ÑAMOĨ chupe peteĩ mitãkuñaʼi heʼiha isýpe: “Asẽmíre eskuélagui ajútama ág̃a”. Péro osẽ rire, opyta ohuga iñamigakuérandi ha og̃uahẽvo hógape heʼi isýpe: “Che profesóra heʼi kuri chéve apytave hag̃uae”. ¿Oĩ porãpa heʼi upéicha?...

Térã ñamoĩ chupe peteĩ mitãʼi heʼi itúvape: “No papa, che ndachutái kuri pelóta kotýpe”. Péro añetehápe ohuga kuri upépe. ¿Oĩ porãpa la heʼíva?...

Pe Mboʼehára Guasu heʼi ñandéve mbaʼépa iporã jajapo, haʼe heʼi: “Pejéramo pejapotaha peteĩ mbaʼe, pejapo vaʼerã, ha pejéramo ndapejapomoʼãiha, anítei pejapo, cháke oimeraẽ mbaʼe pemoĩvéva upévape, oúma pe añágui” (Mateo 5:37). ¿Mbaʼépa heʼise raʼe Jesús?... Ñakumpli vaʼerãha la jaʼéva.

La Bíbliape oĩ peteĩ istória ohechaukáva iñimportanteha  jaʼe siémpre añeteguánte. Omombeʼu mbaʼépa ojapo vaʼekue mokõi tapicha heʼíva ijehe Jesús disipuloha. Jahechamína mbaʼépa oiko rakaʼe.

Upérõ neʼĩra ohasa dos mése Jesús omano hague, ha Jerusalénpe ou heta hénte mombyrygua. Haʼekuéra ou Pentecostéspe g̃uarã, haʼéva hína peteĩ fiésta iñimportánteva ojapóva umi hudío. Upépe, apóstol Pedro ojapo peteĩ diskúrso iporãitereíva, ha heʼi umi héntepe Jehová omoingove jey hague Jesúspe. Heta oĩ umi hénte apytépe oikuaa ramóva koʼã mbaʼe ha upévare oaprendeseve Jesúsgui. ¿Mbaʼépa ojapo upémarõ hikuái?

Opyta areve hikuái Jerusalénpe. Péro oĩ oiporupámava ipláta ha ndorekovéima ni ojogua hag̃ua hembiʼurã. Umi disípulo oikóva Jerusalénpe oipytyvõse chupekuéra, upémarõ oñepyrũ ovende umi mbaʼe orekóva ha omeʼẽ pe pláta umi apóstolpe orreparti hag̃ua umi oikotevẽvape.

 Por ehémplo, mokõi kristiáno hérava Ananías ha hembireko Safira ovende peteĩ yvy oreko vaʼekue. Avave ningo nomboligái chupekuéra ojapo hag̃ua upéva, ijeheguiete odesidi. Péro ndojapói ohayhúgui umi disípulo pyahúpe, síno ojechaukaségui. Haʼekuéra oipota umi ótro opensa imbaʼeporãitereiha hikuái. Upémarõ oñeʼẽ oñondive heʼi hag̃ua umi apóstolpe omeʼẽmbaiteha la pláta. Péro ndahaʼeiete upéicha, haʼekuéra oñongatu peteĩ párte pe plátagui. ¿Mbaʼépa nde repensa upévare?...

Ananías oho umi apóstol rendápe ha ogueraha chupekuéra la pláta. Péro Ñandejára oikuaa haʼe nomeʼẽmbaiha, upévare oikuaauka apóstol Pédrope Ananías ijapuha hína.

Upémarõ Pedro heʼi chupe: ‘Ananías, ¿maʼerã piko reheja Satanás ojapoka ndéve ko mbaʼe? Pe yvy nembaʼénte voi, ha natekotevẽi kuri revende. Ha revende rire ningo pe hepykue ne mbaʼe jeýnte avei. ¿Mbaʼére piko reñongatu peteĩ párte ha ere guaʼu remeʼẽmbaiteha la pláta? Rejapóvo upéicha, ndahaʼéi ndejapúva orévente, síno Ñandejárape avei’.

