HETA diskursánte ojeprepara porã, oheka heta informasión, oñehaʼã omohenda porã umi idéa ha oñeʼẽ syryry. Upéicharõ jepe, umi hénte ojedistrae ha noñatendéi pe diskúrsore, ha amo ipahápe ndaideprovéchoi umi mbaʼe heʼíva. ¿Mbaʼépa hína la provléma?

Oiméne pe diskursánte omañaiterei inótare ha noñeʼẽi ipyʼaite guive. Upéicha rupi ndoiporúi umi palávra jaiporúva normálmente ñañemongeta jave ñande rapichándi. Oñemongeta rangue umi héntendi haʼete osermoneáva chupekuéra. Ikatu hag̃uáicha igústo pe diskúrso odepende mbaʼéichapa ojeprepara.

Reskrivíramo palávra por palávra la nde diskúrso ha upévagui rejapose peteĩ voského, hasýtama upe rire osẽ hag̃ua ndejehegui reíntema umi mbaʼe erétava. ¿Mbaʼérepa? Pórke rerekóramo jepe ne nótape umi idéante, reiporuséta umi palávra reiporavo vaʼekue ñepyrũrã. Ñañemongeta jave ningo ndajaikói jaiporavo umi palávra, ndahaʼéi hína jaleerõguáicha peteĩ lívro térã rrevísta. Ha nde diskúrsope releéramo palávra por palávra haʼetéta ndeserioitereíva ha renohẽva peteĩ diksionáriogui umi mbaʼe eréva.

Reskrivi rangue nde diskúrso kompletoite, esegi ko suherénsia: 1) Ehecha mbaʼe témapa rereko ha mboy púnto prinsipál reiporúta remyesakã hag̃ua. Mbykýtaramo la nde diskúrso, mokõi púnto ovaléma. Ipukuvétaramo ikatu reiporu cuatro térã cinco púnto. 2) Káda púnto prinsipál guýpe remoĩ vaʼerã umi téxto ha ehémplo reiporútava, avei remoĩkuaa informasión omopyendáva pe púnto prinsipál. 3) Ikatu voi reskrivi mbykymi mbaʼépa eréta ne introduksiónpe ha remohuʼã hag̃ua nde diskúrso.

Rejeprepara vove ani rememorisa la nde diskúrso. Repensa rangue káda palávrare, epensa umi idéa rehe. Errepasa umi idéa opyta porã  meve ne akãme. Remohenda porãramo umíva nde voskéhope, remañávo hese oútantema ndéve umi palávra reiporútava.

Mbaʼérepa okonveni. Reiporúramo peteĩ voského orekóva umi idéante, ikatúta remeʼẽ nde diskúrso reñemongetarõguáicha umi nerendúvandi. Péicha ikyreʼỹvéta la nde diskúrso ha igustovéta umi héntepe.

Avei péicha ikatúta repoko umi hénte korasõre, pórke remañáta hesekuéra reñeʼẽ jave, ha ndereikomoʼãi rekontrola manterei ne notakuéra jahecha reiporúpa hína umi palávra remoĩ vaʼekue. Ikatúta reñeʼẽ rejapoháicha normálmente ha umi nerendúva ohechakuaáta rentendeha la ne téma ha reñeinteresaha hesekuéra.

Ndereikóiramo reskrivi palávra por palávra, ifasilvéta ndéve rekambia mimi la nde diskúrso tekotevẽramo. Por ehémplo, pe día rejapotaha ne asignasión rehendúramo peteĩ notísia ohóva ne témare, ikatu reiporu iñinteresanteve hag̃ua nde párte. Térã rejapo aja nde diskúrso repilláramo pe kongregasiónpe oĩha hetaiterei mitã, iporãta rekambiaʼimíramo umi ehémplo ha pe informasión, ideprovécho hag̃ua avei chupekuéra pe diskúrso.

Avei ndereikóiramo reskrivipaite nde diskúrso nepytyvõta repensakuaa hag̃ua. ¿Mbaʼérepa? Rehechakuaávo umi nerendúva oñatende porãha nderehe, nekyreʼỹvéta remyesakãve hag̃ua umi idéa ha púnto prinsipál. Péro repilláramo umi hénte ikaiguemaha, reñehaʼãta rekambiaʼimi tekotevẽhápe, resegínte rangue reñeʼẽ avave openaʼỹre nderehe.

