Jareko ningo 4 vidéo ñanepytyvõva ñamoñepyrũ ha jajapo hag̃ua umi kúrso bíblico. ¿Maʼerãpa ojeprepara káda uno ha mbaʼéichapa ikatu jaipuru?

• ¿Mbaʼérepa restudia vaʼerã la Biblia? (Ipukúva). Ojeprepara omokyreʼỹ hag̃ua la héntepe oikuaaseve hag̃ua la Bíbliagui, tahaʼe haʼéva irrelihión. Omombeʼu la Biblia okontestaha umi pregúnta iñimportánteva. Avei omeʼẽ peteĩ ehémplo ohechaukáva isentidoha la Biblia heʼíva. Opakuévo heʼi mbaʼéichapa ikatu ojejerure peteĩ kúrso bíblico.

• ¿Mbaʼérepa restudia vaʼerã la Biblia? (Mbykyvéva). Ojogua pe vidéo anteriórpe, péro kóva mbykyeteve. Upévare ikatu ideprovécho umi território oĩháme umi hénte saʼi itiémpova.

• ¿Mbaʼéichapa rojapo peteĩ estúdio bíblico? Ko vidéo ojeprepara ointeresa hag̃ua umi héntepe ñande kúrso bíblico. Heʼi gratisha ha okontesta umi mbaʼe oikuaaséva jepi la hénte, por ehémplo mbaʼéichapa ikatu ojerure hikuái peteĩ kúrso bíblico.

• ¡Edisfruta nde estúdio de la Biblia! Ko vidéo ojehechauka vaʼerã umi persóna ostudiávape la Biblia. Pe lívro Jaikóta vyʼápe páhina 2-pe ae oñemensiona ko vidéo, upéicharõ jepe ikatúma ojehechauka ojestudiávo pe folléto. Ko vidéo omombeʼu mbaʼe mbaʼépa oĩ pe lívrope ha mbaʼéichapa ojejapo umi kúrso de la Biblia.

Koʼág̃a jaikuaa porãma maʼerãpa ha mbaʼéicha javépa ojehechauka vaʼerã káda vidéo. Upéicharõ jepe, ñanemanduʼa vaʼerã lomímonte ikatuha jahechauka térã ñamondo ñapensa vovénte okonveniveha. Ñañehaʼãkena jaikuaa porã koʼã vidéo ikatu hag̃uáicha ideprovécho ñaporomboʼe jave.