Pe Konmemorasión ningo ñanepytyvõ jajepyʼamongeta hag̃ua umi mbaʼe porãita jahupytýtavare Jesús omano rupi ñanderehehápe. Umi mbaʼe porã apytépe oĩ pe rresurreksión. Jehová ningo arakaʼeve ndoipotái vaʼekue yvyporakuéra omano, upévare jasufrieterei omano jave peteĩ jahayhúva, ndaipóri voi ótra kósa ñanembohasa asyvéva upévagui (1Co 15:26). Jesúsre ningo opokoiterei vaʼekue ohechárõ guare idisipulokuéra hasẽ Lázaro omano haguére (Jn 11:33-35). Jesús ningo ojoguaiterei Itúvape opaite mbaʼépe, upévare ikatu ñaime segúro Jehová ñanembyasyetereiha avei ohechávo mbaʼéichapa ñañeñandu omano jave peteĩ jahayhúva (Jn 14:7). Jehová ningo oipotaitereíma og̃uahẽ pe día omoingove jey hag̃ua umi omano vaʼekuépe ha ñande upéichante avei (Job 14:14, 15).

Jehová ningo ndojapói mbaʼeve sarambikuépe, upévare ikatu jaʼe omoingove jeytaha umi omano vaʼekuépe itiempoitépe ha opyta porãvetaháicha (1Co 14:33, 40). Upe rire, ojejapo rangue velório, ojejapóta vienvenída umi orresusitávape. ¿Repensámavapa mbaʼeichaitépa revyʼáta oñemoingove jey vove umi omano vaʼekuépe? (2Co 4:17, 18). ¿Reagradesépa Jehovápe omeʼẽ haguére Itaʼýra ñanderehehápe ha omombeʼu haguére ñandéve la Bíbliape umi omano vaʼekue oikove jeytaha? (Col 3:15).

• Ne hénte ha ne amigokuéra omano vaʼekue apytégui, ¿mávapepa hiʼãitereíma ndéve rehecha jey?

• Jehová siervokuéra yma guare apytégui, ¿mávarepa retopase ág̃a reñemongeta hag̃ua hendive?