Mbaʼe pelígropa oĩ. Oĩ heta mbaʼe tekotevẽva reñatende rejapóta jave nde diskúrso peteĩ voského guivénte. Por ehémplo oĩ heta ohasapáva itiémpo, upéva oiko jepi omoingeségui hetaiterei idéa ojapo aja idiskúrso. Ani hag̃ua oiko nderehe upéva remarka vaʼerã nde voskéhope mboy minútopa reiporu vaʼerã káda pártepe. Ha eñehaʼã errespeta la remoĩ vaʼekue.

Heta diskursánte katu ojeroviaitereíma ijehe ikatupyry haguére ojapo hag̃ua diskúrso. Haʼekuéra ojepokuaa oñeʼẽ en púvliko ha upévare ndahasyiete chupekuéra okalkulaʼimínte hag̃ua mbaʼe mbaʼépa heʼíta, ha upe rire ojapóma la idiskúrso. Péro tekotevẽ ñaneumílde, ha jahechakuaa jajapo jave peteĩ asignasión Jehová  ojevaleha ñanderehe ohekomboʼe hag̃ua isiervokuérape. Upévare tahaʼe haʼéva pe asignasión jarekóva, jajeprepara porã vaʼerã ha jajerure Jehovápe tañanepytyvõ (Is. 30:20; Rom. 12:6-8).

Umi ojapo ramóva diskúrso ndoiporuséi peteĩ voského okyhyjégui hesaráirõ g̃uarã mbaʼépa heʼíta, upévare opensa okonvenivetaha chupe oskrivipaitérõ la idiskúrso. Oimérõ nde péicha reñeñandu, ani reheja upéva nemokangy, tekotevẽterei remehora ko mbaʼépe oiko hag̃ua ndehegui peteĩ diskursánte katupyry. Rejeprepara porã vaʼerã ha ejerovia Jehová nepytyvõtaha ijespíritu rupive (Juan 14:26).

Ótro diskursánte katu okyhyje ojavýramo g̃uarã térã opensa ndaikatumoʼãiha oiporu hendápe porã umi palávra. Jepe umi oleénteva idiskúrso saʼive ojavýta ha oiporu hendaitépe umi palávra, umi oiporúva peteĩ voského igustove la idiskúrso oiporúgui umi palávra ndahasýiva ñantende hag̃ua. Rejeprepara porãramo, umi idéa opyta porãtama ne akãme ha upéi umi palávra ha fráse oútantema ndéve rejapo aja nde diskúrso. Ha rejepokuaáramo reñeʼẽ hendápe porã, ndahasymoʼãi ndéve reñeʼẽ hag̃ua avei upéicha rejapóvo nde diskúrso.

Mbaʼeichagua nótapa reiporu vaʼerã. Ndekatupyryvévo rehóvo saʼive mbaʼéma reskrivíta ne nótape. Ikatu remoĩ peteĩ kuatiaʼípe umi téxto reiporuséva ha reskrivi mbykymi mbaʼéichapa remyesakãta. Resẽ jave repredika iporãve rememorisánte umi idéa, ha oimérõ reheka raʼe informasión rejapo hag̃ua peteĩ rrevisíta, ikatu reanota algúna fráse ha eñongatu nde Bíbliape. Térã ikatúnte reiporu pe informasión oĩva lívro Razonamiéntope, ha la Bíbliape pe párte hérava “Ñahesaʼỹijo hag̃ua”.

Péro, ¿mbaʼépa ikatu rejapo otokáramo ndéve diskúrso púvliko ha hetave asignasión ojoapykueripa? Upéicharõ ne notakuéra ipukuve vaʼerã, péicha reñensajávo remaña haguénte hese nemanduʼátama mbaʼe mbaʼépa ere vaʼerã. Péro rejapo vove nde párte ani remaña manterei ne notakuérare, cháke péicha nosẽmoʼãi jey ndéve reñemongetarõguáicha umi héntendi. Upévare reiporútaramo nóta ipukuetereíva, remarka vaʼerã umi palávra ha téxto iñimportantevéva, péicha pyaʼeve retopáta.

Jepe ndekatupyryvévo rehóvo natekotevẽmoʼãvéima reanotapaite la ere vaʼerã, iñimportánte rememorisa mbaʼépa eréta ne introduksiónpe  ha remohuʼãvo nde diskúrso. Péicha og̃uahẽvéta umi héntepe pe informasión, ha ikatúta remaña hesekuéra reñeʼẽ aja. Avei iporãvéta releénteramo pe informasión oĩháme téxto vívliko, remeʼẽtaramo algúna sífra térã ótro detálle. Péicha umi nerendúva oñatende porãvéta nderehe.

