omoñepysanga chupekuéra ojapo hag̃ua ivaíva.
20 Haʼekuéra oñemombaʼeguasu iporãiterei haguére umi iñadornokuéra, ha umívagui* ojapo hikuái umi idioskuéra oporombojeguarúva raʼanga, umi idioskuéra puerkésa.+ Upéicha rupi koʼã mbaʼégui ajapóta peteĩ mbaʼe ombojeguarúva chupekuéra.
21 Umíva* ameʼẽta umi extranhérope osakea hag̃ua, ha umi hénte aña ko yvy ape ariguápe ogueraha hag̃ua imbaʼerã, ha haʼekuéra omongyʼáta umíva umi tesóro.
22 Añemolómota chuguikuéra,+ ha omongyʼáta hikuái che lugár sagrádo* ha umi mondaha oikéta upépe ha omongyʼáta.+
23 Ejapo umi kadéna+ ojepurútava umi ojeguerahávare prisionéroramo, pórke umi hénte omano hína opárupi ko yvy ape ári ojehusga vai rupi chupekuéra,+ ha pe siuda henyhẽte violénsiagui.+
24 Aguerúta umi mbaʼe ivaivéva umi tetãgui,+ ha ojagarráta chuguikuéra umi hogakuéra+ ha opáta umi oñemombaʼeguasúva imbarete haguére, ha umi ilugár sagrádo oñemongyʼapaitéta chuguikuéra.+
25 Ág̃a ojejopy vai vove, ohekáta hikuái pyʼaguapy, péro ndotopamoʼãi.+
26 Ojoapykuéri oúta umi sarambi guasu, ha ojoapykuéri og̃uahẽta umi notísia, ha umi hénte ohekáta peteĩ proféta ohecháva visión.+ Ndovalemoʼãi mbaʼeverã umi saserdóte omboʼéva* ha umi konsého omeʼẽva umi kuimbaʼe oporomoakãva.*+
27 Pe rréi oñembyasýta,+ ha pe héfe prinsipál ojedesesperáta,* ha umi hénte ko yvy arigua ipo ryryipáta okyhyjégui. Atratáta chupekuéra asegún la hembiapokuéra, ha ahusgáta chupekuéra haʼekuéra ohusga haguéicha ótrope. Ha oikuaáta hikuái che haʼeha Jehová’”.+
Nóta
^ Hebréope: “opáyta”.
^ Péva heʼise ni umi ojoguáva peteĩ yvy, ni umi ovendéva noñevenefisiamoʼãiha chugui, pórke pe ñehundi ohupytýta enterovépe.
^ Ikatu avei: “hembiapo vai rupive”.
^ Péva heʼise okuarupataha hikuái ijehe okyhyje rupi.
^ Péva heʼise haʼekuéra oñemoakã perõtaha oñembyasy rupi.
^ Hebréope: “ñemondýi ojahoʼíta chupekuéra”.
^ Térã: “Hiʼalmakuéra”.
^ Péva hína ipláta ha hiʼorokuéra.
^ Péva hína umi ikosakuéra de óro ha de pláta.
^ Péva hína ipláta ha hiʼorokuéra oipurúva hikuái ojapo hag̃ua umi idioskuéra raʼanga.
^ Amalisia koʼápe oñeñeʼẽ hína pe koty fondopeguáre oĩva Jehová santuáriope.
^ Térã: “instruksión”.
^ Hebréope: “ansianokuéra”.
^ Térã: “opytáta yvýre”.
