PE DISKURSÁNTE apenami oñeʼẽramo, sapyʼaitépe ikaiguéma la heʼíva ha umi hénte oñepyrũma opirakutu. Predikasiónpe katu pe ogajára nopenaguasumoʼãi nderehe nohenduporãiramo la eréva. Ha rreunionhápe rekomentáramo mbegueterei, avavépe neremokyreʼỹmoʼãi (Heb. 10:24, 25). Péro rehasáramo la rrája ha hatãiterei reñeʼẽ, redesahusiapáta umi héntepe ha nanerendusemoʼãi hikuái (Prov. 27:14). Upévare iporãta reguerekóramo enkuénta koʼã mbaʼe jahechátava.

Heta térã mbovymíntepa umi nerendútava. Reguereko vaʼerã enkuénta mboy héntepepa reñeʼẽta: peteĩ persónape, peteĩ famíliape, kongregasiónpe, peteĩ grúpo ijatývape osẽ hag̃ua opredika, térã peteĩ aty guasuhápe. Nemanduʼa vaʼerã káda situasión idiferenteha.

Yma Ñandejára siervokuéra oñeʼẽ vaʼekue avei heta hénte renondépe, por ehémplo oñeinagurárõ guare pe témplo Jerusalénpe. Upérõ ndaipóri vaʼekue parlánte ni mikrófono, péro Salomón ojupi peteĩ platafórmape ha oguerohory ha ovendesi umi isrraelítape “hatã oñeʼẽvo” (1 Rey. 8:55; 2 Crón. 6:13). Heta tiémpo rire, umi kristiáno orresivi espíritu sánto Pentekostés áño 33-pe, ha upe riremi ijaty heta hénte ohenduséva pe marandu porã, péro ijapytepekuéra oĩ avei umi nohenduséiva. Upérõ apóstol Pedro ‘oñemboʼy ha hatã’ oñeʼẽ (Hech. 2:14). Pe diskúrso ojapóva igustoiterei ha opoko umi hénte korasõre.

¿Mbaʼéichapa ikatu repilla tekotevẽpa reñeʼẽ hatãve térã mbegueve? Reikuaa hag̃ua upéva, rejapo aja la nde diskúrso remaña vaʼerã umi héntere ha eñeporandu: “¿Oimépa apenaite cherendu hína, térãpa nahendái hikuái añeʼẽ hatãitereígui?”.

 Tahaʼe reñeʼẽtarõ peteĩ persónape térã heta hénte renondépe, reikuaa vaʼerã mbaʼépa okonvenivéta umi nerendútavape. Por ehémplo reñeʼẽtarõ peteĩ nohenduporãivandi ikatu reñeʼẽ hatãmie. Péro umi ijedáva ikatu ojagarra vai ndehegui reñeʼẽ hatãitereíramo chupe, pórke opensáta nemaledukadoha hína. Heta lugárpe oĩramo oñeʼẽ hatãva, oñepensa ijarhél térã ipochyha hína.

Oĩ jave rruído nde jerére. Predikasiónpe reñatende vaʼerã reikuaa hag̃ua oimépa tekotevẽ reñeʼẽ hatãmie nerendu hag̃ua pe ogajára. Por ehémplo, ikatu ohasa peteĩ kamión, ijayvu umi mitã, oñarõmba umi jagua, hatãiterei musikapu, térã pe téle ipu hatãiterei. Oĩ lugár umi óga oĩháme ojoʼaripa ha péicha jave reñeʼẽramo hatãiterei pe ogajára ikatu otĩ, umi vesíno ohendupágui la eréva.

Umi ermáno ojapóva diskúrso kongregasiónpe térã aty guasuhápe oñatende vaʼerã hetave mbaʼére ikatu hag̃uáicha oñehendu porã la heʼíva. Katuete oĩta hetave tyapu reñeʼẽtaramo peteĩ mángo guýpe térã okápe rei. Por ehémplo Latinoaméricape, mokõi misionéro ojapo diskúrso peteĩ karai korapýpe, ha ojapo aja la idiskúrso peteĩ gállo osapukái kontinuadoite. Ha hiʼarive namombyrýi upégui peteĩ plásape ijaty heta hénte peteĩ funsionhápe ha ijayvujoa hikuái upépe.

Nde diskúrso aja ikatu oiko peteĩ rruído oporomolestáva, péicha jave iporãta repytaʼimi ohasa peve, térã reñeʼẽ hatãmie. Por ehémplo, oimérõ pe lugár pendeatyhápe itécho de chápa, okýramo noñehendumoʼãi mbaʼevete. Rreunionhápe ikatu oĩ avei og̃uahẽva tárde térã oĩ mitã hasẽva, ha umíva oporodistrae. Repensáma vaʼerã mbaʼépa rejapokuaa péicha jave, ikatu hag̃uáicha umi nerendúva oaprovecha porã pe informasión.

Oĩramo jepe mikrófono ñande atyhápe, lomímonte sapyʼánte tekotevẽta reñeʼẽ hatãmie. Heta lugárpe pyʼỹi oho la lus, péicha jave umi diskursánte oñeʼẽ hatãve vaʼerã oñehendu hag̃ua la heʼíva.

