Ikatu jaikuaa Jehovápe jaleérõ la Biblia. Ojapóma heta ára, Ñandejára oiporavoʼakue kuimbaʼekuérape ohai hag̃ua pe idea oguerekóva. Umi ojehaivaʼekue oñehenói koʼág̃a la Biblia. Koʼág̃a ikatu jaikuaa Ñandejárape jaleérõ la Biblia. Kóva oguereko Jehová ñeʼẽ, pe haʼe oipotáva jaikuaa. Upévare oñehenói avei Ñandejára Ñeʼẽ. Jehová arakaʼeve ndaijapúi, upévare ikatu jaguerovia la Biblia heʼíva. ‘Ñandejára ndaikatúi ijapu.’ (Hebreos 6:18, Nuevo Mundo.) Upévare, Ñandejára Ñeʼẽ oguereko pe añetegua (Juan 17:17).

La Biblia oĩ umi regalo tuichavéva apytépe Ñandejára omeʼẽvaʼekue ñandéve. Haʼete peteĩ carta ohaíva túva ohayhúva itaʼyrakuérape. Oñeʼẽ ñandéve Ñandejára promésare ojapotaha ko Yvýgui peteĩ tenda iporãitereíva ojeiko hag̃ua, peteĩ paraíso. Omombeʼu ñandéve ojapovaʼekue Ñandejára yma, ojapovahína koʼág̃a ha ojapótava tenonderã itaʼyrakuéra iñeʼẽrendúvape g̃uarã. Ñanepytyvõ avei ñamyatyrõ hag̃ua ñane problemakuéra ha jahupyty hag̃ua vyʼa (2 Timoteo 3:16, 17).

 Testigos de Jehová haʼe Ñandejára amigokuéra; nepytyvõta reikuaa hag̃ua la Biblia omboʼéva. Erentevaʼerã chupekuéra restudiaseha la Biblia. Ndojeruremoʼãi ndéve viru nemboʼe hag̃ua (Mateo 10:8). Avei, ikatúta reho cristianokuéra ijatyhápe. Koʼã reunión ojejapo umi tenda oñehenóivape Salón del Reino. Rehóramo umi reunionhápe, pyaʼeterei reikuaavéta Ñandejáragui.

Ikatu jaikuaa Ñandejárape ñapensárõ umi hembiapokuére. Por ejemplo, la Biblia heʼi: ‘Ñandejára ojapo yvága ha yvy’ (Génesis 1:​1, NM). Jehová ojapórõ guare “yvága”, ojapo avei Kuarahy. Upéicharõ, mbaʼépa ñanemboʼe kóva Ñandejáragui? Jehová oguerekoha tuicha poder. Haʼe añoite ikatu ojapo peteĩ mbaʼe imbaretetereíva haʼéva Kuarahy. Ohechauka avei ñandéve Jehová iñaranduha, oñekotevẽgui tuicha arandu ojapo hag̃ua Kuarahy, ñanembyaku ha ñanderesapéva, ha ndoguéiva arakaʼeve.

Jehová rembiapokue ohechauka ñanderayhuha. Epensami umi yváre oĩva opaichagua ko Yvy ape ári. Jehová ikatuvaʼerãmoʼã omeʼẽ ñandéve peteĩchaguánte, térã ni peteĩ. Upevére, omeʼẽ ñandéve opaichagua yva, ojoavýva tuicha ha hekuépe. Kóva ohechauka Jehová ñanderayhuha, ha avei ipojeraha, oporohechakuaa ha ipyʼaporãha (Salmo 104:24).