Job 4:1-21
4 Upémarõ Elifaz,+ pe temanita, ombohovái Jóbpe ha heʼi:
2 “Oĩramo heʼiséva ndéve peteĩ mbaʼe, ¿nepasiénsiatapa rehendu hag̃ua chupe?
Pórke che haʼétamante ndéve la apensáva.
3 Nde ningo Job hetápe rekorrehi vaʼekue,ha siémpre remombarete vaʼekue umi ikangývape.
4 Umi mbaʼe eréva ningo omopuʼã vaʼekue umi oñepysangávape,ha remombarete vaʼekue umi hoʼa potávape.*
5 Péro koʼág̃a umi provléma oupaite nde ári,ndevehaitéma otoka ha reñedesanima.
6 Nde ningo rerrespetaite Ñandejárape, ¿mbaʼére piko upéicharõ nderejeroviái hese?
Ndéngo neñeʼẽrendu chupe,+ ¿ndereguerekói piko esperánsa hese?
7 Epensamína, ¿umi ivuénova piko arakaʼe guive péicha oñehundi?
¿Arakaʼe guive piko umi persóna ojapóva iporãva oñehundi?
8 Péro ahecháma mbaʼéichapa umi okalkuláva ojapo hag̃ua ivaíva,ha umi iñañáva osẽ vai pórke hesekuérante ojerepa jey umi mbaʼe vai ojaposéva.
9 Ñandejára espíritu rupive haʼekuéra oñehundi,haʼe ipochyeterei rupi opa rei hikuái.
10 Umi león imbarete ha ipochy, ha mombyry guive oñehendu umi león imitãvéva okororõramo,péro imbaretevéramo jepe hikuái, lomímonte hãinguéra opẽmbáne.
11 Peteĩ león omano ndorekovéi rupi animál hoʼu vaʼerã,ha umi león raʼy katu isarambipa.
12 Peteĩ visiónpe oñemombeʼu chéve álgo kirirĩhaitépe,ahendu peteĩ mbeguemi oñeʼẽva.
13 Che akete upe pyharépeha ahecha heta mbaʼe vai chemongyhyjéva.
14 Asosopaite apytávo,ha akyhyjeterei.*
15 Peteĩ espíritu ohasa che renondérupi,ha chemopirĩmbaite.
16 Pe espíritu opyta pe che aĩháme,ahecha álgo, péro ndaikuaái mbaʼépa.
Oĩ kuri che renondetépe,ha mbaʼevete ndoikói, upéi ahendu heʼiha:
17 ‘¿Ikatu piko peteĩ yvypóra rei hekojojave Ñandejáragui?
Térã, ¿ikatu piko hekopotĩve Ijapoharégui?’.
18 Ñandejára ningo ndojeroviái isiervokuérare,ha hiʼanhelkuérare jepe otopa defékto.
19 Koʼýte upéicharõ otopáta defékto umi kuimbaʼe pekadór rehe.
Yvypóra ningo ojogua umi óga de adóvepe oñemopuʼãva yvy reípente,+haʼekuéra haʼete umi vícho ndahasyietéva jajuka hag̃ua.
20 Pyhareve onase ha kaʼarúrõ g̃uarã omanóma,oñehundíma hikuái opa ára g̃uarã ha avave ni ndopillái.
21 Yvypóra ojogua umi óga kárpape, oñemondohórõ isã, oúma yvýpe.
Haʼekuéra omano oikuaaʼỹre mbaʼevete, umi iñaranduʼỹvaicha”.