Reñatende vaʼerã mbaʼe témarepa reñeʼẽta hína. Reikuaa hag̃ua tekotevẽpa reñeʼẽ hatã térã mbegueve odepende hína pe informasiónre. Oimérõ reipota umi nerendúva ojedesidi ojapo peteĩ mbaʼe térã reñeʼẽramo hína Jehová ára guasúre, apenamínte reñeʼẽrõ, pe eréva ndopokomoʼãi umi hénte korasõre. Releétaramo peteĩ téxto  oñeʼẽva mborayhúre katu naiporãmoʼãi releéramo hatã guasu. Upéicharõ, odepende hína káda informasiónre repilla hag̃ua mbaʼéichapa relee vaʼerã, péro reñatende vaʼerã ani rexahera ni rejechaukase.

Ani nderesarái mbaʼépa rehupytyse. Reipotáramo umi nerendúva okuʼe ha ojapo la Biblia heʼíva, tekotevẽ reñeʼẽ hatãmie, péro reipotáramo okambia opensa lája, resapukái rangue iporãvéta reñemoñeʼẽramo chupekuéra mborayhúpe. Oiméramo rekonsolase umi ohasa asývape, reñeʼẽ vaʼerã mbegue ha trankílo porãnte, péicha ohechakuaáta hikuái reñeinteresaha hesekuéra.

Mbaʼéicha javépa reñeʼẽ hatãve vaʼerã. Predikasiónpe reñeʼẽtaramo peteĩ hembiapóvape tekotevẽ reñeʼẽ hatã nerendu hag̃uáicha. Tuvakuéra oikuaa iñimportanteha upéva, umi mitã ohugáramo hína nopenamoʼãi hesekuéra noñeʼẽiramo hatã porã. Umi ermáno omoakãva peteĩ rreunión térã omoñepyrũtava peteĩ asambléa, oikuaa avei tekotevẽha oñeʼẽ hatãmie enterove ohendu hag̃ua chupe. Predikasiónpe katu pe persóna ombaʼapóramo hína korapýre, iporãta resaludáramo chupe hatã porã nerendu hag̃ua.

Añetehápe, iñimportánte reñatende oimépa nerendu porã hína nde rapicha. Apenaite reñeʼẽramo umi nerendúva opensáta ndereikuaaiha mbaʼépa la erétava, térã nderejepreparái hague.

Remeʼẽtaramo peteĩ órden hatã reñeʼẽ vaʼerã, ikatu hag̃uáicha umi nerendúva pyaʼe okuʼe (Hech. 14:9, 10). Reavisa hag̃ua nde rapichápe oĩha peteĩ pelígro, avése tekotevẽ resapukái. Por ehémplo yma Filípospe peteĩ guárdia kársel haimete ojesuisida oimoʼãgui umi préso okañymba hague. Upévo Pablo hatã osapukái chupe: “¡Ápe roimemba, ani rejapo ndejehe mbaʼeve ivaíva!”. Haʼe hatã oñeʼẽ rupi pe kuimbaʼe ojesalva. Upéi Pablo ha Silas opredika chupe ha hogayguápe, ha enterove ojerovia Ñandejárare (Hech. 16:27-33).

Mbaʼéichapa ikatu remehora. Heta persóna ningo ivós kangyeterei ha upévare opensa ndaikatumoʼãiha voi oñehendu porã chupe. Péro nde vos ikangýramo jepe, ikatu hína remehora ha oñehendu porãve la eréva. ¿Mbaʼéicha rejapokuaa upéva? Tenonderã epraktika rerrespira porãve hag̃ua, upéi eñatende reñemboʼy lájare. Ani reñakãity ni reñemboaturu, cháke upéicha mbegueve osẽta la eréva. Tahaʼe reñemboʼy térã reguapy jave, reñakãrapuʼã vaʼerã ha emaña umi  nerendúvare. Avei eñehaʼã eñetrankilisa, errespira mbeguekatu, ha ani rejapuraiterei reñeʼẽ hag̃ua.

Heta persóna katu ojepokuaa oñeʼẽ hatãiterei. Ikatu oime hóga ládo umi hénte ojepokuaa voi hatã hatã oñeʼẽ, térã itravahohápe oĩ heta rruído ha noñemeʼẽvéima enkuénta hatãiterei oñeʼẽha. Koʼã persóna ikatu opensa reñeʼẽséramo nde rapichápe resapukáimante vaʼerãha chupe. Péro la Bíbliape oñemeʼẽ ñandéve ko konsého: “Pehechaukákena peiporiahuverekoha pende rapichápe pende pyʼaite guive, penembaʼeporã, peñemomirĩ, ani pendepochy rei ha penepasiénsiakena” (Col. 3:12). Jasegíramo ko konsého enterove ikatu ñamehora ko mbaʼépe.

¿Mbaʼépa ikatu rejapo remehorave hag̃ua? Rejeprepara porã vaʼerã, esẽ meme predikasiónpe ha eñemboʼe Jehovápe. Tahaʼe rejapótaramo diskúrso térã repredikáta jave, siémpre nemanduʼa vaʼerã iñimportanteha reñeʼẽ nerendu hag̃uáicha hikuái (Prov. 18:21).