Umi mbaʼe vai oikovahína ko Yvy ape ári ohechauka hiʼag̃uimaha pe Paraíso. La Biblia ymáma heʼi jahechavaʼerãha heta mbaʼe vai og̃uahẽ mboyvemi pe Paraíso. Koʼág̃a jaikóma upe árape. La Biblia heʼi koʼã mbaʼe oikovaʼerãha:

Ñorairõ guasu. “Peteĩ tetã opuʼãne ambuére, ha opavave opuʼãmbáne ojuehe” (Mateo 24:7.) Ko profecía oñecumplíma koʼág̃a. Año 1914 guive oikóma mokõi guerra mundial ha heta guerra michĩvéva opárupi. Hetaiterei tapicha omano umi ñorairõme.

Mbaʼasy opárupi. Oikovaʼerã “mbaʼasy heta hendápe” (Lucas 21:11). Ojehúmapa koʼã mbaʼe? Añetehápe ojehúma. Cáncer, korasõ mbaʼasy, mbaʼasypoʼi, akãnunduroʼy, sida ha ambue mbaʼasy hetaiterei tapichápema ojuka.

Ipokãta tembiʼu. Opa tetã rupi oĩ tapicha saʼi oguerekóva hoʼuvaʼerã. Cada áño hetaiterei yvypóra omano vareʼágui. Kóva haʼe avei peteĩ señal hiʼag̃uimaha pe Paraíso. La Biblia heʼi oĩvaʼerãha: “Ñembyahýi guasu opa rupi” (Marcos 13:8).

 Yvyryrýi. Oĩta “yvy ryrýi heta henda rupi” (Mateo 24:7.) Kóva avei oikóma koʼág̃a. Un millón rasáma omano yvyryrýigui 1914 guive.

Gente iñañáva. Yvyporakuéra “pira pirénte ohayhúta” ha “imbaʼerãnte oipotáta opa mbaʼe”. “Ojapóva umi mbaʼe chupe kuérante ombovyʼáva, ojapo rangue Tupã oipotáva.” Taʼyrakuéra “túva ha sýpe avave naiñeʼẽ rendu moʼãi” (2 Timoteo 3:1-5). Rehechápa upeichagua hetaha koʼág̃a rupi? Ndorrespetái Ñandejárape ha ojokose umi oñehaʼãvape oikuaave chugui.

Tembiapo vai. Avei “teko aña isarambíta opa rupi” (Mateo 24:12). Oiméne rehechakuaa hetaveha ohóvo koʼág̃a umi tembiapo vai. Opa henda rupi, oimeraẽvape ikatu oñemonda, oñembotavy térã ojejapo hese mbaʼe vai.

Koʼã mbaʼe ohechauka Ñandejára Reino hiʼag̃uimaha. La Biblia heʼi: “Pehecha vove ojehu koʼã mbaʼe peikuaáta Tupã sambyhy hiʼag̃uimaha” (Lucas 21:31). Pero mbaʼépa pe Ñandejára Reino? Upéva haʼe Ñandejára gobierno yvagapegua ojapótava ko Yvýgui peteĩ paraíso. Opytátava yvyporakuéra gobierno rekovia (Daniel 2:44).