Pe Paraíso ndahaʼemoʼãi ko mundo ag̃aguáicha. Ñandejára ndoipotaivaʼekue ko mundo henyhẽ problema ha jehasa asýgui. Koʼẽrõite, Ñandejára ojapóta ko yvýgui peteĩ paraíso. Mbaʼéichatapa? Jahechami mbaʼépa heʼi la Biblia.

Tapichakuéra ipyʼaporãva. Paraísope oikóta Ñandejára amigokuéra. Koʼãva ojapóta iporãva ojuehe ha oikóta Jehová rape potĩre (Proverbios 2:21).

Heta oĩta tembiʼu. Pe paraísope, avave ndohasamoʼãi ñembyahýi. La Biblia heʼi: “Umi trigoty [térã tembiʼu] tomyenyhẽ ñane retã” (Salmo 72:16).

Óga porã ha tembiapo oporombovyʼáva. Pe Yvy porãme, opa familiakuéra oguerekóta hóga tee, ha opavave oguerekóta tembiapo ombovyʼáva chupe (Isaías 65:21-23).

 Pyʼaguapy Yvy tuichakuére. Ndaiporimoʼãvéi oñorairõva térã omanóva guerrahápe. Ñandejára Ñeʼẽ heʼi: “[Ñandejára] ojoko opáichagua ñorairõ ko yvy ári” (Salmo 46:8, 9).

Tesãi. La Biblia opromete: “Avave [Paraísope oikóva] ndeʼi moʼãi: ‘Che rasy hína’” (Isaías 33:24). Ndaiporimoʼãi avei ikarẽva, ndohecháiva, nohendúiva térã noñeʼẽiva (Isaías 35:5, 6).

Ndaiporimoʼãi ñembyasy, tasy térã ñemano. Ñandejára Ñeʼẽ heʼi: “Ndaipóri moʼã véima ñemano, tasẽ, jaheʼo ha temimbyasy; opa oĩ vaekue yma niko ndaipóri véima” (Apocalipsis [Revelación] 21:4).

Ndaiporimoʼãvéi yvypóra iñañáva. Jehová opromete: “Iñañáva katu oñehundipáne, ojehapoʼóne ko yvýgui” (Proverbios 2:22).

Tapichakuéra ojoayhúta ha ojorrespetáta. Ndaiporimoʼãi injusticia, jejopy, takateʼỹ térã pyʼaro. Yvyporakuéra oikóta peteĩ ñeʼẽme ha oguatáta Ñandejára rape potĩre (Isaías 26:9).