¿NDÉPA reikuaa mbaʼépa heʼise ñañemombaʼeguasu?... Ñamoĩmi peteĩ ehémplo. ¿Reñehaʼãmapa rejapo peteĩ mbaʼe ha nosẽporãi ndéve? Ikatu rechutase pelóta térã repraktika reiko hag̃ua visikléta ári. ¿Oĩpa upérõ opukáva nderehe ha heʼi: “Che chevaleve ndehegui”?... Upéicha heʼíva, oñemombaʼeguasu térã opurea hína.

¿Mbaʼéichapa reñeñandu oĩramo heʼíva péicha? ¿Ndegustápa?... Upéicharõ, ¿mbaʼéichapa oñeñandúta umi ótro nde reñemombaʼeguasúramo?... ¿Iporãpa ere nde rapichápe ndevaleveha chugui?... ¿Ogustátapa upéva Jehovápe?...

Pe Mboʼehára Guasu oikuaa vaʼekue heta hénte oñemombaʼeguasúvape. Haʼekuéra heʼi ijehe ivaletereiha ha oapoʼi opavavépe. Upévare, Jesús omombeʼu peteĩ istória ohechaukáva ivaiha ñapensa upéicha. Jahechamína la heʼi vaʼekue.

Jesús oñeʼẽ peteĩ fariséo ha peteĩ impuésto kovraháre. Umi fariséo ningo omoakã hudiokuéra rrelihión. Jesús heʼi ko fariséo oho hague pe témplo oĩva Jerusalénpe oñemboʼe hag̃ua.

Upéi heʼi peteĩ impuésto kovraha oho hague avei oñemboʼe upépe. Heta hénte ndochaʼéi umi impuésto kovraháre, pórke opensa omondaha chupekuéra. Ha legálmente oĩ vaʼekue ijapytepekuéra ipokarẽva.

Pe fariséo oñepyrũ oñemboʼe, ha heʼi: ‘Aagradesete ningo ndéve Ñandejára ndajoguái haguére umi ótrope. Namondái avavépe,  ndajapói mbaʼeve ivaíva ha ndajoguái pe impuésto kovrahápe. Avei ndakarúi dos vése káda semána ajepyʼamongeta hag̃ua nderehe, ha ameʼẽ pe diésmo opa mbaʼe arekóvagui’. ¿Rehechápa mbaʼeichaitépa oñemombaʼeguasu ko fariséo?... Hiʼarive Ñandejárape heʼi hína koʼã mbaʼe.

Pe impuésto kovraha katu ndojapói upéicha. Haʼe noñanimái ni omaña yvágare oñemboʼe hag̃ua, mombyrymínte opyta ha oñakãity. Ombyasyeterei umi mbaʼe vai ojapo vaʼekue, ha ojepytiʼanupã voi ohechauka hag̃ua oñembyasyha. Haʼe ndeʼíri Ñandejárape ojapoha iporãva. Heʼi guei chupe: ‘Cheperdonamína Ñandejára, che ningo ajapo heta mbaʼe ivaíva’.

Mbaʼépa nde repensa, ¿mávapepa ohendúne Ñandejára? ¿Pe fariséope heʼíva ijehe ivuenoha? ¿Térãpa pe oñembyasývape umi mbaʼe vai ojapóvare?...

Jesús omombeʼu Ñandejára ohendu hague pe impuésto kovrahápe. ¿Mbaʼérepa? Pe Mboʼehára Guasu heʼi umi oñembotuichaséva oñemotĩtaha, péro umi ndaijejapóivape oñembotuichataha (Lucas 18:9-14).

¿Mbaʼépa Jesús omboʼese raʼe?... Ndovaleiha ñañemombaʼeguasu. Ikatu oime ndajaʼéi ápe ha pépe ñandevaleveha ótrogui, péro umi mbaʼe jajapóvare ikatu hína jahechauka ñañemombaʼeguasuha. ¿Ndépa  rejapóma upéicha?... Jahechamína mbaʼépa oiko vaʼekue apóstol Pédrore.

Ojejagarra mboyvemi Jesúspe, haʼe heʼi entéro ijapostolkuéra oheja reitaha chupe. Péro Pedro ojeroviaiterei ijehe ha heʼi: “¡Enterove umi ótro ndereja reíramo jepe, che arakaʼeve ndorohejaichéne!”. Pedro oñeʼẽreiete, upe riremínte ohejáma katu Jesúspe. Péro upéi ombyasy ha ojevy jey. Upéva jahecháta ág̃a kapítulo 30-pe (Mateo 26:31-33).

