Oiko hag̃ua ñandehegui Ñandejára amigo, tekotevẽ jaikuaa chupe. Ñane amigokuéra oikuaa ha oiporu ñande réra, ajépa? Ñandejára avei oipota jaikuaa ha jaiporu héra. Ñandejára réra haʼe Jehová (Salmo 83:18; Mateo 6:9). Avei, jaikuaavaʼerã mbaʼépa iporã ha ivai chupe, mávapa iñamígo ha mávapa ndahaʼéi. Ñaikotevẽ tiempo jaikuaa porã hag̃ua ñande rapichápe. La Biblia heʼi iporãha avei ñamboyke tiempo jaikuaa hag̃ua Jehovápe (Efesios 5:15, 16).

Ñandejára amigokuéra ojapo haʼe oipotáva. Epensami ne amigokuérare. Reguereko vaírõ ha rejapórõ umi ndogustáiva chupekuéra, ndeguerekosénepa gueteri iñamígorõ? Nahániri. Upéicha avei, jaikosérõ Ñandejára amigo ramo, jajapovaʼerã pe haʼe oipotáva (Juan 4:24).

Ndaopavavéi religión ñanepytyvõ jaiko hag̃ua Ñandejára amigo ramo. Jesús, haʼéva Ñandejára amigoite, oñeʼẽvaʼekue mokõi tapégui. Peteĩ tuicha ha henyhẽ géntegui. Ko tape oporogueraha ñehundípe. Pe otro katu ipoʼi ha pokã oĩ oguatáva ipype. Upe tape oporogueraha jeikove opaʼỹvape. Upéva heʼise jaguerekosérõ Ñandejára amistad, tekotevẽ jaikuaa mbaʼéichapa ñameʼẽvaʼerã chupe adoración (Mateo 7:​13, 14).