Jesús oĩrõ guare ko yvy ape ári, imanduʼa vaʼekue pe mandáto heʼívare: “Emombaʼe nde ru ha nde sýpe” (Éx 20:12; Mt 15:4). Haʼe ikatu vaʼekue omeʼẽ upe konsého pórke haʼe voi iñeʼẽrendu vaʼekue ituakuérape imitã guive (Lu 2:51). Okakuaapa rire katu Jesús ojasegura vaʼekue oñeñatende porã hag̃ua isýre haʼe omano rire (Jn 19:26, 27).

Koʼág̃arupi avei umi kristiáno imitãva ohechauka omombaʼeha ituakuérape iñeʼẽrendúvo ha ohechaukávo rrespéto oñeʼẽ jave chupekuéra. Jaʼe porãsérõ g̃uarã, ñande siémpre ñamombaʼe vaʼerã ñande tuakuérape. Ijedámarõ jepe hikuái ñahendu vaʼerã umi konsého porã omeʼẽva ñandéve jahechauka hag̃ua ñamombaʼeha chupekuéra (Pr 23:22). Iporãta avei ñaipytyvõramo chupekuéra oñeñandu vai jave térã oikotevẽramo pláta (1Ti 5:8). Tahaʼe ñanemitã térã jakakuaapáma, la iporãvéva ikatúva jajapo haʼe hína ñañemongeta meme hendivekuéra.

EHECHA PE VIDÉO MBAʼÉICHAPA IKATU REÑEʼẼ NDE TUAKUÉRANDI, HA UPÉI EMBOHOVÁI KOʼÃ PORANDU:

• ¿Mbaʼérepa ikatu ijetuʼu jepi ndéve eñeʼẽ hag̃ua nde tuakuérandi?

• ¿Mbaʼéicha ikatu ehechauka emombaʼeha nde tuakuérape eñeʼẽ jave hendivekuéra?

• ¿Mbaʼérepa jaʼekuaa nerembyasymoʼãiha eñehaʼãramo eñeʼẽ nde tuakuérandi? (Pr 15:22).