JESÚS okakuaapa rire, katuete oikuaáne raʼe mbaʼéichapa Jehová oñangareko hese michĩrõ guare. ¿Oñemboʼénepa raʼe oagradese hag̃ua Jehovápe? ¿Ndépa ere oagradese hague chupe?... ¿Mbaʼépa heʼíne raʼe María ha Josépe oikuaávo ogueraha hague chupe Egíptope ojesalva hag̃ua?...

Koʼág̃a ningo Jesús ndahaʼevéima peteĩ mitã, ha ndoikovéima ko yvy ape ári. Upéicharõ jepe, ¿rehechakuaápa heta héntepe g̃uarã Jesús haʼeha peteĩ mitã oñenóva hína pesévrepe?... Heta hénte imanduʼa hese upéicha, koʼýte Navidádpe.

Jepe Jesús noĩvéima ko yvy ape ári, ¿ndépa ere oikoveha gueteri koʼág̃a peve?... Oikove. Jehová ningo omoingove jey vaʼekue chupe, ha koʼág̃a Jesús haʼe peteĩ Rréi poderóso yvágape. Péro, ¿mbaʼéichapa ikatu oñangareko umi ohayhúvare chupe?... Jesús oikórõ guare ko yvy ape ári, ohechauka vaʼekue mbaʼépa ikatu ojapo umi iñeʼẽrendúva rehehápe.  Jahechamína mbaʼépa ojapo peteĩ día oĩ aja idisipulokuéra ndive peteĩ kanóape.

Upérõ guare kaʼaruetéma, ha Jesús omboʼe umi héntepe un día pukukue mar de Galilea ypýpe, haʼéva hína peteĩ lágo ipukúva 20 kilómetro ha ipéva 12 kilómetro. Upe rire heʼi idisipulokuérape: “Jahasána ko lágo rovái pe ótro ládo”. Ojupi hikuái peteĩ kanóape ha oho. Jesús katu ikaneʼõiterei ha oho oñeno pe kanóa rapykuépe ha sapyʼaitépe oketéma voi.

Umi disípulo ndokéi ogueraha porã hag̃ua pe kanóa. Ñepyrũrã oho porã hese hikuái, péro upeichaháguinte oñepyrũ oipeju peteĩ yvytu hatãitereíva, umi oláda ojejapete pe kanóare ha oikepa chupekuéra y.

Umi disípulo okyhyje ojahogárõ g̃uarã. Ha Jesús katu trankiloiténte oke ha ndopillái la oikóva. Upéi haʼekuéra omombáy Jesúspe ha heʼi chupe: “¡Mboʼehára, Mboʼehára, ñamanombátamako!”.  Ohendúvo upéva, Jesús opuʼã ha heʼi pe yvytu ha pe márpe: ‘¡Pekirirĩetéke! ¡Pepytáke!’.

Upepete ohasaite pe yvytu atã ha pe mar opyta. Umi disipulokuéra katu oñemondýi, ijurujaipa opytávo ha heʼi ojupe: “¿Máva piko añetehápe ko kuimbaʼe? Yvytu ha mar jepe iñeʼẽrendu chupe” (Lucas 8:22-25; Marcos 4:35-41).

Ha nde, ¿reikuaápa mávapa Jesús?... ¿Mávapa omeʼẽ chupe podér tuichaitéva?... Umi disípulo natekotevẽi kuri okyhyje, Jesús oĩ rupi hendivekuéra. Haʼe idiferénte umi ótro kuimbaʼégui ha oreko podér ojapo hag̃ua heta mbaʼe. Ni peteĩ tapicha ndaikatumoʼãi ojapo umi mbaʼe haʼe ojapóva. Jahechamína koʼág̃a mbaʼépa ojapo jey Jesús tiémpo riremi.

Peteĩ kaʼaruete Jesús heʼi idisipulokuérape ojupi hag̃ua peteĩ kanóape, tohasa pe ótro ládo ha tohaʼarõ chupe upépe.  Upéi Jesús ojupi peteĩ sérrope oñemboʼe hag̃ua Itúvape haʼeñohápe.

Umi disípulo ojupi pe kanóape ha oñepyrũ ohasa pe mar. Upe riremínte oipeju hatã hatãve pe yvytu. Pytũma katu chuguikuéra. Ha oñepyrũ orrema hikuái osẽ hag̃ua upégui, péro imbegue pe yvytu ojokopágui chupekuéra. Ápe ha pépe oho pe kanóa ha oike oikeve pype la y. Umi disípulo oñehaʼã og̃uahẽ pe oríllape péro ndaikatúi.

Jesús oĩ gueteri sérrope. Upeichaháguinte ohecha iñamigokuéra sarambípe oĩha ha oguejy pe mar oríllape oipytyvõ hag̃ua chupekuéra. Upémarõ oguata ohóvo pe mar ári og̃uahẽ hag̃ua hendapekuéra.

¿Mbaʼépa oikóta nderehe reguatáramo mar ári?... Reñapymíta ha ikatu rejahoga. Péro Jesús ipoderóso rupi ikatu oguata mar ári. Og̃uahẽ hag̃ua pe kanóa oĩháme mombyry oho vaʼerã, upévare koʼẽmbotáma idisipulokuéra ohechárõ guare chupe. Haʼekuéra ndoroviaséi la ohecháva, tuichaiterei oñemondýi ha osapukái vaipa. Upémarõ Jesús heʼi: “Ani peñemondýi, chénteko; ani pekyhyje”.

Jesús ojupi pe kanóape ha upepete ohasa pe yvytu atã. Umi disípulo ohecharamoiterei Jesús ojapóva. Upévare heʼi chupe: “Añetehápe nde hína Ñandejára Raʼy” (Mateo 14:22-33; Juan 6:16-21).

¿Ajépa igustoiténe jaikórire Jesús tiémpope ha jahecha umi milágro ojapóva?... ¿Ndépa reikuaa mbaʼérepa Jesús ojapo milágro?... Ohayhu rupi idisipulokuérape ha oipytyvõségui chupekuéra. Péicha avei ohechauka ipoderosoha ha ikatutaha ojapo heta mbaʼe porã ogoverna vove ko yvy ape ári.

 Koʼág̃arupi Jesús oiporu ipodér ñanepytyvõ hag̃ua Satanás ñandejokose jave ponove japredika. Péro haʼe ndoiporúi ipodér ani hag̃ua ñanderasy ni ñanemonguera hag̃ua. Umi apóstol jepe omano vaʼekue, por ehémplo, Santiágope ojejuka ha iñermáno Juánpe katu ojegueraha kárselpe (Hechos 12:2; Apocalipsis 1:9).

Enterovéva ningo, tahaʼe iñeʼẽrendúva Jehovápe térã nahániriva, ikatu hasy ha omano. Péro koʼẽrõitéma Jesús ogovernáta ko yvy ape ári ha oipeʼapáta umi mbaʼe ñanembohasa asýva. Upépe haʼe oiporúta ipodér ovendesi hag̃ua umi iñeʼẽrendúvape chupe, upévare ndajakyhyjemoʼãvéima ojehúrõ g̃uarã ñandéve mbaʼeve ivaíva (Isaías 9:6, 7).