Oñembaʼeporandu jave ñandéve. Sapyʼánte desorpresaite oñeporandu ñandéve peteĩ mbaʼe ha ndajarekói tiémpo japrepara hag̃ua peteĩ voského. Péva ikatu oiko predikasiónpe, ñañeʼẽ jave ñane héntendi, ñane kompañéro de traváhondi térã eskuélape. Térã ikatu avei umi autorida ojerure ñandéve ñamyesakã hag̃ua peteĩ mbaʼe jagueroviáva. Iñimportánte siémpre jareko enkuénta ko konsého: “Akóinte peime vaʼerã pedefende hag̃uáicha pene esperánsa oĩramo oporandúva peẽme hese. Péro pejapo vaʼerã upéva pyʼaporãme ha pehechauka perrespetaha pende pyʼaite guive pende rapichakuérape” (1 Ped. 3:15).

Epensami mbaʼéichapa Pedro ha Juan ombohovái pe Sanedrínpe, heʼiháicha Hechos 4:19, 20-pe. Haʼekuéra dos frásepe omyesakãma mbaʼérepa iñeʼẽrendu vaʼerã Ñandejárape. Ha ontendeka pe trivunálpe haʼekuéra ojechataha Ñandejárandi odesidívare. Tiémpo rire Estébanpe ojegueraha avei pe trivunál renondépe, ha Hechos 7:2-53-pe retopáta mbaʼéichapa haʼe voskehoʼỹre omyesakã hetaiterei mbaʼe. ¿Mbaʼéichapa omohenda umi idéa? Haʼe omombeʼu umi mbaʼe oiko vaʼekue en órden Abrahán tiémpo guive. Peteĩ pártepe otoka porã chupe omombeʼu hag̃ua mbaʼéichapa umi isrraelíta opuʼã vaʼekue Jehováre, ha omohuʼãvo heʼi umi oĩva pe Sanedrínpe ojoguaha koʼã isrraelítape ojukauka haguére Ñandejára Raʼýpe.

¿Mbaʼéichapa ikatúta rembohovái porã degolpete oñeporandúramo ndéve peteĩ mbaʼe? Ikatu resegi Nehemías ehémplo, haʼe ombohovái mboyve pe rréi Artajérjespe, oñemboʼe Ñandejárape ipyʼapýpe (Neh. 2:4). Upe rire emohenda porã ne akãme umi idéa remyesakãséva. Ikatu remohenda péicha: 1) Eiporavo peteĩ térã mokõi idéa (ikatu remaña umi oĩva lívro Razonamiéntope). 2) Ehecha mbaʼe téxtopa releéta remopyenda hag̃ua upe erétava. 3) Epensa mbaʼépa ikatu ere reñepyrũ hag̃ua reñeʼẽ chupe, ha eñatende ani reofende chupe. Upéi ikatúntema reñepyrũ.

¿Nemanduʼátapa koʼã mbaʼére rejecha vai jave? Jesús heʼi vaʼekue idisipulokuérape: “Ani pejepyʼapy ndapeikuaáirõ g̃uarã mbaʼépa  pejéta térã mbaʼéichapa peñeʼẽta. Upévo ojekuaaukáta voi peẽme mbaʼépa peje vaʼerã. Ndahaʼéi ningo peẽnte la peñeʼẽtava, síno pende Ru yvagapegua espíritu penepytyvõta peñeʼẽ hag̃ua” (Mat. 10:19, 20). Upéva ndeʼiséi peteĩ milágro rupive ñanearandutaha ñañeʼẽ hag̃ua, oiko haguéicha umi kristiáno ypykue rehe (1 Cor. 12:8). Péro jaaprovecháramo umi informasión omeʼẽva ñandéve Jehová umi rreunión rupive, ág̃a ñaikotevẽ vove, ijespíritu ñanepytyvõta ñanemanduʼa hag̃ua umívare (Is. 50:4).

Rejeprepara porãramo, ág̃a rejapo vove ne asignasión umi palávra ha fráse oútantema ne akãme, ha upéva nepytyvõta remboʼe porãve hag̃ua. Rejepokuaáramo rejapo péicha nde párte, upe rire ndahasymoʼãi ndéve rembohovái hag̃ua oñeporandu jave ndéve peteĩ mbaʼe degolpete. Aníke rekyhyje reiporu hag̃ua peteĩ voského, mbeguekatúpe rehecháta mbaʼéichapa repredika porãve ha rejapóta diskúrso igústova ha og̃uahẽva umi hénte korasõme.