IGUSTOITÉNE enterovéva ojapóramo siémpre iporãva, ¿ajépa?... Péro ndaipóri ni peteĩ ikatúva ojapo upéicha. ¿Ndépa reikuaa mbaʼérepa jajapo umi mbaʼe vai ndajajaposéiramo jepe?... Ñanase rupi pekadór. Péro oĩ umi hénte ndochaʼéiva hapicháre ha ojaposéva voi hesekuéra mbaʼe vai. ¿Ikatúpa okambia umichagua?...

Ko divúhope jahecha mbaʼéichapa koʼã kuimbaʼe ojapi Estébanpe itápe. Emañamína pe kuimbaʼe oñemboʼývare hína ha oñatendéva ijaokuérare. Idióma evréope héra hína Saulo ha idióma rrománope katu Pablo. Esteban ningo Jesús disípulo, ha Saulo ovyʼa ojejuka haguére chupe. Jahechamína mbaʼérepa Saulo iñañaite vaʼekue.

Saulo ningo fariséo, upéva peteĩ sékta oĩva rrelihión hudíape. Umi oĩva ko séktape oikuaa Ñandejára omandáva péro nopenaguasúi umívare, upéva rangue ojapo umi mbaʼe heʼíva umi omoakãva chupekuéra. Upévare Saulo ojapo vaʼekue umi mbaʼe vai.

Saulo oĩ aja Jerusalénpe ojejagarra Estébanpe ha ojegueraha trivunálpe. Upépe oñembyaty umi hués ha ijapytepekuéra oĩ umi fariséo. Oĩrõ jepe heta oñeʼẽ reíva hese, Esteban ndokyhyjéi ha oñepyrũ oñeʼẽ Jehová ha Jesús rehe.

Umi huéspe ndogustaiete Esteban heʼíva. Haʼekuéra oikuaa Jesúspe ha ndohasáiti voi heta tiémpo ojukauka hague chupe. Péro Jehová omoingove jey Jesúspe ha haʼe oĩ jeýma yvágape. Umi  hués katu nokambiái, oñepyrũ guei opersegi ha ojagarra Jesús disipulokuérape.

Upéi umi hués oguenohẽ Estébanpe pe siudágui, oipete chupe yvýre ha ojapi itápe omano meve. Rehechaháicha ko divúhope, Saulo omaña hína. Haʼe opensa oĩ porãha la ojejapóva.

¿Mbaʼérepa Saulo opensa upéicha?... Imitã guive haʼe fariséo, ha oimoʼã oĩ porãha la oñemboʼe vaʼekue chupe. Saulo ohecha mbaʼépa ojapo umi omoakãva fariseokuérape ha ojapo avei haʼekuéraicha (Hechos 7:54-60).

Esteban omano rire ¿mbaʼépa ojapo Saulo?... Oñepyrũ opersegi mbarete Jesús disipulokuérape. Ojasurúntema hogapekuéra ha ombotyryryhápe oguenohẽ kuimbaʼe ha kuñanguérape ogueraha hag̃ua kárselpe. Upévare heta disípulo oho Jerusaléngui, péro osegi opredika hikuái ha omboʼe umi mbaʼe oikuaáva Jesúsgui (Hechos 8:1-4).

 Saulo oikuaávo upéva, koʼýte ndochaʼéi Jesús disipulokuérare. Upévare oho oñeʼẽ pe saserdóte guasu Caifás ndive, ha haʼe opermiti chupe oho ojagarra umi kristiáno oikóva Damáscope. Saulo oguerahase Jerusalénpe ojekastiga hag̃ua chupekuéra. Péro jahechamína mbaʼépa oiko hese ohokuévo Damáscope.

Omimbi sapyʼa peteĩ lus yvágape, ha oñehendu peteĩ heʼíva: “Saulo, Saulo, ¿mbaʼére piko chepersegi hína?”. ¡Jesús la oñeʼẽva chupe yvága guive! Pe lus omimbietereígui oheja siégo Sáulope, upévare umi oĩva hendive ogueraha chupe Damasco peve.

Tres día haguépe Jesús oñeʼẽ Ananías ndive, peteĩ idisípulo oikóva Damáscope. Jesús omondo chupe Saulo rendápe ikatu hag̃uáicha oñeʼẽ hendive ha omonguera chupe. Ananías oñeʼẽ rire Saulo ndive, haʼe ojerovia Jesúsre ha ohecha jey. Upe día guive, Saulo okambia ha oñepyrũ ojapo Ñandejára oipotáva (Hechos 9:1-22).