Ivaieterei ningo la ojapóva Ananías. Haʼe ijapu, heʼi peteĩ mbaʼe péro ótra kosaite ojapo. ¿Mbaʼépa oiko upe rire? La Biblia omombeʼu: ‘Ohendúvo Pédrope, Ananías hoʼa omano’.  Ñandejára voi ojapo hese upéva. Upéi ojegueraha oñeñotỹ hetekue.

Tres óra haguépe ou Safira, haʼe ndoikuaái la oiko vaʼekue iménare. Pedro oporandu avei chupe: ‘¿Peẽ piko pemeʼẽmba raʼe oréve pende yvy repykue?’.

Safira heʼi: ‘Si, romeʼẽmbaite kuri’. Péro haʼe ijapu avei. Haʼekuéra ningo oheja imbaʼerã pe yvy repykuégui. Upévare Jehová ojuka avei Safírape (Hechos 5:1-11).

¿Mbaʼépa ñanemboʼe ko oiko vaʼekue?... Ñandejára ndohayhuiha umi ijapúvape. Haʼe oipota siémpre jaʼe siertoguánte. Péro oĩ heta heʼíva ndaivairiha ñandejapu. ¿Ha nde mbaʼe repensa?... ¿Ndépa reikuaa ñanderasy, jahasa asy ha ñamanoha, oĩ rupi peteĩ ijapu vaʼekue?...

Katuete nemanduʼáne Satanás ombotavy hague Évape. Haʼe heʼi chupe nomanomoʼãiha hoʼúramo pe yva Ñandejára oproivi vaʼekue chuguikuéra. Eva oguerovia Satanás heʼíva ha hoʼu. Upéi omeʼẽ avei Adánpe hoʼu hag̃ua. Péicha oiko chuguikuéra pekadór ha ifamiliakuéra onaséma avei upéicha. Upéva káusare enterovéva jaiko asy ha ñamano. ¿Rehechakuaápa mbaʼéicha rupípa oñepyrũ koʼã mbaʼe?... Oñepyrũ Satanás ijapu rupi.

Jahechaháicha, Satanás raẽvete upe ijapu vaʼekue. Ajeve voíngo Jesús heʼi hese haʼeha “pe japu ruvicha”. Ha oĩ jave ijapúva, ojapo hína Satanás ojapo vaʼekue. Ñanemanduʼa vaʼerã upévare, sapyʼánte ñandejapuse mbaʼéramo (Juan 8:44).

 ¿Mbaʼéicha javépa ikatu ndejapuse?... Rejapo jave peteĩ mbaʼe noĩporãiva ha ombopochýtava ótrope ¿ajépa?... Hoʼáramo ndehegui peteĩ mbaʼe ha ojeka, ha upéi oñeporandu ndéve mávapa oity raʼe, ¿iporãtapa eréramo oity hague ne ermáno? ¿Térã ere guaʼu nderehechái hague mávapa oity?...

Ñamoĩ chupe rejapo vaʼerãha nde taréa eskuelapegua, péro nderejapopái. ¿Iporãtapa eréramo rejapopa hague?... Ñanemanduʼami jey Ananías ha Safira rehe, haʼekuéra ijapu vaʼekue ha upéicha rupi omano. Upéva ohechauka Ñandejára ndoipotaieteha ñandejapu.

Upéicharõ, tahaʼe haʼéva la jajapo vaʼekue, upéi ivaivéta ñanendive ñandejapúramo. Ndovaléi ñandejapu ni michĩmi, síno ñamombeʼu vaʼerã oiko hagueichaite. La Biblia heʼi ñandéve jaʼe hag̃ua pe ‘añeteguánte ñande rapichápe’ ha ‘ndovaleiha ñandejapu ojupe’. Jehová siémpre heʼi pe añetegua ha oipota ñande avei jajapo upéicha (Efesios 4:25; Colosenses 3:9).