Koʼág̃a ñapensami ñane tiémpore. Ñamoĩ chupe reimeha eskuélape, ha nde profesór oporandu ndéve ha ne kompañérope peteĩ mbaʼe. ¿Mbaʼépa oikóne pyaʼe rembohováiramo ha ne kompañéro katu nahániri? Katuete revyʼáta reikuaa haguére umi mbaʼe oñeporandúva. Péro, ¿iporãtapa repensáramo nde ndevaleveha chugui?... ¿Ovalépa rembohovaise opa mbaʼe oñeporandúva reapoʼi hag̃uánte nde rapichápe?...

Upéicha ojapo vaʼekue pe fariséo. Haʼe oñemombaʼeguasu vaʼekue ha heʼi pe impuésto kovraha ni michĩmi ndojoguaiha chupe. Péro Jesús heʼi pe fariséo tuicha ojavy hague. Upéicha avei, ikatu oime jajapokuaave heta mbaʼe ñande rapichakuéragui, péro ndahaʼéi upe haguérente jaapoʼi vaʼerã chupekuéra.

Upévare, ¿iporãtapa ñañemombaʼeguasu oiméramo ñandevaleve ótrogui?... Epensamína ko mbaʼére: ¿ñandépa jajapo raʼe ñane apytuʼũ?... Nahániri, Ñandejára ningo la ojapo vaʼekue. Ha heta mbaʼe jaikuaa ótro ñanemboʼe rupínte térã jalee haguére peteĩ lívrope. Ikatu avei jajapokuaa ñandejeheguínte peteĩ mbaʼe ijetuʼúva, péro ¿oĩ porãpa ñañemombaʼeguasu upévare? Nahániri; ¿mbaʼérepa?... Ñandejára omeʼẽgui ñandéve ñane apytuʼũ ñapensa hag̃ua.

 Rehecháramo peteĩ nde rapicha oñehaʼãmbaiteha ojapo hag̃ua peteĩ mbaʼe, ikatu ere chupe ndegustaha la ojapóva, péicha haʼe ikyreʼỹvéta. Ha ikatu voi reipytyvõ chupe ojapo porãve hag̃ua. ¿Ndépa ndereipotamoʼãi ojejapo upéva nderehehápe?...

Oĩ ningo imbaretevéva ótrogui. Ikatu nde nembareteve ne ermáno térã ne ermánagui. Péro, ¿reikótapa repurea upévare?... Ndovaléi rejapo upéva. Ñandéve ñanemombarete umi tembiʼu jaʼúva. Ha Ñandejáranteko upe omeʼẽva opa mbaʼe oñekotevẽva okakuaa hag̃ua umi plánta. Por ehémplo, kuarahy ha ama, ¿ajépa?... Upévare, ñanembaretéramo jaagradese vaʼerã Ñandejárape (Hechos 14:16, 17).

Avave nohenduséi umi oikóvape oñeʼẽ ijehénte ha opureáva, ¿ajépa upéicha?... Ñanemanduʼamína Jesús heʼi vaʼekuére: “Pejapo pende rapicháre peipotáva haʼekuéra ojapo penderehe”. Jajapóramo upéicha,  ndajajoguamoʼãi pe fariséo oñemombaʼeguasu vaʼekuépe (Lucas 6:31).

Peteĩ díape, peteĩ kuimbaʼe heʼi Jesús ivuenoha. ¿Heʼípa pe Mboʼehára Guasu: “Si, chéngo chevuéno hína”?... Nahániri, upéva rangue haʼe heʼi: ‘Ñandejára añoite ningo pe ivuénova’ (Marcos 10:18). Jesús perfékto vaʼekue, upéicharamo jepe noñemombaʼeguasúi, síno ombotuicha Itúva Jehovápe.

Upéicharõ, ¿mávapepa iporã ñamombaʼeguasu?... Upeichaite, ñande Apohare Jehovápe. Por ehémplo, jahecha jave pe kuarahyreike neporãva térã ambue mbaʼe haʼe ojapo vaʼekue, ikatu jaʼe: “¡Jehová hína la ojapóva koʼã mbaʼe!”. Siémpre ñañeʼẽ vaʼerã umi mbaʼe haʼe ojapo vaʼekuére ha umi ojapótavare koʼẽrõitéma.