Pablo ha Silas oĩ aja préso, opurahéi vaʼekue Jehovápe omombaʼeguasu hag̃ua chupe (Hch 16:25). Ñane tiémpope, ñane ermanokuéra opurahéi vaʼekue avei umi kántiko Alemániape pe kámpo de konsentrasión násipe, Sachsenháusenpe ha umi ermáno ojegueraha vaʼekue Sibériape ojapo vaʼekue avei upéva. Koʼã ehémplo ohechauka mbaʼéichapa umi kántiko ñanemokyreʼỹ jahasa jave umi situasión ijetuʼúva.

Koʼẽrõitéma jarekóta avei ñane idiómape pe purahéi ryru pyahu hérava Vyʼápe japurahéi Jehovápe. Jareko vove ko purahéi ryru, ikatu japraktika umi kántiko jajapo jave ñande estúdio de família ikatu hag̃uáicha ñaaprende de memória (Ef 5:19). Upéicha, jahasáramo peteĩ pruéva ijetuʼúvare, pe espíritu sánto ñanepytyvõta ñanemanduʼa hag̃ua umi kántikope heʼívare. Umi kántiko ningo ñanepytyvõ ñapensa meme hag̃ua umi esperánsa jarekóvare ha ñanemokyreʼỹ avei jahasa jave peteĩ situasión ijetuʼúvare. Ha ñaime porãramo jepe, umi kántiko heʼíva ñanepytyvõta vyʼápe japurahéi hag̃ua Jehovápe (1Cr 15:16; Sl 33:1-3). Upévare, jajapókena opa ikatúva jaaprovecha porã hag̃ua umi kántiko.

EHECHA PE VIDÉO “PETEĨ PURAHÉI OMOKYREʼỸ VAʼEKUE ERMANOKUÉRAPE” HA UPÉI EKONTESTA KOʼÃ PREGÚNTA:

• ¿Mbaʼéicha rupípa ermáno Frost oskrivi vaʼekue peteĩ purahéi?

• ¿Mbaʼéichapa upe purahéi omokyreʼỹ vaʼekue umi ermáno oĩvape pe kámpo de konsentrasiónpe Sachsenháusenpe?

• ¿Mbaʼéicha javépa ikatu nemokyreʼỹ umi kántiko?

• ¿Máva mávapa umi kántiko reaprendeséva de memória?