¿Rehechakuaápa mbaʼérepa Saulo ojapo umi mbaʼe vai?... Oñemboʼe rupi chupe heta japu. Saulo ojerovia umi fariséore, péro koʼãva ojapo haʼekuéra opensávante ha omboyke Ñandejára heʼíva. Upéicharõ, ¿mbaʼérepa Saulo okambia umi ótro fariséo osegíramo jepe ojapo ivaíva?... Haʼe ningo ndoikuaáinte kuri mbaʼépa Ñandejára oipota ojapo. Péro oaprendévo pe añetegua pyaʼe voi okambia.

¿Mbaʼépa oiko Sáulogui upe rire?... Oiko chugui Jesús apóstol ha oñehenói chupe apóstol Pablo. Nemanduʼáne avei haʼe oskrivi hague heta párte oĩva la Bíbliape.

Oĩ heta tapicha ojoguáva Sáulope ha ikatúva avei okambia. Péro ijetuʼu chupekuéra ojapo hag̃ua upéva oĩ rupi peteĩ ojapokaséva enterovévape mbaʼe vai. ¿Mávapa upéva?... Jesús imanduʼa  vaʼekue hese oñeʼẽrõ guare Sáulope. Upérõ Jesús heʼi: ‘Koʼág̃a romondo rehesapeʼa hag̃ua umi héntepe, osẽ hag̃ua pytũmbýgui hesakãháme, ha tojei hikuái Satanás poguýgui, ou hag̃ua Ñandejára rendápe’ (Hechos 26:17,18).

Satanás hína pe oñehaʼãmbaitéva ojapoka ñandéve umi mbaʼe vai. ¿Ijetuʼúpa ndéve sapyʼánte rejeporta porã?... Enterovévape ijetuʼu jepi, ha upéva ikatu oiko Satanás káusare. Péro ndahaʼéi upévarente. ¿Mbaʼérepa avei?... Ñanase rupi pekadór.

Upéicha rupi ndahaʼéi la ifasilpáva ñandéve ñanevuéno. Upévare, ¿mbaʼépa tekotevẽ jajapo?... Ñañehaʼãmbaite vaʼerã jajeporta porã. Upéicha jajapóramo, pe Mboʼehára Guasu ñanderayhuetéva katuete ñanepytyvõta.

Jesús tiémpope oĩ vaʼekue hénte ojapóva mbaʼe vai péro upéi ndojapovéimava. Jesús oikuaa ijetuʼuha chupekuéra okambia ha upévare ohayhu koʼã tapichápe. Por ehémplo, oĩ vaʼekue umi kuña rekovai orekóva rrelasión sexuál heta kuimbaʼéndi. Ha upéva oĩ vai.

 Peteĩ jey Jesús oĩrõ guare peteĩ fariséo rógape, oho hendápe peteĩ kuña rekovai. Haʼe ogueraha peteĩ mbaʼyruʼípe aséite hyakuã asýva ha omoĩ Jesús pýre. Oñepyrũ hasẽ, hesaýpe omoheʼõ Jesús py ha upéi omokã iñakãraguépe. Ko kuña ombyasyeterei umi mbaʼe vai ojapo vaʼekue, ha upévare Jesús operdona chupe. Péro pe fariséo opensa ndovaleiha oñeperdona pe kuñáme (Lucas 7:36-50).

¿Ndépa reikuaa mbaʼépa peteĩ jey Jesús heʼi umi fariséope?... Heʼi chupekuéra: “Umi kuña rekovai oho pene renonderã Ñandejára Rréinope” (Mateo 21:31). Jesús heʼi upéva umi kuña rekovai ojerovia rupi hese ha okambiágui, umi fariséo katu nokambiái ha opersegi Jesús disipulokuérape.

Upéicharõ, la Biblia heʼíramo oĩ vaiha peteĩ mbaʼe jajapóva jaikóvo, ñakambia vaʼerã. Ha ñaaprendévo mbaʼépa Jehová oipota jajapo, ñaneñeʼẽrendu vaʼerã chupe. Upéicha ñambovyʼáta Jehovápe ha ikatúta jaiko opa ára g̃uarã.