Proverbios 12:1-28
12 Pe persóna ohayhúva umi konsého oaprendese heta mbaʼe,+péro upe nohenduséiva ojeʼéva chupe ohechauka itavyha.*+
2 Jehová oguerohory pe persóna ivuénovape,péro okondenaite pe oikóvape okalkula mbaʼéichapa iñañáta.+
3 Umi persóna ojapóva ivaíva ndaikatúi ohaʼarõ oiko segúro porã,+péro umi ihústova ojogua peteĩ yvyramáta hapo mbarete porãvape opytáva pára siémpre.
4 Pe tembireko ikatupyrýva* haʼete voi peteĩ koróna iporãva oadornáva iména akã,+péro pe tembireko omotĩva iménape haʼete voi peteĩ mbaʼasy okarúva ikanguére.+
5 Umi ihústova siémpre opensa umi mbaʼe porãre,umi iñañáva konsého katu ñandegueraha tape vaíre.
6 Umi mbaʼe heʼíva umi iñañáva haʼete peteĩ persóna opeskáva hapicháre ojuka hag̃ua chupe,+péro umi mbaʼe heʼíva umi ihústova oipytyvõ ótrope ojesalva hag̃ua.+
7 Umi iñañáva róga oñehundíta ha odesapareséta,péro umi ihústova róga opytáta.+
8 Oñemombaʼe peteĩ persóna opensa porãvape oñeʼẽ mboyve,+péro ojedespresia umi hovamokõivape.+
9 Ikuentave neumílde ha peteĩnte ne sirviénte,reiko rangue reñembotuicha ha ndererekói ni reʼu vaʼerã.*+
10 Pe ihústova okuida porã iñanimál rehe,*+
pe iñañáva katu opensa ivuenoha péro añetehápe iñañaiterei.
11 Pe oñemitỹva ikokuépe orekóta heta tembiʼu,+péro pe vyroreínte ojaposéva itavy* ha ndohupytymoʼãi mbaʼeve.
12 Pe iñañáva noñekontentái ha oipota umi mondaha omonda vaʼekue jepe,umi ihústova katu ojogua umi yvyramáta hapo pypukúva ha hiʼa porãvape.
13 Pe iñañáva oiko heʼi heta mbaʼe vai ha haʼe jeýnte ojeperhudika,+péro pe ihústova ojei heta akã rasýgui.
14 Umi mbaʼe heʼíva peteĩ persóna ikatu oipytyvõ chupe oho porã hag̃ua,+asegún la ojapóva oñemyengoviáta chupe.
15 Pe itavýva opensa oĩ porãha la ojapóva,+pe iñarandúva katu oasepta umi konsého oñemeʼẽva chupe.+
16 Peteĩ persóna itavýva pyaʼeterei ipochy,+péro pe iñentendídova ombohasa reínte oĩramo oofendéva chupe.
17 Pe testígo verdadéro siémpre heʼi pe añetegua,péro pe testígo fálso siémpre oporombotavy.
18 Oĩ nopensáiva oñeʼẽ hag̃ua, ha umi mbaʼe heʼíva ñandekutu rasy peteĩ espádaicha,péro umi iñarandúva heʼíva haʼete peteĩ pohã ñanemongueráva.+
19 Umi siémpre heʼíva pe añetegua oikóta opa ára g̃uarã,+péro umi ijapúva ndohopukumoʼãi.+
20 Umi orekóva mbaʼe vaínte voi ikorasõme, siémpre okalkula iñaña hag̃ua,péro umi oipytyvõva oĩ hag̃ua pyʼaguapy, siémpre ovyʼa.+
21 Mbaʼeve ivaíva ndojehumoʼãi umi ihústovape,+péro umi iñañáva nosẽmoʼãi provlémagui.+
22 Jehovápe ombojeguaru umi ijapúva,+péro oguerohory umi ojapóvape iporãva.
23 Pe persóna iñarandúva ndoikói omombeʼúnte la oikuaáva,péro umi itavýva ndojokói ijuru ha vyroreímante heʼi.+
24 Umi ikyreʼỹva ombaʼapo hag̃ua odirihíta ótra héntepe,+péro umi iñateʼỹvape oñemeʼẽta traváho pohýi.+
25 Peteĩ persóna ojepyʼapyetereíramo ou oñedeprimi,+péro remokyreʼỹramo chupe hetiaʼe jeýta.+
26 Pe ihústova oheka pe yvy iporãvéva,péro pe iñañáva ojapóva ogueraha chupe tape vaíre.
27 Pe iñateʼỹva ni noñanimái opuʼã oho opersegi umi animál upéi hoʼu hag̃ua,+péro pe ikyreʼỹva orekóta heta rrikésa.
28 Umi ihústova oho tape porãre ha oikovéta,+umi ohóva upe tapére noñehundimoʼãi.
Nóta
^ Hebréope: “oñemohatãha”.
^ Térã: “iguápava”.
^ Hebréope: “pan”.
^ Térã: “iñanimál álma rehe”.
^ Térã: “ikorasõme ndorekói mbaʼeve iporãva”.
